គិតចាប់ពីដើមឆ្នាំ២០២០ មកដល់ឆ្នាំ២០២៤នេះ ស្រុកបន្ទាយស្រី បានបំពាក់បង្គោល និង អំពូលសូឡាសរុប ៦ ៦៤០អំពូល ក្នុងនោះ នៅដើមខែឧសភានេះ ឯកឧត្តម សែម សុវណ្ណនី ប្រធានក្រុមការងារចុះជួយមូលដ្ឋនស្រុកបន្ទាយស្រី បានចុះពិនិត្យវឌ្ឍនភាព នៃការបន្តបំពាក់បង្គោល និង អំពូលសូឡាថ្មីចំនួន ២ ០២៨ បន្ថែមទៀត ដែលស្របទៅនឹងគោលនយោបាយភូមិ ឃុំ សង្កាត់ មានសុវត្ថិភាព របស់រាជរដ្ឋាភិបាល ឱ្យកាន់តែមានប្រសិទ្ធភាពបន្ថែមទៀតនៅតាមមូលដ្ឋាន ក៏ដូចជាបង្កើនសោភណ្ឌភាព ទៅដល់ស្រុកដែលជាគោលដៅទេសចរណ៍មួយនេះ ឱ្យកាន់តែមានភាពទាក់ទាញបន្ថែមទៀតនាពេលរាត្រី។
តាមការបញ្ជាក់ពីលោក រិន ឡូត អភិបាលស្រុកបន្ទាយស្រី បង្ហាញថា ស្រុកបន្ទាយស្រី ជាស្រុកដែលមានភាពល្បីល្បាញ សម្រាប់បម្រើឱ្យវិស័យទេសចរណ៍ទាំងវប្បធម៌ ប្រវត្តិសាស្ត្រ និងធម្មជាតិ ដែលក្នុងនោះរួមមាន ប្រាសាទបន្ទាយស្រី ភ្នំក្បាលស្ពាន ឧទ្យានជាតិព្រះជ័យវរ្ម័ន-នរោត្តម ភ្នំគូលែន តំប់ទេសចរណ៍ច្នៃប្រឌិតជាច្រើនកន្លែងផ្សេងទៀត ដែលសុទ្ធសឹងតែជាគោលដៅទាក់ទាញភ្ញៀវទេសចរណ៍ជាតិ-អន្តរជាតិ ក៏ដូចជាជួយលើកកម្ពស់ដល់ជីវភាពរស់នៅរបស់ប្រជាពលរដ្ឋក្នុងភូមិសាស្ត្រស្រុក និងខេត្តទាំងមូល ឱ្យកាន់តែមានជីវភាពល្អប្រសើរឡើង។
លោកអភិបាលស្រុក បន្ថែមថា ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី ឯកឧត្តម ប្រាក់ សោភ័ណ អភិបាលខេត្តសៀមរាប ព្រមទាំងការជួយជ្រោមជ្រែងអស់ពីកម្លាំងកាយចិត្តពីសំណាក់ ឯកឧត្តម សែម សុវណ្ណនី ប្រធានក្រុមការងារ បានជួយជំរុញឱ្យស្រុកបន្ទាយស្រីកាន់តែមានការអភិវឌ្ឍកាន់តែឆាប់រហ័សរួមមាន សាងសង់ហេរចនាសម្ព័ន្ធផ្លូវដី សាលាឆទាន សកម្មភាពមនុស្សធម៌ និងដាំដើមឈើលម្អជាដើម។ លោក បន្ថែមថា សកម្មភាពទាំងអស់នេះ បានបង្ហាញពីការយកចិត្តទុកដាក់ និងរួមគ្នាទទួលខុសត្រូវ ចាប់ពីថ្នាក់កំពូលរាជរដ្ឋាភិបាល ថ្នាក់ជាតិ ថ្នាក់ក្រោមជាតិ ព្រមទាំងថ្នាក់មូលដ្ឋាន ក្នុងការបន្តខិតខំប្រឹងប្រែងរួមគ្នាក្នុងការបំពេញតួនាទី ភារកិច្ច ស្របតាម បទបញ្ជា សេចក្ដីណែនាំ កម្មវិធីនយោបាយ យុទ្ធសាស្ត្របញ្ចកោណដំណាក់កាលទី១ លើការកំណែទម្រង់នានា ពិសេសលើកកម្ពស់ការផ្តល់សេវាសាធារណៈ និង ការអភិវឌ្ឍមូលដ្ឋាន ដែលឆ្លើយតបទៅនឹងសេចក្តីត្រូវការរបស់ប្រជាពលរដ្ឋប្រកបដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌សង្គម។
អត្ថបទ និងរូបភាព៖ សេង ផល្លី
