នៅរសៀលថ្ងៃទី៣០ខែមេសាឆ្នាំ២០២៤ ឯកឧត្តម ហ៊ុន ម៉ានី ប្រធានសហភាពសហព័ន្ឋយុវជនកម្ពុជា បានអញ្ជើញជួបសំណេះសំណាលជាមួយសមាជិក សមាជិកា ក្រុមការងារយុវជនសហភាពសហព័ន្ឋយុវជនកម្ពុជាប្រចាំសាកលវិទ្យាល័យ សៅស៍អ៊ីសថ៍អេយសៀខេត្តសៀមរាប នៅសណ្ឋាគារសុខាសៀមរាប ដោយមានវត្តមានអញ្ជើញចូលរួមពីថ្នាក់ដឹកនាំជាន់ខ្ពស់ សហភាពសហព័ន្ឋយុវជនកម្ពុជា និងសមាជិក សមាជិកា ក្រុមការងារយុវជន សហភាពសហព័ន្ឋយុវជនកម្ពុជាប្រចាំសាកលវិទ្យាល័យ សៅស៍អ៊ីសថ៍អេយសៀ ចំនួនប្រមាណជា២៥០០នាក់។
លោក សៀន សុវណ្ណា សាកលវិទ្យាធិការសកលវិទ្យាល័យ មានប្រសាសន៍ថា៖ពិធីសំណេះសំណាលនេះធ្វើឡើងដើម្បីផ្តល់ឱកាសឱ្យសមាជិក សមាជិកា ក្រុមការងារយុវជន សហភាពសហព័ន្ឋយុវជនកម្ពុជាប្រចាំសាកលវិទ្យាល័យ សៅស៍អ៊ីសថ៍អេយសៀបានយល់ច្បាស់អំពីផែនការយុទ្ឋសាស្ត្រ បទបញ្ជាផ្ទៃក្នុងរបស់សហភាពសហព័ន្ឋយុវជនកម្ពុជា ស្គាល់ពីតម្លៃនៃសន្តិភាព ការអភិវឌកឍន៍ប្រទេសនិងសមិទ្ឋផលនានារបស់រាជរដ្ឋាភិបាលកម្ពុជា។ លោក សៀន សុវណ្ណា បញ្ជាក់ថា៖សាកលវិទ្យាល័យ សៅស៍អ៊ីសថ៍អេយសៀខេត្តជាគ្រឺះស្ថានឧត្តមសិក្សាឯកជនបានបង្កើតឡើងតាមអនុក្រិតនៅខែកក្កដាឆ្នាំ២០២៦ដើម្បីបណ្តុះបណ្តាលនិស្សិតថ្នាក់បរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់និងថ្នាក់បណ្ឌិតដែលមានការទទួលស្គាល់គុណភាពអប់រំថ្នាក់ជាតិ(ACC)ជាសមាជិកជាស្ថាប័នទទួលស្គាល់គុណភាពអប់រំអាស៊ាន(AUN-QA)និងមានការគាំទ្រពីអ្នកសិក្សាគ្រប់មជ្ឈដ្ឋាននៅកម្ពុជា។
ឯកឧត្តម ហ៊ុន ម៉ានី ប្រធានសហភាពសហព័ន្ឋយុវជនកម្ពុជា បានថ្លែងកោតសរសើរ និងវាយតម្លៃខ្ពស់នូវសមិទ្ឋិផលរបស់ក្រុមការងារយុវជន សហភាពសហព័ន្ឋយុវជនកម្ពុជាប្រចាំសាកលវិទ្យាល័យ សៅស៍អ៊ីសថ៍អេយសៀដែលសម្រេចបានជាបន្តបន្ទាប់នាពេលកន្លងមក ដែលជាការសបញ្ជាក់ពីការប្តេជ្ញាចិត្តនៃការចូលរួមគាំទ្រនិងសហការរាល់សកម្មភាពនានារបស់សហភាពសហព័ន្ឋយុវជនកម្ពុជា។ឯកឧត្តម មានប្រសាសន៍ថា៖ជាការពិតណាស់ ចាប់តាំងពីក្រុមការងារយុវជន សហភាពសហព័ន្ឋយុវជនកម្ពុជាប្រចាំសាកលវិទ្យាល័យ សៅស៍អ៊ីសថ៍អេយសៀ ដែលបានបង្កើតឡើងក្រោមចំណុះក្រុមប្រឹក្សាយុវជនគ្រឺះស្ថានឧត្តមសិក្សានៃ សសយក កាលពីខែតុលាឆ្នាំ២០២១ ។ឯកឧត្តម បញ្ជាក់ថា៖ការជួបជុំសំណេះសំណាលនាពលនេះជាលើកទី២ដែលយើងបានជួបជុំគ្នាក្នុងនាមជាក្រុមគ្រួសារសហភាពសហព័ន្ឋយុវជនកម្ពុជាតែមួយឯកសណ្ឋានតែមួយ ដែលយើងនឹងរួមគ្នាសម្រេចនូវបេសកកម្ម និងបុព្វហេតុ សសយក និងក៏ជាបុព្វហេតុរបស់សាកលវិទ្យាល័យ សៅស៍អ៊ីសថ៍អេយសៀផងដែរ។គឺការបណ្តុះបណ្តាលយុវជនជំនាន់ក្រោយ ជូនជាតិនិងមាតុភូមិយើងព្រមទាំងបន្តពង្រឹងទំនាក់ទំនងភាពជាស្និទ្ឋស្នាលនិងការសហការគ្នា។
ឯកឧត្តមប្រធាន មានប្រសាសន៍ទៀតថា៖ ការរៀបចំពិធីសំណេះសំណាលនាពេលនេះ ជាការឆ្លុះបញ្ចាំងពីការរីធំធាត់របស់ក្រុមគ្រួសារ សសយក ប៉ុន្តែក៏ជាការរៀបចំដើម្បីពង្រឹងភាពស្និទ្ឋស្នាលរវាងគណៈកម្មាធិការកណ្តាល សសយក ជាមួយសមាជិក សមាជិកា ដែលជាអ្នកបន្តវេននិងជាធនធានមនុស្សដ៏មានសក្តានុពលក្នុងការចូលរួមរក្សាបន្តកសាងអភិវឌ្ឍនិងកំណត់ជោគវាសនាប្រទេសជាតិនាពេលអនាគត។ឯកឧត្តម ប្រធានបង្ហាញភាពជឿជាក់យ៉ាងមុតមាំថា៖ក្រុមការងារយុវជន សហភាពសហព័ន្ឋយុវជនកម្ពុជាប្រចាំសាកលវិទ្យាល័យ សៅស៍អ៊ីសថ៍អេយសៀ នឹងរីកធំធាត់ពីមួយថ្ងៃទៅមួយថ្ងៃស្របតាមលក្ខន្តិកៈនិងបទបញ្ជាផ្ទៃក្នុងសសយក ហើយសមាជិក សមាជិកាក្រុមការងារទាំងអស់នឹងក្លាយទៅជាប្រតិបត្តិករចូលរួមចំណែកយ៉ាងទូលំទូលាយរបស់ សសយក ក្នុងការបន្តផ្តល់ឱកាសដល់យុវជនដទៃទៀត ដែលជាធនធានមនុស្ស ជាអ្នកបន្តវេន និងជាកម្លាំងគាំទ្រដ៏មានសក្តានុពល ពោរពេញទៅដោយសីលធម៌ សមត្ថភាព បុរេសកម្ម ទំនួលខុសត្រូវនឹងក្លាយជាសរសៃឈាមដ៏រស់រវើកនិងរឹងមាំក្នុងការបន្តដំណើរលើមាគ៌ារួមរបស់ប្រជាជាតិនិងរាជរដ្ឋាភិបាលកម្ពុជា៕
