នៅក្រុងសៀមរាប ថ្ងៃទី៦ ខែឧសភា ឆ្នាំ២០២៤នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជា ប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.ជ.) បានអញ្ជើញបើកសិក្ខាសាលាផ្សព្វផ្សាយស្តីពី«វិធីសាស្ត្រអនុវត្តការវាយតម្លៃ និងការទទួលស្គាល់អង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល» សម្រាប់កម្រិតវិទ្យាល័យ មត្តេយ្យសិក្សា និងមន្ទីរពេទ្យបង្អែក ដែលផ្តល់សេវាសំណុំសកម្មភាពបង្រ្គប់ កម្រិត១ កម្រិត២ និងកម្រិត៣ ដែលជាគោលដៅ នៃការវាយតម្លៃ ស្របតាមយុទ្ធសាស្ត្ររបស់រាជរដ្ឋាភិបាល។
ក្នុងនាមក្រុមប្រឹក្សាខេត្ត និងរដ្ឋបាលខេត្ត ឯកឧត្តម បា្រក់ សោភ័ណ អភិបាលខេត្តសៀមរាប បង្ហាញថា ស្របតាមផែនការយុទ្ធសាស្រ្តបញ្ចកោណ ដំណាក់កាលទី១ ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី រដ្ឋបាលខេត្តតែងតែបានយកចិត្តទុកដាក់ជាប់ជាប្រចាំ ក្នុងការគាំទ្រ និង ជំរុញការអនុវត្តចលនាប្រឡងប្រណាំង អង្គភាពផ្តល់សេវាសាធារណៈ នៅតាមបណ្តាអង្គភាពអប់រំ និងសុខាភិបាលនៅថ្នាក់មូលដ្ឋាន ដើម្បីបង្កើននូវប្រសិទ្ធភាព និងគុណភាព នៃដំណើរការផ្តល់សេវា របស់អង្គភាពផ្តល់សេវាសាធារណៈឱ្យកាន់តែប្រសើរឡើង។ ជាលទ្ធផល ខេត្តសៀមរាប មានអង្គភាពទទួលបានជ័យលាភីចំនួន ៤ រួមមាន អនុវិទ្យាល័យមិត្តភាពខ្មែរ-ជប៉ុន ព្រះឥន្ទកោសា ជាប់ចំណាត់ថ្នាក់លេខ២ សាលាបឋមសិក្សាវត្តបូព៌ ចំណាត់ថ្នាក់លេខ៣ សាលាបឋមសិក្សាក្រវ៉ាន់ ជាប់ចំណាត់ថ្នាក់លេខ៦ និងមណ្ឌលសុខភាពគោកចកជាប់ ចំណាត់ថ្នាក់លេខ២ ក្នុងការវាយតម្លៃ និងទទួលស្គាល់សេវាសាធារណៈគំរូ ក្នុងវិស័យអប់រំ និងសុខាភិបាល នៅទូទាំងប្រទេស។
ឯកឧត្តម អភិបាលខេត្ត បញ្ជាក់បន្ថែមថា សម្រាប់ឆ្នាំ២០២៤នេះ រដ្ឋបាលខេត្ត នៅតែបន្តជំរុញ អង្គភាពសាធារណៈក្នុងខេត្ត ពង្រឹងគុណភាព ក្នុងការផ្ដល់សេវារបស់ខ្លួន ដើម្បីចូលរួមចលនាប្រឡងប្រណាំង អង្គភាពផ្តល់សេវាសាធារណៈគំរូ ក្នុងវិស័យទាំងពីរខាងលើ។
ថ្លែងក្នុងឱកាសនោះ ឯកឧត្តម ឧបនាយករដ្ឋមន្ត្រី ហ៊ុន ម៉ានី លើកឡើងថា រាជរដ្ឋាភិបាលកម្ពុជា ក្នុងនីតិកាលទី៧នេះ បានដាក់ចេញនូវយុទ្ឋសាស្ត្របញ្ចកោណដំណាក់កាលទី១ ដើម្បីជំរុញកំណើនការងារ សមធម៌ ប្រសិទ្ឋិភាព និងចីរភាព សំដៅកសាងមូលដ្ឋានគ្រឺះឆ្ពោះទៅសម្រេចបានចក្ខុវិស័យកម្ពុជាឆ្នាំ២០៣០ ជាប្រទេស ដែលមានចំណូលមធ្យមកម្រិតខ្ពស់ និងនៅឆ្នាំ២០៥០ ជាប្រទេសមានចំណូលខ្ពស់។ ក្នុងនោះ យុទ្ឋសាស្ត្របញ្ចកោណ បានផ្ដោតលើការកែលម្អអភិបាលកិច្ច និងការធ្វើទំនើបកម្មស្ថាប័នរដ្ឋ ឱ្យក្លាយជារដ្ឋបាលសាធារណៈទំនើប និងបានដាក់ចេញនូវវិធានការគន្លឺះ ក្នុងការកែទម្រង់រដ្ឋបាលសាធារណៈដោយផ្តោតលើការងារអាទិភាពចំនួន៣ គឹ ការកែលម្អប្រព័ន្ឋជ្រើសរើសមន្ត្រី ការលើកកម្ពស់ប្រសិទ្ឋិភាពការងារ និងការរៀបចំប្រព័ន្ឋលើកទឹកចិត្តគាំទ្រសមិទ្ឋកម្ម ដើម្បីធានាបានសង្គតិភាព សមធម៌ ប្រសិទ្ឋភាពនិងចីរភាព។
ឯកឧត្តម ឧបនាយករដ្ឋមន្ត្រី បន្ថែមថា ចំពោះវិស័យអប់រំនៅមូលដ្ឋាន រាជរដ្ឋាភិបាល បានផ្តោតសំខាន់ទៅលើការពង្រឹងគុណភាពសាលារដ្ឋ ចាប់ពីកម្រិតមត្តេយ្យសិក្សា ដល់មធ្យមសិក្សា ធ្វើការពិនិត្យកែសម្រួលរៀបចំកម្មវិធីសិក្សានិងសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង វិន័យ សីលធម៌ និងឥរិយាបទ របស់សិស្សានុសិស្ស។ ជាមួយគ្នានេះ រាជរដ្ឋាភិបាលក៏បានយកចិត្តទុកដាក់លើសុខភាពរបស់សិស្សានុសិស្ស តាមរយៈកម្មវិធីអាហារូបត្ថម្ភដល់កុមារ ការត្រួតពិនិត្យគុណភាពចំណីអាហារនៅតាមសាលា ការជំរុញលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំស្របតាមពាក្យស្លោក ភាពជាដៃគូរដ្ឋ និងសហគមន៍ដើម្បីការអប់រំ។ ទន្ទឹមនោះ ការលើកកម្ពស់គុណភាពសេវាសុខាភិបាលនៅមូលដ្ឋាន រាជរដ្ឋាភិបាល បានផ្តោតលើការពង្រឹងសមត្ថភាពផ្តល់សេវាសុខភាពបឋមនៅមូលដ្ឋាន តាមរយៈការពង្រឹងសមត្ថភាពផ្ដល់សេវារបស់មន្ត្រីសុខាភិបាល និងការអភិវឌ្ឍនៅតាមមណ្ឌលសុខភាព នៅមន្ទីរពេទ្យបង្អែកទាំងថ្នាក់ជាតិ ថ្នាក់ក្រោមជាតិ និងការសាងភាពជាដៃគូរឹងមាំរវាងវិស័យសុខាភិបាលសាធារណៈ និងឯកជន។
តាមរយៈ ការវាយតម្លៃ និងទទួលស្គាល់អង្គភាពផ្តល់សេវាសាធារណៈ ក្នុងវិស័យអប់រំ និងវិស័យសុខាភិបាល ដែលត្រូវបានដាក់ឱ្យអនុវត្តដោយសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី តាំងពីឆ្នាំ២០១៨កន្លងមក ឯកឧត្តម ហ៊ុន ម៉ានី កត់សម្គាល់ឃើញថា អង្គភាពផ្តល់សេវាសាធារណៈ ក្នុងវិស័យអប់រំ និងវិស័យសុខាភិបាល បានឱ្យខិតខំប្រឹងប្រែង លើកកម្ពស់គុណភាពអង្គភាពរបស់ខ្លួន ក្នុងការដឹកនាំគ្រប់គ្រង និងប្រតិបត្តិការក្នុងការផ្តល់សេវាសាធារណៈ បានកាន់តែប្រសើរជូនទៅដល់ប្រជាពលរដ្ឋ។
គួរជម្រាបថា សិក្ខាសាលាផ្សព្វផ្សាយស្តីពី«វិធីសាស្ត្រអនុវត្តការវាយតម្លៃ និងការទទួលស្គាល់អង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល» សម្រាប់ឆ្នាំ២០២៤នេះ មានអ្នកចូលរួមសរុប ៧៥០នាក់ ដែលមកពីខេត្តបាត់ដំបង ខេត្តប៉ៃលិន ខេត្តព្រះវិហារ ខេត្តបន្ទាយមានជ័យ ខេត្តឧត្តរមានជ័យ និងខេត្តកំពង់ធំ និងសិក្ខាកាមមកពីវិស័យអប់រំ និងសុខាភិបាលក្នុងខេត្តសៀមរាប។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
