ការដេញថ្លៃគម្រោងសាងសង់ផ្លូវបេតុងអាមេ ១ខ្សែ ក្នុងសង្កាត់ក្របីរៀល ក្រុងសៀមរាប បានប្រកាសបញ្ចប់ប្រកបដោយភាពជោគជ័យ នៅព្រឹកថ្ងៃទី២ ខែឧសភា ឆ្នាំ២០២៤នេះ ដោយមានការចូលរួមពីមន្រ្តីជំនាញបច្ចេកទេសសាលាខេត្ត គណៈកម្មការលទ្ធកម្មសង្កាត់ ក្រុមហ៊ុនម៉ៅការ រួមនឹងអ្នកពាក់ព័ន្ធផ្សេងទៀត។
លោក ឈួន យ៉ែប ប្រធានគណៈកម្មការលទ្ធកម្មសង្កាត់សក្របីរៀល បានឲ្យដឹងថា សម្រាប់គម្រោងមូលនិធិសង្កាត់ឆ្នាំ២០២៤នេះ រដ្ឋបាលសង្កាត់ក្របីរៀល បានដាក់ដេញថ្លៃគម្រោងសាងសង់ផ្លូវបេតុងអាមេ ១ខ្សែ ប្រវែង៤៧៨ម៉ែត្រ ទទឹង៦ម៉ែត្រ កម្រាស់បេតុង០.១៥ម៉ែត្រ ដាក់លូទោលកាត់មុខផ្លូវ១ម៉ែត្រ ចំនួន១កន្លែង និងលូការពារផ្លូវទំហំមុខកាត់០.៨ម៉ែត្រ ចំនួន២កង់ តម្លៃប៉ាន់ស្មាន ៣៦០.៩៥៨.២២០រៀល ដោយមានក្រុមហ៊ុនដាក់សំណើរចំនួន ៨ក្រុមហ៊ុន។ ជាលទ្ធផលបានទៅលើក្រុមហ៊ុន រស់ ចំរើន ក្នុងតម្លៃ ១៧១.៧៨៨.០០០រៀល។
លោក ឈួន យ៉ែប ក៏បានណែនាំដល់ក្រុមហ៊ុនឲ្យអនុវត្តឲ្យបានត្រឹមត្រូវ ដោយគោរពទៅតាមក្បួនច្បាប់ ស្តង់ដាបច្ចេកទេសនៃការសាងសង់ ពិសេសពន្លឿនការសាង់សង់ឲ្យបានលឿន និងមានគុណភាព។
លោក រស់ ចំរើន ដែលទទួលបានការម៉ៅការចំពោះគម្រោងសាងសង់ផ្លូវខាងលើ ក៏បានធ្វើការប្ដេជ្ញាចិត្តដោយសន្យាថា នឹងសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោគ ស៊ុំ គីន
កែសម្រួល៖ លោក អ៊ុន ណារាជ្យ
