មន្ទីរពេទ្យកុមារអង្គរខេត្តសៀមរាប បានទទួលអំណោយជាថវិកាចំនួន ៣០លានរៀល ពីធនាគារហត្ថា សម្រាប់ប្រើប្រាស់ក្នុងសកម្មភាពជួយសង្គ្រោះជីវិតកុមារកម្ពុជាជាច្រើននាក់ ដែលកំពុងសម្រាកព្យាបាលជំងឺនៅក្នុងមន្ទីរនេះជារៀងរាល់ថ្ងៃ។
ក្នុងឱកាសនាំយកអំណោយជូនមន្ទីរពេទ្យកុមារអង្គរ និងចុះសួរសុខទុក្ខអ្នកជំងឺដែលកំពុងសម្រាកព្យាបាល នាព្រឹកថ្ងៃទី២៦ ខែមេសា ឆ្នាំ២០២៤នេះ លោក Wee Mun Seng អនុប្រធានអគ្គនាយក នៃធនាគារហត្ថា បានថ្លែងនូវការអរគុណ និងកោតសរសើរដល់ថ្នាក់ដឹកនាំ បុគ្គលិកនៃមន្ទីរពេទ្យទាំងអស់ ព្រោះថាមន្ទីរពេទ្យមួយនេះ ពិតជាមានគុណូបការៈធំធេងណាស់ក្នុងការចូលរួមបំពេញបេសកកម្មផ្តល់សេវាថែទាំសុខភាពដ៏មានសារៈសំខាន់ដល់កុមារនៅក្នុងប្រទេសកម្ពុជា។ ហើយចំពោះការចូលរួមប្រាក់ឧបត្ថម្ភថវិកានាពេលនេះដែរ គឺជាការរួមចំណែកដល់មន្ទីរពេទ្យកុមារអង្គរ ក្នុងការបំពេញបេសកកម្មផ្តល់សេវាថែទាំសង្រ្គោះជីវិត សេវាវះកាត់ផ្សេងៗ និងសេវាស្តារនីតិសម្បទាដទៃផ្សេងទៀត សម្រាប់កុមារកម្ពុជាដែលកំពុងត្រូវការសេវាទាំងអស់នេះ។
ក្នុងនាមថ្នាក់ដឹកនាំ គ្រូពេទ្យ និងបុគ្គលិកទាំងអស់របស់មន្ទីរពេទ្យកុមារអង្គរ លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យ បានសម្តែងនូវក្តីសោមនស្សរីករាយ និងមោទនភាពបំផុត ដែលបានទទួលការឧបត្ថម្ភគាំទ្រពីសប្បុរសជន ក្នុងការជួយលើកស្ទួយដល់វិស័យសុខាភិបាល ដើម្បីសុខុមាលភាពកុមារកម្ពុជាឲ្យកាន់តែប្រសើរឡើង ស្របពេលដែលមន្ទីរពេទ្យនេះ កំពុងដំណើរការជួយសង្គ្រោះសុខភាព និងអាយុជីវិតកុមារកម្ពុជា ពីជំងឺផ្សេងៗដោយឥតគិតថ្លៃ ហើយជារឿយៗតែងតែជួបបញ្ហាមួយចំនួនទៅនឹងហិរញ្ញវត្ថុ សម្រាប់ប្រើប្រាស់ក្នុងការផ្តល់សេវាព្យាបាល និងថែទាំជំងឺ។
ព័ត៌មានជាតិ ថ្មីៗ
លោកបានឲ្យដឹងថា ទស្សនៈវិស័យរបស់មន្ទីរពេទ្យកុមារអង្គរ គឺផ្តល់សេវាព្យាបាល និងការថែទាំប្រកបដោយគុណភាព និងផ្តល់ភាពកក់ក្តៅដល់អ្នកជំងឺដែលជាកុមារ ព្រោះពួកគេ គឺជាអនាគតដ៏រឹងមាំនៃប្រទេសកម្ពុជាយើង ខណៈបច្ចុប្បន្នមន្ទីរពេទ្យទទួលអ្នកជំងឺប្រមាណពី៥០០ទៅ ៦០០នាក់ក្នុង១ថ្ងៃៗ ហើយក្នុងមួយឆ្នាំៗ មន្ទីរពេទ្យត្រូវការចំណាយថវិកាប្រមាណ ៦លានដុល្លារអាមេរិក ដើម្បីពិនិត្យ ព្យាបាល និងថែទាំកុមារ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
