នៅថ្ងៃទី២៣ ខែមេសា ឆ្នាំ២០២៤នេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន តំណាងឯកឧត្តម សន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានដាក់សម្ពោធជាផ្លូវការ នូវកម្មវិធីប្រើប្រាស់លើទូរស័ព្ទ មានឈ្មោះថា NoDrug ដែលប្រជាពលរដ្ឋអាចទាញយកបានដោយមិនគិតថ្លៃ នៅលើplaystore និង appstore។
ការបង្កើតកម្មវិធី NoDrug នេះ មានគោលបំណងទី១ គឺ ផ្ដល់ការអប់រំគោលមួយ ដល់ប្រជាពលរដ្ឋ ពាក់ព័ន្ធទៅនឹងករណីបទល្មើសគ្រឿងញៀននានា និងទី២ ផ្ដល់លទ្ធភាពដល់ប្រជាពលរដ្ឋ រាយការណ៍ដោយផ្ទាល់ សេរី និងដោយសម្ងាត់ ដល់សមត្ថកិច្ចយ៉ាងឆាប់រហ័ស តាមប្រព័ន្ធអនឡាញ។
ថ្លែងក្នុងឱកាសនោះ ឯកឧត្តម នេត្រ ភក្ត្រា លើកឡើងថា គ្រឿងញៀន គឺជាបញ្ហាសកល និងមានភាពស្មុគស្មាញ ដែលមកដល់ពេលបច្ចុប្បន្ន បទល្មើសគ្រឿងញៀន នៅតែជាក្ដីបារម្ភ និងបន្តបង្ក្រាប ដោយមិនទាន់មថមថយនៅឡើយ។ ឯកឧត្តម បន្ថែមថា គ្រឿងញៀន បានបង្កឲ្យបាត់បង់សណ្ដាប់ធ្នាប់ និងសន្តិសុខសង្គម ព្រមទាំងរារាំងដល់ការអភិវឌ្ឍនានាផងដែរ។ ដូច្នេះ ការដាក់ឲ្យដំណើរការកម្មវិធីទូរស័ព្ទ NoDrug នេះគឺជាការពង្រឹង និងពង្រីកការយល់ដឹងរបស់ប្រជាជន ជាពិសេសចូលរួមជាមួយអាជ្ញាធរមូលដ្ឋាន តាមរយៈការរាយការណ៍ពីករណីគ្រឿងញៀនខុសច្បាប់ដោយផ្ទាល់ នៅលើកម្មវិធីនេះ។
ក្នុងនាមប្រធានគណៈកម្មការទទួលបន្ទុកផ្សព្វផ្សាយអប់រំនៃគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀន ឯកឧត្តម នេត្រ ភក្ត្រា បញ្ជាក់បន្ថែមដែរថា តាមរយៈគោលការណ៍រួម នៃផែនការប្រយុទ្ធប្រឆាំងគ្រឿងញៀនខុសច្បាប់ លើកទី៩ របស់ប្រមុខរាជរដ្ឋាភិបាលកម្ពុជា ដឹកនាំដោយសម្ដេចធិបតី ហ៊ុន ម៉ាណែត គឺបន្តចាត់តាំង អនុវត្តន៍ ឲ្យមានប្រសិទ្ធភាព លើច្បាប់ត្រួតពិនិត្យគ្រឿងញៀន និងបទបញ្ជាលេខ០១ បប ចុះថ្ងៃទី១ ខែកុម្ភៈ ឆ្នាំ២០១៦ របស់រាជរដ្ឋាភិបាល ស្ដីពីការប្រយុទ្ធប្រឆាំងគ្រឿងញៀនខុសច្បាប់ ដោយខិតខំចាត់វិធានការបង្ក្រាប ទប់ស្កាត់និងបញ្ជ្រាបឲ្យបាន មិនឲ្យប្រទេសកម្ពុជាក្លាយទៅជាគោលដៅនៃប្រព្រឹត្តបទល្មើសគ្រឿងញៀន និងមិនឲ្យគ្រឿងញៀនបង្កឥទ្ធិពលញាំញី បំផ្លិចបំផ្លាញសង្គមជាតិ ជាពិសេស កិច្ចខិតខំប្រឹងប្រែង អនុវត្តន៍ឲ្យបាសម្រេចនូវការប្ដេជ្ញាចិត្តរបស់រាជរដ្ឋាភិបាល ធ្វើយ៉ាងណាឲ្យប្រទេសកម្ពុជាគ្មានគ្រឿងញៀន។
ឯកឧត្តម នេត្រ ភក្ត្រា ក៏បានអំពាវនាវដល់អាជ្ញាធរពាក់ព័ន្ធ និងប្រជាពលរដ្ឋទាំងអស់ សូមចូលរួមអនុវត្តន៍នូវទិសស្លោក «៣កុំ ១រាយការណ៍» របស់រាជរដ្ឋាភិបាល គឺកុំទី១ កុំពាក់ព័ន្ធ មានន័យថា កុំជួញដូរ ចែកចាយ កុំធ្វើជាខ្នងបង្អែក កុំឃុបឃិត និងកុំប្រើប្រាស់គ្រឿងញៀន។ កុំទី២ កុំអន្តរាគមន៍ មានន័យថា កុំរារាំងការអនុវត្តច្បាប់ ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឬមិត្តភ័ក្តក៏ដោយ។ កុំទី៣ កុំលើកលែង មានន័យថា កុំបន្ធូរបន្ថយ ការអនុវត្តច្បាប់ចំពោះឧក្រិដ្ឋជនគ្រឿងញៀន។
អត្ថបទ : សេង ផល្លី
