នារសៀលថ្ងៃទី០៤ ខែមេសា ឆ្នាំ២០២៤ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក នាក់ ណេរ៉ុន អភិបាលរងខេត្តសៀមរាប បានដឹកនាំបើកកិច្ចប្រជុំសាមញ្ញលើកទី៥៩ ក្រុមប្រឹក្សាខេត្តសៀមរាប អាណត្តិទី៣ ក្នុងឆ្នាំ២០២៤ ដើមី្បពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៥៨ និងសេចក្តីព្រាងរបាយការណ៍ប្រចាំខែមីនា ឆ្នាំ២០២៤ ស្តីពីការអនុវត្តការងាររបស់រដ្ឋបាលខេត្តសៀមរាប។
ក្នុងឱកាសនោះសមាជិកនៃកិច្ចប្រជុំ បានលើនូវបញ្ហាពាក់ព័ន្ធមួយចំនួនដែលទៅនឹងរដ្ឋបាលខេត្ត ដោយបានផ្តោតទៅលើការស្នើសុំបង្កើតទីចាត់ការទីក្រុងឆ្លាតវៃ ,ពាក់ព័ន្ធធនធានមនុស្សនៃរដ្ឋបាលខេត្ត ,បញ្ហាការគ្រប់គ្រងស្ថានីយ៍ប្រេងឥន្ធនះ និងហ្គាស ក្នុងការចេញនូវអាជ្ញាប័ណ្ណធ្វើអាជីវកម្ម និងបញ្ហាដីធ្លី។ ជុំវិញការលើកឡើងពីបញ្ហាទាំងនេះ គ្រប់អ្នកពាក់ព័ន្ធបានធ្វើការបកស្រាយទៅនឹងសំណួររបស់សមាជិកផងដែរ។
លោក នាក់ ណេរ៉ុន អភិបាលរងខេត្ត បានជំរុញឱ្យមន្ទីរអង្គភាពពាក់ព័ន្ធទាំងអស់ ត្រូវយកចិត្តទុកដាក់ខ្ពស់ក្នុងការដោះស្រាយរាល់ការលើកឡើងក្នុងអង្គប្រជុំនាពេលនេះ ហើយលោកក៏បានវាយតម្លៃខ្ពស់ ទៅលើលទ្ធផលការងារកន្លងមក ព្រមទាំងបានជម្រុញដល់ថ្នាក់ដឹកនាំមន្ទីរអង្គភាព អាជ្ញាធរក្រុងស្រុក សំខាន់គ្រប់ទីចាត់ការអង្គភាពចំណុះសាលាខេត្ត ដែលជាសេនាធិការ ជូនគណៈអភិបាលខេត្ត ត្រូវបង្កើនការយកចិត្តទុកដាក់ខ្ពស់ ក្នុងកិច្ចកសាង និងអភិវឌ្ឍន៍ ដោយផ្តោតសំខាន់ទៅលើការងារសន្តិសុខ សណ្តាប់ធ្នាប់សាធារណៈ បញ្ហាអនាម័យ បរិស្ថាន ក្នុងឱកាសរៀបចំបុណ្យចូលឆ្នាំថ្មីប្រពៃណីខ្មែរនៅថ្ងៃខាងមុខនេះ។ ជាពិសេសការរៀបចំសោភណ្ឌភាពក្រុង នៅតាមដងស្ទឹង ដងផ្លូវនានាក្នុងក្រុង ត្រៀមរៀបចំធ្វើកម្មវិធី “សៀមរាបសង្ក្រាន្ត” ក្នុងគោលបំណងបំផុសចលនាមហាជនឲ្យចូលរួមក្នុងការងារអភិវឌ្ឍ និងអភិរក្ស ថែរក្សា ប្រពៃណី ទំនៀមទម្លាប់ដូនតាខ្មែរយើង ប្រកបដោយនិរន្តភាព និងចូលរួមសម្រេចយុទ្ធនាការពិពិធកម្មទេសចរណ៍ តាមរយៈការបង្កើតព្រឹត្តិការណ៍ទេសចរណ៍ថ្មីៗ។ ហើយកម្មវិធី “សៀមរាបសង្ក្រាន្ត” ស្របពេលដូចជាការ គាំទ្រដល់យុទ្ធនាការទស្សនាសៀមរាប ឆ្នាំ២០២៤ ដើមី្បបង្កដល់ភាពសប្បាយរីករាយដល់ប្រជាពលរដ្ឋ និងភ្ញៀវទេសចរណ៍ជាតិ អន្តរជាតិផងដែរ។
មានប្រសាសន៍បិទអង្គប្រជុំ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានសង្កាត់ធ្ងន់ថា តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកប ដោយ ក្រមសីលធម៌វិជ្ជាជីវៈ ពីសំណាក់ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាព និង អ្នកពាក់ព័ន្ធទាំងអស់បានញ៉ាំងឲ្យដំណើរការនៃកិច្ចប្រជុំសាមញ្ញលើកទី៥៩ របស់ក្រុមប្រឹក្សាខេត្ត ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក។ ឯកឧត្តមបានសំណូមពរ ដល់សមាជិកសមាជិកានៃក្រុមប្រឹក្សាខេត្តសៀមរាបទាំងអស់ សូមអញ្ជើញមកចូលរួមប្រជុំឲ្យបានគ្រប់គ្នានៅកិច្ចប្រជុំសាមញ្ញលើកទី៦០ នាខែឧសភា គឺជាកិច្ចប្រជុំចុងក្រោយនៃអាណត្តិទី៣ របស់ក្រុមប្រឹក្សាខេត្តសៀមរាប ហើយនៅអាណត្តិក្រោយ ក៏មានការផ្លាស់ប្តូរសមសភាពមួយចំនួនផងដែរ៕
អត្ថបទ និងរូបភាព៖ លោក ទ្រា ពន្លឺ, មុី សុខខារិទ្ធ
កែសម្រួល៖ លោក អ៊ុន ណារាជ្យ
