នៅរសៀលថ្ងៃទី២២ ខែមេសា ឆ្នាំ២០២៤ ព្រះវិបុលសត្ថា រី សាត ព្រះចៅអធិការវត្តកេសរារាម ក្រុងសៀមរាប រួមនឹងព្រះចៅអធិការវត្តមួយចំនួន បានសហការជាមួយអាជ្ញាធរសង្កាត់ស្វាយដង្គំ ក្រុងសៀមរាប បាននាំយកអំណោយជាសម្ភារៈប្រើប្រាស់ ស្បៀងអាហារ និងថវិកាមួយចំនួនទៀត ដែលទទួលបានពីសប្បុរសជននានា នាំយកមកចែកជូនដល់គ្រួសារប្រជាពលរដ្ឋក្រីក្រ និងរងគ្រោះដោយសារអគ្គិភ័យចំនួន ៥គ្រួសារ ដើម្បីជាការជួយសម្រួលដល់ជីវភាពប្រចាំថ្ងៃ ស្ថិតក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប។
មានសង្ឃដិកាក្នុងឱកាសនោះ ព្រះវិបុលសត្ថា រី សាត បានបង្ហាញនូវការសោកស្តាយចំពោះគ្រោះថ្នាក់ដោយសារអគ្គិភ័យ បណ្តាឱ្យខូចខាតបាត់បង់ទ្រព្យសម្បត្តិដែលខំរក និងសន្សំទុកជាយូរមកហើយ ជាពិសេសបាត់បង់ឯកសារចាំបាច់ផ្ទាល់ខ្លួនដូចជាសំបុត្រកំណើត អត្តសញ្ញាប័ណ្ណ និងប្លង់ដីជាដើម។ ចំពោះសម្ភារៈប្រើប្រាស់ ស្បៀងអាហារ និងថវិកា ដែលបាននាំយកមកផ្តល់ជូននាពេលនេះ គឺជាការចែករំលែកជួយគ្នាក្នុងគ្រាលំបាកទៅតាមលទ្ឋភាពដែលក្រុមព្រះសង្ឃមាន ព្រោះថាជារឿយៗ ព្រះសង្ឃតែងតែបានចូលរួមក្នុងសកម្មភាពសង្គមជាច្រើន តាមរយៈសន្សំសំចៃ បែងចែកទុកដាក់នូវទេយ្យទានដែលទទួលបានពីការប្រគេនរបស់ញាតិញោម សម្រាប់ជួយទំនុកបំរុង ឧបត្ថម្ភដល់គ្រួសារប្រជាពលរដ្ឋណាខ្វះខាតជួបការលំបាកក្នុងជីវភាព និងមួយផ្នែកសម្រាប់ជួយការងារសង្គម ដែលនេះជាសង្គហៈសង្គ្រោះ និងជាតួនាទីដែលព្រះសង្ឃត្រូវបំពេញក្រៅពីការស្វាធ្យាយព្រះធម៌ និងការងារស្នូលក្នុងអារាម។
បើតាមលោក ហ៊ា ហាវ ចៅសង្កាត់ស្វាយដង្គំ បានឲ្យដឹងថា ករណីអគ្គីភ័យខាងលើនេះបណ្តាលមកពីឆ្លងចរន្រអគ្គិសនី កើតឡើងកាលពីថ្ងៃទី១៦ ខែមេសា ឆ្នាំ២០២៤កន្លងទៅ ដោយបណ្តាលឱ្យឆាប់ឆេះលំនៅឋានពលរដ្ឋ ៣ខ្នង។ ក្នុងឱកាសនោះ លោកក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ទោះជារដូវប្រាំង ឬរដូវវស្សាក្តី ត្រូវប្រុងប្រយ័ត្ន ការពារជាប់ជាប្រចាំនូវបញ្ហាអគ្គីភ័យ និងគ្រោះថ្នាក់ជាយថាហេតុផ្សេងៗ ដោយត្រូវពិនិត្យខ្សែបណ្តាញអគ្គីសនីក្នុងផ្ទះក្រែងមានការដាច់រលាត់ដោយកណ្តុរកកេរ ឬគៀបជាប់នឹងអ្វីមួយ ដែលយូរៗវានឹងបង្កទៅជាការឆ្លងចរន្ត ហើយមុននឹងចាកចេញពីផ្ទះក៍ត្រូវពិនិត្យឱ្យច្បាស់នូវភ្លើងចង្ក្រាន្ត ភ្លើងធូប ជាដើម ត្រូវពន្លត់ឱ្យអស់មុននឹងចាកចេញ។ ជាមួយនោះលោកក៏បានជំរុញដល់មេភូមិឱ្យស្រង់ចំនួនឯកសារដែលចាំបាច់ ដើម្បីមន្ត្រីអត្រានុកូលដ្ឋានសង្កាត់ផ្តល់ជូននូវឯកសារចាំបាច់ទំាងនោះជូនដល់ក្រុមគ្រួសាររងគ្រោះផងដែរ។
សូមជម្រាបថា អំណោយដែលបានផ្ដល់ជូននាពេលនេះ សម្រាប់គ្រួសាររងគ្រោះដោយសារអគ្គិភ័យ ៣គ្រួសារ មួយគ្រួសារទទួឡបាន៖ អង្ករ ៥០គីឡូក្រាម, មី៤កេស, ទឹកសុទ្ធ៤យួរ, ភេសជ្ជៈ១កេស, ទឹកស៊ីអ៊ីវ២យួរ, ទឹកត្រី២យួរ និងថវិកា ៤០ម៉ឺនរៀល។ ចំណែកគ្រួសារក្រីក្រ ២គ្រួសារទៀត មួយគ្រួសារទទួលបានថវិកា ២០ម៉ឺរៀល និងគ្រឿងឧបភោគបរិភោគមួយចំនួនទៀត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
