ក្នុងឱកាសពិធីកាត់ខ្សែបូឆ្លងសាលាឆទានមួយកន្លែង ក្នុងភូមិព្រះអង្គទ្រង់ ឃុំល្វា ស្រុកពួក ខេត្តសៀមរាប នាថ្ងៃទី៧ ខែមេសា ឆ្នាំ២០២៤ ឯកឧត្តម អុិត ដារ៉ា អនុរដ្ឋលេខាធិការកិច្ចការព្រំដែន បានលើកឡើងថា ក្រោមឆ័ត្រនយោបាយឈ្នះឈ្នះ ដែលដាក់ចេញដោយសម្តេចតេជោហ៊ុន សែន អតីតនាយករដ្ឋមន្ត្រី បានធ្វើឲ្យកម្ពុជាមានសុខសន្តិភាព និងការរីកចម្រើនគ្រប់វិស័យ និងគ្រប់ទីតំបន់ទូទាំងប្រទេស។
ឯកឧត្តម អុិត ដារ៉ា មានប្រសាសន៍ថា រាជរដ្ឋាភិបាលអណត្តិមុនៗ ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន បានដាក់ចេញនូវគោលនយោបាយឈ្នះឈ្នះ ដើម្បីខ្មែរបានឈ្នះទាំងអស់គ្នា បានរួមគ្នាកសាងប្រទេសជាតិឲ្យរីកម្រើន។ បន្ទាប់ពីកម្ពុជាទទួលបានសុខសន្តិភាព រាជរដ្ឋាភិបាលបានបានដាក់ចេញនូវគោលនយោបាយត្រីកោណ និងគោលនយោបាយចតុកោណ ដើម្បីធ្វើយ៉ាងណាឲ្យកម្ពុជាមានការរីកចម្រើននិងស្មើមុខស្មើមាត់ជាមួយបណ្តាប្រទេសនានាលើសាកលលោក។
ជាមួយគ្នានេះក្នុងនាមជាអ្នកបន្តវេន រាជរដ្ឋាភិបាលកម្ពុជា អាណត្តិទី៧ ដែលដឹកនាំដោយសម្តេចធិបតី ក៏បានដាក់ចេញនូវគោលនយោបាយបញ្ចកោណដំណាក់កាលទី១ សំដៅធ្វើយ៉ាងណាឲ្យកម្ពុជាកាន់តែមានការរីកចម្រើនយ៉ាងឆាប់រហ័សលើកគ្រប់វិស័យបន្ថែមទៀត ដើម្បីលើកកម្ពស់ជីវភាពរស់នៅរបស់ពលរដ្ឋឲ្យកាន់តែល្អប្រសើរ។ ជាក់ស្តែងមានសមិទ្ធិផលនានាដែលមាននៅក្នុងឃុំល្វា ស្រុកពួក ខេត្តសៀមរាបនេះ ជាឧទាហរណ៍ស្រាប់។
លោកស៊ិន ចាន់ថុល អភិបាលស្រុកពួក បានឲ្យដឹងថា សាលាឆទាននេះត្រូវបានផ្តួចផ្តើមកសាងដោយ ឯកឧត្តម អុិត ដារ៉ា និងលោកជំទាវ និងសប្បុរសជននៅប្រទេសកាណាដា និងបងប្អូនពលរដ្ឋ និងពុទ្ធបរិស័តក្នុងភូមិ។ ក្នុងនាមអាជ្ញាធរស្រុក និងពលរដ្ឋមូលដ្ឋានបានថ្លែងអរគុណដល់សប្បុរសជនទាំងអស់ ដែលបានផ្តល់ថវិកាក្នុងការទិញដី និងបានកសាងសាលាឆទានមួយនេះឡើង៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
