នៅព្រឹកថ្ងៃទី២២ ខែមេសា ឆ្នាំ២០២៤នេះ ការដេញថ្លៃគម្រោងសាងសង់ផ្លូវបេតុងអាមេ ១ខ្សែ ក្នុងសង្កាត់ស្លក្រាម ក្រុងបានបញ្ចប់ប្រកបដោយភាពជោគជ័យដោយមានការចូលរួមពីមន្រ្តីជំនាញបច្ចេកទេសសាលាខេត្ត គណៈកម្មការលទ្ធកម្មសង្កាត់ ក្រុមហ៊ុនម៉ៅការ រួមនឹងអ្នកពាក់ព័ន្ធផ្សេងទៀតផងដែរ។
ប្រធានគណៈកម្មការលទ្ធកម្មសង្កាត់ស្លក្រាម លោក ខៀវ សត បានឲ្យដឹងថា សម្រាប់គម្រោងមូលនិធិសង្កាត់ឆ្នាំ២០២៤នេះ រដ្ឋបាលសង្កាត់ស្លក្រាម ក្រុងសៀមរាប គឺបានដាក់ដេញថ្លៃគម្រោងសាងសង់ផ្លូវបេតុងអាមេ ១ខ្សែ ប្រវែង ៤០០ម៉ែត្រ ទទឹង ៥ម៉ែត្រ កម្រាស់បេតុង ០.១៥ម៉ែត្រ ដែលនឹងត្រូវសាងសង់នៅក្នុងភូមិចុងកៅស៊ូ ស្ថិតក្នុងតម្លៃប៉ាន់ស្មាន ២៦៥.៧៩៥.៣៨១ រៀល ដោយមានក្រុមហ៊ុនដាក់សំណើរចំនួន ៨ក្រុមហ៊ុន និងជាលទ្ធផលបានទៅលើក្រុមហ៊ុន ម៉ូវ ស៊ីថាយ ក្នុងតម្លៃ ១១៣.៨០០.០០០រៀល។
លោក ខៀវ សត ចៅសង្កាត់ស្លក្រាម បានបញ្ជាក់ថា គណៈកម្មការលទ្ធកម្មសង្កាត់ស្លក្រាមទាំងអស់ បានអនុវត្តនីតិវិធីនៃកិច្ចលទ្ធកម្ម ចាប់តាំងពីពេលដំណើរទទួលសំណើរការរហូតដល់ការប្រកាសលទ្ធផលនៃការដេញថ្លៃ គឺពុំមានភាពមិនប្រក្រតីណាមួយឡើយ នៅក្នុងបរិវេណ និងទីកន្លែងនៃកិច្ចប្រជុំបើកសំណើដេញថ្លៃនេះ ជាក់ស្តែង គឺពុំមានការរារាំង ការបង្ខិតបង្ខំដល់អ្នកទទួលការឬក្រុមហ៊ុន ដែលបានចូលរួមដាក់សំណើរដេញថ្លៃនោះដែរ។ ដោយឡែកចំពោះក្រុមហ៊ុនដែលទទួលបានការម៉ៅការទៅលើគម្រោងនេះ លោកចៅសង្កាត់ស្លក្រាមក៏បានណែនាំឲ្យអនុវត្តឲ្យបានត្រឹមត្រូវទៅតាមក្បួនច្បាប់ ស្តង់ដាបច្ចេកទេសនៃការសាងសង់ ពន្លឿនការសាង់សង់ឲ្យបានលឿន ពិសេសត្រូវសាងសង់ឲ្យទទួលបានលទ្ធផលផ្លូវប្រកបដោយគុណភាព ជៀសវាងការសាងសង់យកតែបរិមាណ ដែលធ្វើឲ្យផ្លូវងាយនឹងខូចជាដើម។
ក្រោយបញ្ចប់ការដេញថ្លៃ លោក ម៉ូវ ស៊ីថាយ ដែលទទួលបានការម៉ៅការចំពោះគម្រោងសាងសង់ផ្លូវខាងលើ ក៏បានធ្វើការប្ដេជ្ញាចិត្តដោយសន្យាថា នឹងសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
