ក្នុងឱកាសដាក់ឱ្យដំណើរការគម្រោង “ទំនាក់ទំនងយុវវ័យ” នៅវិទ្យាល័យចំណេះទូទៅ និងបច្ចេកទេសពួក ខេត្ដសៀមរាប កាលពីរសៀលថ្ងៃទី២២ ខែមេសា ឆ្នាំ២០២៤នេះ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ ថ្លែងថា បច្ចុប្បន្នមានយុវវ័យគំរូរជាច្រើនតែងតែចែកចាយនូវព័ត៌មាន និងមាតិកាល្អៗ ដែលវាគឺជាការផ្តល់នូវចំណេះដឹង និងលើកទឹកចិត្តយុវវ័យផ្សេងទៀត ឱ្យមានក្តីសង្ឃឹម និងចេះអភិវឌ្ឍន៍ចំណេះដឹងពីបណ្តាញសង្គមនានា ដែលធ្វើឱ្យប្រជាជនយើងបានស្គាល់ និងយល់ដឹងពីសកលោកទាំងមូលផងដែរ។
លោកជំទាវ ជូ ប៊ុនអេង មានប្រសាសន៍ថា កន្លងមកយុវវ័យក្នុងសហគមន៍មួយចំនួន តែងតែមានការបោះបង់ការសិក្សា ដើម្បីស្វែងរកការងារ និងខ្លះទៀតក៏បានចំណាកស្រុកទៅរកការងារដែលខ្លួនមិនមានចំណេះដឹង និងវិជ្ជាជីវៈច្បាស់លាស់ដោយសារកត្តាជីវភាពរបស់គ្រួសារ ហើយការធ្វើចំណាកស្រុកអាចមិនមានលក្ខណៈស្របច្បាប់ ដោយសារពួកគាត់អាចមិនទាន់យល់ច្បាស់លាស់ ហើយការផ្សព្វផ្សាយក៏មិនបានទូលំទូលាយនៅក្នុងសហគមន៍ដែលពួកគេកំពុងរស់នៅ ជាពិសេសនៅតាមសាសារៀនទៀតផង។ ទាំងអស់នេះជារបាំង ធ្វើឲ្យការទទួលនូវព័ត៌មានទាំងនេះរបស់យុវវ័យនៅមានកម្រិត ដែលនាំឲ្យមានផលពិបាកដល់សង្គមគ្រួសារជំនាន់ក្រោយ ដែលសំបូរទៅដោយកង្វះការអប់រំ សេដ្ឋកិច្ចរស់នៅអន់ខ្សោយ និងមានកត្តាជួញដូរមនុស្សកាន់តែច្រើនរបស់ពលករចំណាកស្រុក។
លោកជំទាវ រដ្ឋលេខាធិការ មានប្រសាសន៍ទៀតថា ចំពោះការដាក់ឱ្យដំណើរការគម្រោង “ទំនាក់ទំនងយុវវ័យ” នៅខេត្ដសៀមរាប នាពេលនេះ រៀបចំដោយអង្គការការីតាស ស្វីស និងអង្គការសម្រេចសុបិនកុមារកម្ពុជា ក្នុងគោលបំណងស្រាវជ្រាវមុនយុទ្ធនាការឃោសនាផ្សព្វផ្សាយព័ត៌មាន ការបង្កើតឡើងនូវមាតិកាដែលមានលក្ខណៈច្នៃប្រឌិត និងធ្វើការសាកល្បងនូវវិធីសាស្ត្រក្នុងការបណ្តុះបណ្តាលជំនាញ មាតិកា ដើម្បីធ្វើឱ្យមានសុវត្ថិភាពនៃការធ្វើចំណាកស្រុក ការអប់រំ និងវគ្គបណ្តុះបណ្តាលជំនាញវិជ្ជាជីវៈទៅដល់យុវវ័យ។ បច្ចុប្បន្នអង្គការការីតាស ស្វីស និងអង្គការសម្រេចសុបិនកុមារកម្ពុជា កំពុងធ្វើការរួមគ្នាទៅលើតម្រោង ការទំនាក់ទំនងយុវវ័យ ដើម្បីស្វែងរកវិធីដែលល្អបំផុតដើម្បីបង្ក្រាប និងចូលរួមជាមួយយុវវ័យនៅក្នុង និងក្រៅសាលាជាមួយនឹងសកម្មភាពយល់ដឹងអំពីការធ្វើចំណាកស្រុកដោយសុវត្ថិភាព និងទាក់ទាញការយកចិត្តទុកដាក់របស់ពួកគេទៅលើសារៈសំខាន់នៃការអប់រំ។ គម្រោងសាកល្បងនេះ នឹងគាំទ្រយុវវ័យឲ្យបង្កើតមាតិកា អំពីការលើកកម្ពស់ការចំណាកស្រុកដោយសុវត្ថិភាព ការអប់រំ និងការរួបរួមសង្គមក្នុងចំណោមយុវវ័យ។
លោកជំទាវក៏ប្តេជ្ញាថា នឹងជួយគាំទ្រដល់ប្អូនៗយុវវ័យដែលកំពុងសិក្សា ក៏ដូចដែលបានបោះបង់ការសិក្សា បន្តនូវកិច្ចសហការនិងធ្វើសកម្មភាពចូល រួមផ្សព្វផ្សាយនូវព័ត៌មានដ៏មានប្រយោជន៍ទាក់ទងនឹងតម្លៃនៃការអប់រំ វគ្គបណ្តុះបណ្តាលជំនាញវិជ្ជាជីវៈ និងការធ្វើចំណាកស្រុកដោយសុវត្តភាពរបស់មិត្តយុវវ័យរបស់យើង តាមរយៈសកម្មភាពក្នុងសហគមន៍ក៏ដូចជាបណ្តាញសង្គម នានា ហើយក៏សង្ឃឹមយ៉ាងមុតមាំថាប្អូនៗនឹងចូលរួមរៀនសូត្រពីគម្រោងទំនាក់ទំនងយុវវ័យនេះដើម្បីឱ្យទទួលបាន ចំណេះដឹងក្នុងការចែករំលែកបន្តដល់មិត្តភក្តិ និងសហគមន៍របស់យើង៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
