នៅព្រឹកថ្ងៃទី៨ ខែមេសា ឆ្នាំ២០២៤នេះ ឯកឧត្តម នាយឧត្តមសេនីយ៍ សួស អង្គារ៍ រដ្ឋលេខាធិការក្រសួងមហាផ្ទៃ បានអញ្ជើញដឹកនាំបើកកិច្ចប្រជុំផ្សព្វផ្សាយផែនការយុទ្ធសាស្ត្រស្តីពី “ការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ២០២៤-២០២៨” ជូនដល់ថ្នាក់ដឹកនាំ មន្ត្រីរាជការសាលខេត្ត មន្ទីរអង្គភាព សមត្ថកិច្ចទាំង៣ និងអាជ្ញាក្រុងស្រុក ឃុំសង្កាត់ទូទាំងខេត្តសៀមរាប។
លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាលខេត្តសៀមរាប បានឲ្យដឹងថា ក្នុងឆ្នាំ២០២៣ និងដើមត្រីមាសទី១ ឆ្នាំ ២០២៤នេះ អាជ្ញាធរមូលដ្ឋាន និងកងកម្លាំងប្រដាប់អាវុធគ្រប់លំដាប់ថ្នាក់ បានអនុវត្តយ៉ាងសកម្ម និងប្រកបដោយស្មារតីទទួលខុសត្រូវខ្ពស់ នូវគោលនយោបាយ និងគោលការណ៍នានា របស់រាជរដ្ឋាភិបាលកម្ពុជាក្រសួងមហាផ្ទៃ និងបានចូលរួមការពារយ៉ាងរឹងមាំនូវសុខសន្ដិភាព ស្ថេរភាពនយោបាយ ព្រមទាំងទប់ស្កាត់បទល្មើសគ្រប់ប្រភេទ។
លោកអភិបាលរងខេត្តបញ្ជាក់ថា រយៈពេល៣ខែ ដើមឆ្នាំ២០២៤នេះ សភាពការណ៍សន្តិសុខ សណ្តាប់ធ្នាប់សាធារណៈ និងគ្រោះថ្នាក់សង្គមនៅទូទាំងខេត្ត ចំពោះបទល្មើសព្រហ្មទណ្ឌ កើតឡើង ២៥/៣៦លើក ប្រៀបធៀបត្រីមាសទី១ ឆ្នាំ២០២៣ ថយចុះ ១១លើក និងបង្ក្រាបបាន ២៥/២៥លើក ឃាត់ជនសង្ស័យ ៣៣នាក់។ ករណីល្បែងស៊ីសងបង្ក្រាបបាន ០១/០៥លើក ប្រៀបធៀបត្រីមាសទី១ ឆ្នាំ២០២៣ ថយចុះ ៤លើក។ ក្មេងទំនើងបង្ក្រាបបាន ៣/២លើក ប្រៀបធៀបត្រីមាសទី១ ឆ្នាំ២០២៣ កើនឡើង ១លើក។ បទល្មើសអាជីវកម្ម-ផ្លូវភេទ បង្ក្រាប ៥/៣លើក ប្រៀបធៀបត្រីមាសទី១ ឆ្នាំ២០២៤ កើនឡើង២លើក។ បទល្មើសគ្រឿងញៀន បង្ក្រាបបាន ៥៩/៨១លើក ប្រៀបធៀបត្រីមាសទី១ ឆ្នាំ២០២៣ ថយចុះ២២លើក ឃាត់ខ្លួនមនុស្ស ៥៧៣នាក់, បទល្មើសសេដ្ឋកិច្ច បង្ក្រាបបាន ៥/១១លើក ប្រៀបធៀបត្រីមាសទី១ ឆ្នាំ២០២៣ ថយចុះ៦លើក, គ្រោះថ្នាក់ចរាចរណ៍ កើតឡើង ៣៣/១៧លើក ប្រៀបធៀបត្រីមាសទី១ ឆ្នាំ២០២៣ កើនឡើង ១៦លើក និងឧប្បទ្ទវហេតុ និងគ្រោះថ្នាក់ផ្សេងៗ កើតឡើង ៦៨/៤៦លើក ប្រៀបធៀបត្រីមាសទី១ ឆ្នាំ២០២៣ កើនឡើង ២២លើក។
ឯកឧត្តម នាយឧត្តមសេនីយ៍ សួស អង្គារ៍ រដ្ឋលេខាធិការក្រសួងមហាផ្ទៃ មានប្រសាសន៍ សម្រាប់ផែនការយុទ្ធសាស្ត្រដែលរាជរដ្ឋាភិបាលបានដាក់ចេញនោះ បានផ្តោតសំខាន់ទៅលើការរៀបចំស្ថាប័នរដ្ឋបាលថ្នាក់ក្រោមជាតិ ការអភិវឌ្ឍធនធានមនុស្ស ការពង្រឹងប្រសិទ្ធភាពការបំពេញការងារ ការធ្វើទំនើបកម្ម ប្រព័ន្ធគ្រប់គ្រង និងផ្តល់សេវាសាធារណៈតាមប្រព័ន្ធឌីជីថល និងពង្រឹងភាពជាដៃគូជាមួយអង្គការសង្គមស៊ីវិល ដៃគូអភីវឌ្ឍន៍ វិស័យឯកជន ដើម្បីលើកកម្ពស់ប្រសិទ្ធភាព និងគុណភាពនៃការផ្តល់សេវាសាធារណៈ និងការអភិវឌ្ឍមូលដ្ឋាន។ ស្របជាមួយគ្នានោះការបន្តការពារឱ្យបានដាច់ខាត នូវសន្តិភាព ឯករាជ្យ អធិបតេយ្យភាពជាតិ បូរណភាពទឹកដី ស្ថិរភាពនយោបាយ និងការការ៣រក្សាសន្តិសុខជាតិ សណ្ដាប់ធ្នាប់សាធារណៈ និងសុវត្តិភាពសង្គម ដែលជាបុរេលក្ខណមិនអាចខ្វះបានសម្រាប់ការលើកកម្ពស់សិទ្ឋិសេរីភាព ប្រជាធិបតេយ្យ និងការអភិវឌ្ឍប្រទេសជាតិ។
ឯកឧត្តមរដ្ឋលេខាធិការ មានប្រសាសន៍ទៀតថា ក្រៅពីផែនការនេះ ក្រសួងមហាផ្ទៃក៏បានផ្តោតលើការគ្រប់គ្រងពន្ធនាគារតាមបទដ្ឋាន ការអភិវឌ្ឍជំនាញវិជ្ជាជីវៈ ការទប់ស្កាត់ការប្រព្រឹត្តបទល្មើសសារជាថ្មី និងការអភិវឌ្ឍហេដ្ឋារចនាសម្ព័ន្ធពន្ធនាគារ។ ការពង្រឹងការកែទម្រង់ស្តាប័ន និងការអភិវឌ្ឍនធបានមនុស្ស ដើម្បីលើកកម្ពស់ប្រសិទ្ធភាព តម្លាភាព បរិយាបន្ន និងសមធម៌សង្គម ព្រមទាំងលើកកម្ពស់ភាពស្អាតស្អំក្នុងការបំពេញការងារ។ ការពង្រឹង និងការកែលម្អយន្តការ និតិវិធី និងស្តង់ដារនៃការផ្តល់សេវា ក្នុងក្របខ័ណ្ឌក្រសួងមហាផ្ទៃ ឲ្យមានភាពសាមញ្ញ ក្រមសីលធម៌វិជ្ជាជីវៈ គណនេយ្យភាព ភាពជឿទុកចិត្តុ និងតម្លាភាព និងការធ្វើបដិវត្តកម្មឌីជីថល ដើម្បីពង្រឹងប្រសិទ្ធភាពការងារ និងប្រសិទ្ធភាព នៃការផ្តល់សេវាសាធារណៈ។ ឯកឧត្តម ក៏បានជំរុញដល់អាជ្ញាធរគ្រប់ជាន់ថ្នាក់ យកចិត្តទុកដាក់អនុវត្តការងារឲ្យបានល្អ ស្របទៅនឹងការដាក់ចេញតាមផែណការយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភាផងដែរ៕
អត្ថបទ និងរូបភាព៖ លោក អ៊ុន ណារាជ្យ
