គណៈគ្រប់គ្រងសាលា លោកគ្រូអ្នកគ្រូ និងសិស្សានុសិស្សនៃវិទ្យាល័យហ៊ុន សែន ស្វាយធំ ស្រុកប្រាសាទបាគង ខេត្តសៀមរាប រួមគ្នារៀបចំកម្មវិធី “សង្ក្រាន្ដវិទ្យាល័យ” រយៈពេល២ថ្ងៃ គឺនៅថ្ងៃទី៤ និងទី៥ ខែមេសា ឆ្នាំ២០២៤នេះ ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ និងដើម្បីជាការជំរុញដល់យុវជនជំនាន់ក្រោយចេះចូលរួមក្នុងការអភិរក្សប្រពៃណីវប្បធម៌ ប្រពៃណី ទំនៀមទំលាប់ខ្មែរ ព្រមទាំងបង្កើតការការជួបជុំសប្បាយរីករាយដល់សិស្សានុសិស្ស និងប្រជាពលរដ្ឋផងដែរ។
លោកគ្រូ កៃ គង់ ជាអ្នករៀបចំកកម្មវិធី បានឱ្យដឹងថា ការរៀបចំ“សង្ក្រាន្ដវិទ្យាល័យ” គឺក្នុងគោលបំណងប្រមូលផ្ដុំប្រពៃណីវប្បធម៌ និងអរិយធម៌ខ្មែរ បង្ហាញដល់យុវជនប្រជាពរដ្ឋឱ្យបានស្គាល់កាន់តែច្បាស់នូវវប្បធម៌របស់ខ្លួន និងដើម្បីអភិរក្សនិងថែរក្សាទុកឱ្យគង់វង្ស។ កម្មវិធីនេះមានការបង្ហាញនូវល្បែងប្រជាប្រិយខ្មែរជាច្រើនទម្រង់ ដូចជាល្បែងវាយក្បម ទាញព្រាត់ បោះអង្គុយ រាំវង្ស រាំក្បាច់ សារ៉ាវាន់ ឡាំឡាវជាដើម ដែលជាប្រពៃណីវប្បធម៌របស់ខ្មែរ រួមនឹងកម្មវិធីជាច្រើនទៀត។
លោក ណាំង ហូន នាយកវិទ្យាល័យ ហ៊ុន សែន ស្វាយធំ មានប្រសាសន៍ថា ការបង្កើតកម្មវិធី“សង្ក្រាន្ដវិទ្យាល័យ” នេះឡើង គឺដោយសារមានការគាំទ្រពីអាជ្ញាធរមូលដ្ឋាន សិស្សានុសិស្ស និងអាណាព្យាបាលសិស្ស ក្រោមម្លប់សន្ដិភាព។ ការគាស់រំលើងនូវប្រពៃណីវប្បធម៌ខ្មែរបង្ហាញដល់សាធារណៈជននេះ គឺពិតជាធ្វើឱ្យពួកគាត់យល់ដឹងកាន់តែច្បាស់ និងគាំទ្រយ៉ាងខ្លាំងនៅឆ្នាំក្រោយៗទៀត ព្រោះសង្ក្រាន្ដវិទ្យាល័យនេះ បានជួបជុំជាមួយអតីតសិស្សដែលធ្លាប់រៀននៅសាលាជាមួយគ្នា ជាពិសេសបានចូលរួមគាំគ្រនូវវប្បធម៌ប្រពៃណីខ្មែរដែលមានតាំងពីអតីតាកាល៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
