នៅសាលប្រជុំសាលាខេត្តសៀមរាប នាថ្ងៃទី៤ ខែមេសា ឆ្នាំ២០២៤ មានរៀបចំកិច្ចប្រជុំពិភាក្សាលើការអនុវត្តការងារដោះស្រាយផលប៉ះពាល់ដោយសារ “គម្រោងធ្វើឲ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ប្លាស្ទិកនៅប្រទេសកម្ពុជា” ដឹកនាំដោយលោក ចាន់ ធន់ អគ្គនាយករង នៃអគ្គនាយកដ្ឋានដោះស្រាយផលប៉ះពាល់ដោយគម្រោងអភិវឌ្ឍន៍ នៃក្រសួងសេដ្ឋកិច្ច និងហិរញ្ញវត្ថុ និង លោក យុន លីនណេ អភិបាលរងខេត្ត ដោយមានការចូលរួមពីអ្នកពាក់ព័ន្ធជាច្រើនរូប។
លោក យុន លីនណេ បានបញ្ជាក់ថា ខេត្តសៀមរាប ជាតំបន់ទេសចរណ៍វប្បធម៌ ប្រវត្តិសាស្ត្រ ដែលសម្បូរទៅដោយប្រាង្គប្រាសាទ តំបន់រមនីយដ្ឋានធម្មជាតិ បានកំពុងទាក់ទាញភ្ញៀវទេសចរណ៍ជាតិ អន្តរជាតិ ចូលមកទស្សនាកម្សាន្ត។ ក្នុងនោះបញ្ហាកាកសំណល់ សំរាម គឺជាសត្រូវបរិស្ថាន ដែលធ្វើឲ្យបាត់បង់នូវសោ ភណ្ឌភាពក្នុងទីក្រុង ទីប្រជុំជន និងប៉ះពាល់ដល់សុខភាពរបស់យើងគ្រប់គ្នា។ ជាមួយនោះប្រជាពលរដ្ឋក្នុងតំបន់ទីប្រជុំជនខេត្តសៀមរាប សម្រាប់មនុស្សម្នាក់បានផលិតសំរាមពី ៩០០ក្រាម ទៅ ១,២គីឡូក្រាម និងពលរដ្ឋនៅជនបទវិញ ផលិតសំរាមប្រមាណ ៣០០ក្រោមក្នុងមួយនាក់ ហើយតាមការគុណគូរជាទូទៅខេត្តសៀមរាបដែលមានប្រជាពលរដ្ឋជាង ១លាននាក់ អាចផលិតសំរាមប្រចាំថ្ងៃជិត ៦០០តោន។ ក្នុងនោះការរៀបចំទីលានចាក់សំរាមថ្មី ក៏មានផលប៉ះពាល់ដល់ប្រជាពលរដ្ឋ ចំនួន ២០គ្រួសារ ដែលត្រូវគណៈកម្មការយើងចាំបាច់ត្រូវធ្វើការដោះស្រាយនូវរាល់ផលប៉ះពាល់ឲ្យបានរួចរាល់មុនធ្វើការអនុវត្តគម្រោម ទើបការងារសាងសង់ដំណើរការទៅបាន។
ក្នុងឱកាសនោះដែរ លោក ចាន់ ធន់ បានលើកឡើងនូវចំណុចមួយចំនួន ដែលមានការពាក់ព័ន្ធទៅលើគម្រោង ដោយសារកំណើនសេដ្ឋកិច្ចសង្គម និងតម្រូវការនគររូបនីយកម្មកើនឡើង បានធ្វើឲ្យបរិមាណសំរាម សំណល់រឹងនៅតាមទីប្រជុំជននានាតាមបណ្តារាជធានីខេត្តទូទាំងប្រទេស មានការកើនឡើង និងបង្កផលប៉ះពាល់ដល់បរិស្ថាន អនាម័យ សុខភាពសាធារណៈ និងសោភ័ណ្ឌភាពទីក្រុង ទីប្រជុំជន។ ដើម្បីដោះស្រាយបញ្ហានេះ និងធានាឲ្យការគ្រប់គ្រងសំរាម សំណល់រឹងទីប្រជុំជនមានប្រសិទ្ធភាពខ្ពស់ រាជរដ្ឋាភិបាលបានសម្រេចផ្ទេរមុខងារគ្រប់គ្រងសំរាម សំណល់រឹងទីប្រជុំជននេះ មកឲ្យរដ្ឋបាលរាជធានីក្រុងស្រុកដែលនៅកៀកជិតប្រជាពលរដ្ឋជាអ្នកអនុវត្ត។
លោកបន្តថា ដើម្បីធានាបានលើបញ្ហាសំរាម សំណល់រឹងទីប្រជុំជនគ្រប់ប្រភេទនឹងត្រូវបានញែក វេចខ្ចប់ ទុកដាក់ សម្អាត ប្រមូល ដឹកជញ្ជូន ប្រើប្រាស់ និងកែច្នៃ ព្រមទាំងធ្វើប្រព្រឹត្តិកម្មតាមបច្ចេកវិទ្យាប្រកបដោយអនាម័យ និងសុវត្ថិភាពបរិស្ថាន។ សម្រាប់នីតិកាលទី៧នេះ រាជរដ្ឋាភិបាលបានបន្តចាត់ទុកការកែលម្អគុណភាព និងប្រសិទ្ធភាពនៃការផ្ដល់សេវាជូនប្រជាពលរដ្ឋជាការងារអាទិភាពមួយដែលត្រូវសម្រេចឲ្យបាន។ បញ្ចកោណទី៤ ផ្តោតលើការអភិវឌ្ឍប្រកប ដោយចីរភាព និងបរិយាប័ន្ន ដែលក្នុងនោះការធានាចីរភាពបរិស្ថាន និងការរៀបចំខ្លួនដើម្បីឆ្លើយតបនឹងការប្រែប្រួលអាកាសធាតុ ព្រមទាំងការលើកកម្ពស់សេដ្ឋកិច្ចបៃតង គឺជាកិច្ចការអាទិភាពរបស់រាជរដ្ឋាភិបាលកម្ពុជា។ ស្របគ្នានេះ កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ (២០២១-២០៣០) បានកំណត់ថា ការគ្រប់គ្រងសម្រាម សំណល់រឹងទីប្រជុំជននៅរដ្ឋបាលថ្នាក់ក្រោមជាតិ គឺជាការអនុវត្តមុខងារជាកាតព្វកិច្ចមួយដែលបានកំណត់នៅក្នុងសមាសភាគទី៥ ដោយផ្តោតលើការលើកកម្ពស់ការផ្តល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន។
លោកបន្ថែមថា ដើមី្បឲ្យការអនុវត្តគម្រោងនេះបាន ទាមទាឲ្យគ្រប់ក្រសួង មន្ទីរ អាជ្ញាធរមូលដ្ឋាន និងប្រជាពលរដ្ឋ មានការចូលរួម ព្រមទាំងបានឲ្យក្រុមការងារអន្តរក្រសួង និងអនុគណៈកម្មការពាក់ព័ន្ធ ធ្វើការអង្កេតវាស់វែងលម្អិត ដោយធ្វើការពិគ្រោះជាមួយប្រជាពលរដ្ឋដែលរង់ផលប៉ពាល់ និងមានការសហការជាមួយអាជ្ញាធរមូលដ្ឋាន ដែលមានការពាក់ព័ន្ធ ដោយមានម្ចាស់ ទ្រព្យចូលរួម នៅក្នុងអំឡុងធ្វើការអង្កេតវាស់វែងលម្អិត ព្រមទាំងធ្វើកិច្ចសន្យា ស្តីពីការផ្តល់ប្រាក់ឧបត្ថម្ភគោលនយោបាយ ឬ បើកប្រាក់សំណង ដល់ប្រជាពលរដ្ឋរងផលប៉ះពាល់ទាំងនោះ៕
អត្ថបទ និងរូបភាព៖ លោក មុី សុខខារិទ្ធ
កែសម្រួល៖ លោក អ៊ុន ណារាជ្យ
