ម្ហូបចំនួន ២០មុខ មកពីខេត្តចំនួន ៥ នៃនៅប៉ែកឦសាន្ដប្រទេស ត្រូវបានក្រសួងទេសចរណ៍ដាក់បញ្ចូលទៅក្នុងសៀវភៅកំណត់មុខម្ហូបប្រចាំតំបន់ ដែលបានរក្សានូវរូបមន្ដដើម និងមានភាពច្បាស់លាស់ សម្រាប់សម្គាល់ខេត្តនីមួយៗ នេះបើតាមការបញ្ជាក់របស់ លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ និងជាប្រធានគណៈកម្មការគ្រប់គ្រងគម្រោងហូកានៃក្រសួងទេសចរណ៍ ក្នុងពិធីបិទវគ្គបណ្ដុះបណ្ដាល ពង្រឹងសមត្ថភាពជំនាញចុងភៅ សម្រាប់គ្រូបង្គោល ស្ថិតនៅសង្កាត់ជ្រាវ ខេត្ដសៀមរាប កាលពីថ្ងៃទី១០ ខែឧសភាម្សិលមិញនេះ។
លោក ជួប រតនា បន្ថែមថា វគ្គបណ្ដុះបណ្ដាលក្រោមគម្រោងហូកានេះ បានបណ្ដុះបណ្ដាលជំនាញដល់ចុងភៅ និងធ្វើការកំណត់មុខម្ហូបប្រចាំខេត្ដចំនួន១២ ប៉ុន្ដែបច្ចុប្បន្ន បានអនុវត្ដចំនួន៥ខេត្ដ នៃតំបន់ឦសាន្ដ រួមមាន ខេត្ដព្រះវិហារ ខេត្ដក្រចេះ ខេត្ដស្ទឹងត្រែង ខេត្ដមណ្ឌលគីរិ និងរតនគីរី ។ លោក ក៏បានបញ្ជាក់បន្ថែមដែរថា មុខម្ហូបនីមួយៗ ដែលគម្រោង បានបណ្ដុះបណ្ដាល នៅតាមបណ្ដាខេត្ដនីមួយៗ ពិតជាមានប្រភពមកពីខេត្ដទាំងនោះពិតប្រាកដ ដោយមានការឯកភាពពីអ្នកពាក់ព័ន្ធក្នុងតំបន់ក្នុងវិស័យម្ហូបអាហារនេះ។
ក្នុងនាមអាជ្ញាធរខេត្ត លោក ង៉ូវ សេងកាក់ អភិបាលរងខេត្ដសៀមរាប បានបង្ហាញការគាំទ្រ ចំពោះការចងក្រងសៀវភៅកំណត់មុខម្ហូប សម្រាប់សំគាល់មុខម្ហូបប្រចាំខេត្ដនេះ ដោយលោកលើកឡើងថា ការកំណត់ម្ហូបប្រចាំតំបន់ ឬខេត្តនេះ នឹងជាផ្នែកមួយ ក្នុងការរួមចំណែក សម្រាប់ការរៀបចំកម្មវិធីដើរកម្សាន្ដរបស់អ្នកទេសចរជាតិ និងអន្តរជាតិ មួយវិញទៀត វាក៏នឹងជួយជំរុញបន្ថែមដល់ការចូលរួមផ្សព្វផ្សាយពីសក្ដានុពលទេសចរ នៃបណ្ដាខេត្តក្នុងប្រទេសផងដែរ។
បើតាមការលើកឡើងរបស់ លោក គង់ ដារ៉ា ប្រធានកម្មវិធីអភិវឌ្ឍន៍ជំនាញ (SDP) បង្ហាញថា វគ្គបណ្តុះបណ្តាលពង្រឹងសមត្ថភាពបច្ចេកទេសជំនាញចុងភៅនេះ បានជួយពង្រឹងសមត្ថភាព និងការលើកស្ទួយដល់វិស័យម្ហូបអាហារនៅកម្ពុជា ដោយផ្ដល់ចំណេះដឹងទៅដល់ចុងភៅ ឱ្យជំនាញពិតប្រាកដទាំងម្ហូបខ្មែរ និង បរទេស។ ការបណ្ដោះបណ្ដាលជំនាញនេះ អនុវត្ដដោយកម្មវិធីអភិវឌ្ឍន៍ជំនាញ (SDP) ដំណាក់កាលទី២ ចាប់ពីឆ្នាំ២០២០ – ២០២៤។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
