យុវជនមកពីគ្រួសារក្រីក្រ និងគ្រួសាររងហានីភ័យជាង៣០០នាក់ បានទទួលការបណ្ដុះបណ្ដាលជំនាញវិជ្ជាជីរៈ និងបច្ចេកទេស ដោយមិនគិតថ្លៃ ក្នុងជំហ៊ានទីមួយ ស្ថិតនៅវិទ្យាស្ថានពហុបច្ចេកទេសទេសភូមិភាគតេជោសែនសៀមរាប ខេត្ដសៀមរាប។
លោកស្រី ផង់ ពុទ្ធី នាយិកាវិទ្យាស្ថានពហុបច្ចេកទេសភូមិភាគតេជោសែន នៅថ្ងៃទី២ ខែឧសភា ឆ្នាំ២០២៤នេះ បានបញ្ជាក់ថា ការទទួលឱ្យចូលរៀននេះ មានរយៈពេល៤ខែ ដែលបានចាប់ផ្ដើមចូលរៀនពីមករាឆ្នាំ២០២៤ ដោយមានយុវជនមកពីគ្រួសារក្រីក្រ និងគ្រួសាររងហានីភ័យ នៅតាមបណ្ដាស្រុកផ្សេងៗក្នុងខេត្ដ។ ក្នុងនោះពួកគាត់បានរៀនមុខជំនាញមួយចំនួនដូចជា៖ តបណ្ដាញអគ្គិសនីក្នុងអាគារ ការរចនាក្វ្រាហ្វិកដោយកុំព្យូទ័រ សំអាងកាយ ធ្វើម្ហូប និងបរិក្ខាម៉ាស៊ីត្រជាក់។ ការសិក្សានេះដែរ យុវជនមានប័ណ្ណក្រីក្រ នឹងគ្រួសាររងហានីភ័យក៏ទទួលបាននូវប្រាក់ឧបត្ថម្ភ ២៨ម៉ឺនរៀល ក្នុងមួយខែថែមទៀតផង។
ព័ត៌មានជាតិ ថ្មីៗ
លោកស្រី ផង់ ពុទ្ធី បានបន្ដថា ក្នុងពេលបណ្ដុះបណ្ដាលពួកគាត់ទទួលបានចុះកម្មសិក្សាផ្ទាល់ជាមួយក្រុមហ៊ុនវិស័យឯកជន ឬសហគ្រាស ហើយអាចជួយសម្របសម្រួលការងារដល់ពួកគាត់បន្ទាប់ពីបញ្ចប់ការសិក្សាផងដែរ។ ហើយការបណ្ដុះបណ្ដាលជំនាញវិជ្ជាជីវៈដល់យុវជននេះ ទៅតាមអនុសាសន៍សម្ដេចបវរធិបតី ហ៊ុន ម៉ាណែត នាយករដ្ឋមន្ដ្រី ដែលធ្វើយ៉ាងណាផ្ដល់ជំនាញដល់ពួកគាត់ឱ្យមានមុខជំនាញ ដើម្បីទទួលបានការងារមានប្រាក់ចំណូលក្នុងគ្រួសារ។
លោកស្រីនាយិកាបានបន្ថែមថា ក្រៅពីការអនុវត្ដន៍គម្រោងផែនការបណ្ដុះបណ្ដាលជំនាញដល់យុវជនក្រីក្រ និងរងហានីភ័យចំនួន ១.៥លាននាក់ ក្នុងរយៈពេល ៥ឆ្នាំរបស់រាជរដ្ឋាភិបាល ដោយមានទទួលចុះឈ្មោះយុវជនក្រីក្រ និងគ្រួសាររងហារនីភ័យចំនួន ៦០០នាក់ និងអាចលើសក្នុងឆ្នាំ២០២៤ ដោយជំហ៊ានទី១ បានចុះឈ្មោះជាង ៣០០នាក់ និងបន្ដជំហ៊ានទី២ ទទួលចុះឈ្មោះលើសពី ៣០០នាក់ទៀត។ ហើយវិទ្យាស្ថានក៏មានផ្ដល់អាហាររូបករណ៍កម្រិតសញ្ញាបត្រជាន់ខ្ពស់បច្ចេកទេសរយៈពេល ២ឆ្នាំ លើជំនាញវិទ្យាសាស្ដ្រកុំព្យូទ័រវិស្វករសំណង់ស៊ីវិល វិស្វកម្មអគ្គិសនី វិស្វកម្មម៉ាស៊ីនត្រជាក់ ផលិតកម្មនិងបសុព្យាបាល ក្សេត្រសាស្ដ្រ គ្រប់គ្រងទេសចរណ៍ និងបដិសណ្ឋារកិច្ច និងភាសាអង់គ្លេសសម្រាប់អាជីវកម្មថែមទៀតផង៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
