ក្នុងឱកាសជួបពិភាក្សាការងារជាមួយប្រតិភូខេត្តយូណាន នៅសាលាខេត្តសៀមរាប នារសៀលថ្ងៃទី១៥ ខែឧសភា ឆ្នាំ២០២៤ លោក លី សារី អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាលខេត្ត បានស្នើដល់ប្រតិភូខេត្តយូនណាន បន្តជំរុញអ្នកទេសចរណ៍ និងអ្នកវិនិយោគចិន ឲ្យមកវិនិយោគនៅខេត្តសៀមរាបបន្ថែមទៀត ជាពិសេសលើវិស័យទេសចរណ៍ ដើមី្បបំពេញនូវតម្រូវការរបស់ភ្ញៀវទេសចរណ៍ ។
លោក លី សារី បានបញ្ជាក់ថា ខេត្តសៀមរាប ជាខេត្តដែលមានវិស័យទេសចរណ៍ដើរតួនាទីយ៉ាងសំខាន់ ក្នុងនោះការងារសន្តិសុខ សុវត្ថិភាព ខេត្តបានរក្សាបានល្អជូនដល់ភ្ញៀវទេសចរណ៍ជាតិ អន្តរជាតិចូលមកទស្សនាកម្សាន្ត នៅតាមតំបន់រមណីយ ដ្ឋានវប្បធម៌ និង ធម្មជាតិ សំខាន់ចំពោះបងប្អូនដែលមកធ្វើវិនិយោគនៅខេត្តសៀមរាប។ ហើយក្រៅពីវិស័យទេសចរណ៍ ខេត្តសៀមរាប មានផ្ទៃដីកសិកម្មច្រើន ដែលនឹងបំពេញតម្រូវការជូនដល់អ្នកវិនិយោគ ហើយជាសំខាន់នោះតម្រូវការរបស់ប្រជាពលរដ្ឋកម្ពុជា។
លោកអភិបាលរងខេត្ត ក៏បានគូសបញ្ជាក់ថា ខេត្តសៀមរាប និងខេត្តយូណាន មានសម្ព័ន្ធមេត្រីភាពនឹងគ្នា មានកិច្ចសហប្រតិបត្តិការបានល្អនឹងគ្នាទៀតផង។ ម៉្យាងទៀតខេត្តយូណាន ក៏មានក្រុមហ៊ុនវិនិយោគ ក្នុងការសាងសង់អាកាសយានដ្ឋានអន្តរជាតិនៅខេត្តសៀមរាប ព្រមទាំងចូលរួមក្នុងកិច្ចអភិវឌ្ឍន៍ខេត្ត។ ជាមួយគ្នានោះសាធារណរដ្ឋប្រជាមានិតចិន ក៏ជាដៃគូដ៏សំខាន់ ក្នុងកិច្ចអភិវឌ្ឍន៍ប្រទេសជាតិ ដែលជាមិត្តដែកថែប និងបានគាំទ្រចំពោះគំនិតផ្តួចផ្តើម ដែលបានចូលរួមចំណែកក្នុងការជួយដល់ប្រទេសកំពុងអភិវឌ្ឍឲ្យមានការរីកចម្រើនជាបន្តបន្ទាប់ឥតឈប់ឈរ។
ឯកឧត្តម លីវ ហុងជាន សមាជិកអចិន្ត្រៃយ៍ គណៈកម្មាធិការបក្សកុម្មុនីស្តខេត្តយូណាន និងជាលេខានៃគណៈកម្មាធិការបក្សកុម្មុនីស្តចិន ក្រុងគុនមីង ខេត្តយូណាន នៃសាធារណរដ្ឋប្រជាមានិតចិន បានបញ្ជាក់ដែរថា ខេត្តយូណាន បានផ្តោតទៅលើវិស័យទេសចរណ៍ កសិកម្ម និងវិស័យវិនិយោគនៅកម្ពុជា សំខាន់នៅខេត្តសៀមរាប ដែលជាខេត្តមានសក្តានុពលយ៉ាងខ្លាំងលើវិស័យទេសចរណ៍។ ខេត្តយូណាន គឺជាដៃគូរដ៏ល្អជាមួយខេត្តសៀមរាប ព្រមទាំងបានធ្វើកិច្ចសហប្រតិបត្តិការល្អនឹងគ្នា និងបានធ្វើការផ្លាប់ប្តូរប្រតិភូ ក្នុងការសិក្សាស្វែងយល់នឹងគ្នាលើគ្រប់វិស័យផងដែរ។ ម៉្យាងទៀតខេត្តយូណាន និងខេត្តសៀមរាប មានសក្តានុពលប្រហាក់ប្រហែលគ្នាលើវិស័យទេសចរណ៍ ដោយខេត្តសៀមរាប សម្បូរទៅដោយប្រាង្គប្រាសាទបុរាណ រមណីយដ្ឋានធម្មជាតិ ហើយខេត្តយូណាន មានទីកន្លែងកម្សាន្តរបស់ភ្ញៀវទេសចរដែលមានវ័យចំណាស់ ត្រូវពឹងផ្អែកតំបន់ធម្មជាតិព្រៃភ្នំ ដែលមានទឹកធ្លាក់ ប្រកបដោយធម្មជាតិ ដោយខេត្តយូណាន ជាខេត្តមានបទពិសោធន៍លើវិស័យទេសចរណ៍ទៀតផង។
ឯកឧត្តម លីវ ហុងជាន បន្ថែមថា មិត្តចិននឹងបន្តធ្វើការផ្សព្វផ្សាយជំរុញបន្ថែមទៀត ទាំងអ្នកវិនិយោគ និងអ្នកទេសចរណ៍ចិន ឲ្យមកកំសាន្ត និងវិនិយោគលើវិស័យផ្សេងៗបន្ថែមទៀត ជាពិសេសវិស័យទេសចរណ៍នៅខេត្តសៀមរាប តែម្ដង។ ជាមួយគ្នានោះ ឯកឧត្តមមានសង្ឃឹមជឿជាក់ថា កិច្ចសហប្រតិបត្តិការរវាងខេត្តទាំងពីរ ក៏ដូចប្រទេសទាំងពីរ នៅក្រោមក្របខ័ណ្ឌកិច្ចសហប្រតិបត្តិការខ្សែក្រវាត់ និងផ្លូវ ហើយក៏ជាឆ្នាំការផ្លាស់ប្តូរប្រជាជននិងប្រជាជន នៃប្រទេសទាំងពីរផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
