ក្នុងពិធីបើកសិក្ខាសាលាស្តីពីការផ្សព្វផ្សាយរបាយការណ៍ជាតិ ស្តីពីការអនុវត្តកតិការសញ្ញាអន្តរជាតិ ស្តីពីសិទ្ធិពលរដ្ឋ និងនយោបាយ ឆ្នាំ២០១៩ នាព្រឹកថ្ងៃទី៥ ខែមេសា ឆ្នាំ២០២៤ នៅក្រុងសៀមរាប អនុប្រធានគណៈកម្មាធិការសិទ្ធិមនុស្សកម្ពុជា ឯកឧត្តម អ៊ិត រ៉ាឌី ថ្លែងថា ប្រទេសកម្ពុជាមានឆន្ទៈខ្ពស់ក្នុងការគោរព និងអនុវត្តតាមគោលការណ៍ជាមូលដ្ឋាននៃសិទ្ធិមនុស្សជាសកល។
ឯកឧត្តម អ៊ិត រ៉ាឌី មានប្រសាសន៍ថា រដ្ឋធម្មនុញ្ញ ដែលជាច្បាប់កម្ពុជារបស់កម្ពុជា បានកំណត់យ៉ាងច្បាស់នូវស្មារតីជាតិ និងមានឆន្ទៈខ្ពស់ក្នុងការគោរព និងអនុវត្តតាមគោលការណ៍ជាមូលដ្ឋាននៃសិទ្ធិមនុស្ស ដោយបានបញ្ជាក់ច្បាស់តាមរយៈមាត្រា៣១ នៃរដ្ឋធម្មនុញ្ញរបស់កម្ពុជាយើង។ ដូច្នេះយើងទាំងអស់គ្នាត្រូវព្យាយាមស្វែងយល់នៅក្នុងរដ្ឋធម្មនុញ្ញឲ្យបានច្បាស់លាស់អំពីសិទ្ធិ និងករណីកិច្ចរបស់ប្រជាពលរដ្ឋ ព្រោះវាជារឿងរបស់យើងគ្រប់គ្នាដែលត្រូវតែយល់ដឹង។
ឯកឧត្តម អ៊ិត រ៉ាឌី បន្តថា យោងតាមស្មារតីនៃរដ្ឋធម្មនុញ្ញនេះ បានធ្វើឲ្យកម្ពុជាក្លាយជាប្រទេសដែលឈានមុខគេក្នុងតំបន់ក្នុងការទទួលយកបទដ្ឋានសិទ្ធិមនុស្សអន្តរជាតិចំនួន៨ ក្នុងចំណោមបទដ្ឋានសិទ្ធិមនុស្សជាមូលដ្ឋានចំនួន៩ របស់អង្គការសហប្រជាជាតិ។ នៅចំពោះមុខកម្ពុជាក៏កំពុងពិចារណាទទួលយក ឬយ៉ាងណា នូវបទដ្ឋានជាមួលដ្ឋានសិទ្ធិមនុស្សដែលនៅសល់ផងដែរ។ ការគោរពសិទ្ធិមនុស្សជារឿងសំខាន់បំផុត ព្រោះការដែលមិនមានការគោរពសិទ្ធិមនុស្សនេះ បានធ្វើឲ្យពិភពលោកបានជួបនូវសង្គ្រាមលោកចំនួន ២លើក និងការរំលោភបំពានសិទ្ធិមនុស្សផ្សេងៗទៀត រហូតមកដល់បច្ចុប្បន្ន។
ឯកឧត្តម បានបញ្ជាក់ថា សិក្ខាសាលាស្តីពីការផ្សព្វផ្សាយរបាយការណ៍ជាតិស្តីពីការអនុវត្តកតិការសញ្ញាអន្តរជាតិ ស្តីពីសិទ្ធិពលរដ្ឋ និងនយោបាយ ឆ្នាំ២០១៩ ជារបាយការណ៍ដែលត្រូវបានរាជរដ្ឋាភិបាលអនុម័ត និងបញ្ជូនទៅកាន់អង្គការសហប្រជាជាតិ ដើម្បីបង្ហាញស្ថានភាពសិទ្ធិមនុស្សរបស់ប្រទេសកម្ពុជាឲ្យពិភពលោកបានដឹង ដែលកន្លងមកកម្ពុជា បានធ្វើរបាយការណ៍នេះ ជូនអង្គការសហប្រជាជាតិចំនួនបីដងរួចមកហើយ។ ចំពោះរបាយការណ៍ជាតិស្តីពីការអនុវត្តកតិការសញ្ញាអន្តរជាតិ ស្តីពីសិទ្ធិពលរដ្ឋ និងនយោបាយនេះមានតម្លៃយ៉ាងធំធេងចំពោះកម្ពុជា ព្រោះថា អ្វីៗទាំងអស់ដែលមាននៅក្នុងរបាយការណ៍វាជាវិធានការណ៍របស់រាជរដ្ឋាភិបាល ទាំងផ្នែកច្បាប់ ទាំងផ្នែករដ្ឋបាល ទាំងផ្នែកតុលាការ ហើយវិធានការណ៍ទាំងអស់នោះវាជាការដោះស្រាយនូវបញ្ហាពាក់ព័ន្ធនឹងស្ថានភាពជីវភាពរស់នៅរបស់យើងទាំងអស់គ្នា៕
អត្ថបទ និងរូបភាព៖ លោក ជា ស្រស់, ស៊ាន សុផាត
កែសម្រួល៖ លោក អ៊ុន ណារាជ្យ
