សិក្ខាកាមមកពីគ្រួសារក្រីក្រ និងគ្រួសាររងហានីភ័យជិត ២០០នាក់ ដែលសិក្សានៅវិទ្យាស្ថានជាតិពហុបច្ចេកទេសអង្គរ ខេត្ដសៀមរាប ត្រូវបានប្រឡងបញ្ចប់វគ្គសិក្សាកម្រិតសញ្ញាបត្របច្ចេកទេសវិជ្ជាជីវរៈរបស់ខ្លួន ក្រោយបានបណ្ដុះបណ្ដាលរយៈពេល៤ខែ នៅថ្ងៃទី១៥ ខែឧសភា ឆ្នាំ២០២៤នេះ។
លោក ចាន់ វិចិត្រ អគ្គនាយករង នៃអគ្គនាយកដ្ឋានអប់រំបណ្ដុះបណ្ដាលបច្ចេកទេសវិជ្ជាជីវៈ នៃក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា សិក្ខាកាមដែលបានធ្វើការវាយតម្លៃបញ្ចប់កម្រិតសញ្ញាបត្របច្ចេកទេស និងវិជ្ជាជីវៈនេះ មានចំនួន ១៨៤នាក់ ដែលក្នុងនោះមាន ៣មុខជំនាញ រួមមាន៖ ការតណ្ដាញអគ្គិសនី បរិក្ខាម៉ាស៊ីនត្រជាក់ និងការថែទាំ និងជួសជុលរថយន្ដ បន្ទាប់ពីពួកគាត់បានធ្វើការសិក្សារយៈពេល៤ខែកន្លងមក ទាំងទ្រឹស្ដី ការអនុវត្ដ និងចុះកម្មសិក្សា។
លោក ចាន់ វិចិត្រ បញ្ជាក់ថា ការបណ្ដុះបណ្ដាលនេះ គឺអនុវត្តទៅតាមគោលនយោបាយរបស់រាជរដ្ឋាភិបាលកម្ពុជាអាណត្តិថ្មី ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រី ដោយបានគោរពទៅលើអភិក្រមចំនួន៣ គឺរៀនឱ្យចេះ រៀនអោយចប់ រៀនអោយមានការងារធ្វើ ដែលមកដល់ថ្ងៃប្រលងបញ្ចប់នេះ សិក្ខាកាមបានអនុវត្ដតស៊ូរៀនសូត្របាន ២ហើយ គឺរៀនបានចប់ រៀនបានចេះ នឹងបន្ដឱ្យមានការងារធ្វើក្រោយពីរប្រលងបញ្ចប់វគ្គនាពេលនេះ។
លោកអគ្គនាយករង ក៏បានសម្ដែងនូវក្ដីរីករាយនៅពេលឃើញសិក្ខាកាមនៃវិទ្យាស្ថានពហុបច្ចេកទេស ដែលបានតស៊ូរៀនសូត្ររហូតបានធ្វើការវាយតម្លៃបញ្ចប់វគ្គសិក្សារបស់ខ្លួននាពេលនេះ។ ជាមួយនេះវិទ្យាស្ថាន កឺនឹងបន្ដជ្រើសរើសយុវជនមកពីគ្រសារក្រីក្រ និងងាយរងហានីភ័យ ឱ្យចូលសិក្សាជាបន្ដបន្ទាប់ ដើម្បីឱ្យពួកគាត់មានជំនាញវិជ្ជាជីវៈមួយពិតប្រាកដក្នុងការប្រកបមុខរបរចិញ្ចឹមជីវិត។ លោកក៏បានអំពាវនាដល់យុវជនឱ្យចុះចូលរៀនជំនាញវិជ្ជាជីវៈ និងបច្ចេកទេសឱ្យបានច្រើន ជាពិសេសយុវជនមកពីគ្រួសារក្រីក្រ ដើម្បីងាយស្រួលចាប់យកឱ្យកាសការងារទៅថ្ងៃអនាគត៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
