ក្នុងពិធីផ្សព្វផ្សាយច្បាប់ ស្តីពីការត្រួតពិនិត្យគ្រឿងញៀន និងច្បាប់ស្តីពីចរាចរណ៍ផ្លូវគោក នៅវិទ្យាល័យកំពង់ក្តី ស្រុកជីក្រែង ខេត្តសៀមរាប នៅថ្ងៃទី៣ ខែឧសភា ឆ្នាំ២០២៤នេះ សមត្ថកិច្ច រួមនឹងមន្ត្រីជំនាញ បានសំណូមពរដល់ឳពុកម្ដាយ ឬអាណាព្យាបាល ត្រូវចេះតាមដានគ្រប់សកម្មភាពកូនៗរបស់ខ្លួន ទាំងអត្តចរិក ទាំងការសិក្សា ហើយប្រសិនបើមានការសង្ស័យ ឬដឹងថាកូនរបស់ខ្លួនប្រើប្រាស់គ្រឿងញៀន ត្រូវសហការ និងរាយការណ៍ជូនអាជ្ញាធរមានសមត្ថកិច្ច ដើម្បីមានវិធានការបង្ក្រាបទប់ស្កាត់។
លោក លឹម ភក្តី ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តសៀមរាប មានប្រសាសន៍ថា គ្រឿងញៀន គឺជាអន្ទាក់ប្រកបដោយគ្រោះថ្នាក់សម្រាប់មនុស្សគ្រប់រូប ប្រសិនបើនរណាម្នាក់ធ្លាក់ចូលក្នុងអន្ទាក់នេះហើយ អ្នកនោះកម្រនឹងដកខ្លួនរួចណាស់ ហើយរមែងតែងតែផ្ដល់ផលអាក្រក់ចំពោះអ្នកប្រព្រឹត្ត គ្រួសារ សហគន៍ និងសង្គមជាតិ។ ហេតុនេះសូមឲ្យគ្រប់បណ្ដាមន្ទីរ ស្ថាប័ន ជាពិសេសអង្គភាពជំនាញ ត្រូវមានផែនការគ្រប់គ្រង និងអនុវត្ដច្បាប់ឱ្យបានច្បាស់លាស់គ្រប់ជ្រុងជ្រោយ ព្រមទាំងជួយផ្សព្វផ្សាយបន្ដដល់ប្រជាពលរដ្ឋឱ្យបានយល់ដឹងអំពីច្បាប់។ ក្រៅពីនេះការផ្សព្វផ្សាយច្បាប់ស្តីពីចរាចរណ៍ផ្លូវគោក គឺពិតជាមានសារៈសំខាន់ណាស់សម្រាប់បងប្អូនប្រជាពលរដ្ឋយើង ជាពិសេសសម្រាប់មនុស្សគ្រប់រូប ដែលត្រូវតែគោរព និងប្រតិបត្តិឲ្យបានខ្ចប់ខ្ចួន ព្រោះបើយើងគ្រប់រូបធ្វេសប្រហែសតែបន្តិច អាចនិងបាត់បង់ជីវិត ប្ញក៏រងរបួស ពិការ មិនត្រឹមតែបាត់បង់ជីវិត ប្ញរងរបួសពិការទេ គឺឲ្យយើងមានទោស និងខាតបង់ថវិកា ព្រោះថាច្បាប់នេះបានចែងយ៉ាងច្បាស់អំពីទោសប្បញ្ញត្តិ និងការផាកពិន័យ។
ព័ត៌មានជាតិ ថ្មីៗ
លោកស្រី ទី យិតហាន អភិបាលរងស្រុកជីក្រែង បង្ហាញថា ពិធីផ្សព្វផ្សាយនៅពេលនេះ វាជាការផ្តល់នូវចំណេះដឹងផ្នែកច្បាប់ជូនអ្នកចូលរួមក៏ដូចជាប្រជាពលរដ្ឋទូទៅបានយល់ដឹង និងរួមគ្នាអនុវត្តតាម សំដៅរួមគ្នាកាត់បន្ថយបទល្មើស បង្ការ ទប់ស្កាត់ ប្រយុទ្ឋប្រឆាំងនឹងបទល្មើសគ្រឿងញៀន បង្កើននូវសុវត្ថិភាពសណ្តាប់ធ្នាប់ចរាចរណ៍ផ្លូវគោក ដើម្បីលើកកម្ពស់សន្តិសុខ សុវត្ថិភាព ការពារសុខុមាលភាពសង្គម អាយុជីវិត មនុស្សសត្វទ្រព្យសម្បត្តិ។ល។ ជាពិសេសយុវជនជាសិស្សានុសិស្ស ព្រោះថាបញ្ហាគ្រឿងញៀន និងបញ្ហាគ្រោះថ្នាក់ចរាចរណ៍នៅតែជាកត្តាប្រឈម និងក្តីកង្វល់របស់គ្រួសារ និងសង្គមជាតិ។
លោកវរសេនីយ៍ឯក អ៊ុំ សាអាត នាយការិយាល័យប្រឆាំងគ្រឿងញៀន បានបង្ហាញថា គ្រឿងញៀន គឺជាកំពូលឧក្រឹដ្ឋកម្មអន្តរជាតិ ដែលបាននិងកំពុងរាតត្បាតនៅពាសពេញពិភពលោក ហើយបានទន្ទ្រានចូលមកប្រទេសកម្ពុជា ដោយបានបង្កនូវគ្រោះមហន្តរាយធ្ងន់ធ្ងរជាច្រើនចំពោះប្រជាពលរដ្ឋ ជាពិសេសយុវជន យុវនារី និងកុមារខ្មែរយើង។ ដរាបណាការចរាចរណ៍គ្រឿងញៀនខុសច្បាប់នៅតែកើតទ្បើង នោះផលវិបាកធ្ងន់ធ្ងរក៏នៅតែមានជានិច្ចចំពោះប្រទេសជាតិយើង ព្រោះថាវាបានបង្កឱ្យមានឧក្រឹដ្ឋកម្មផ្សេងៗទៀតជាច្រើន។
ដោយឡែកលោកវរសេនីយ៍ទោ សោម វីរៈ នាយការិយាល័យចរាចរណ៍ផ្លូវគោក ក៏បានបង្ហាញដែរថា ការយល់ដឹងផ្នែកច្បាប់របស់ប្រជាពលរដ្ឋ យើងនៅមានកម្រិត ហេតុនេះហើយទើបយើងលើកយកច្បាប់ស្តីពីចរាចរណ៍ផ្លូវគោកមកធ្វើការផ្សព្វផ្សាយគឺ មានគោលបំណងធានាសុវត្ថិភាព សណ្តាប់ធ្នាប់ចរាចរណ៍ផ្លូវគោក និងធានាការពារសុខភាព និងអាយុជីវិត មនុស្ស សត្វ ទ្រព្យសម្បត្តិ និងបរិស្ថាន ហើយច្បាប់នេះ ផ្តល់ការយល់ដឹងអំពីចរាចរណ៍ផ្លូវគោក គ្រប់គ្រង សុវត្ថិភាពចរាចរណ៍ផ្លូវគោក រក្សាសណ្តាប់ធ្នាប់ចរាចរណ៍ផ្លូវគោក និងទប់ស្កាត់ការប្រព្រឹត្តបទល្មើស ដែលបណ្តលមកពីការប្រើប្រាស់ ផ្លូវថ្នល់ គឺដើម្បីកាត់បន្ថយនូវអត្រាគ្រោះថ្នាក់៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
