នាព្រឹកថ្ងៃទី១៦ ខែឧសភា ឆ្នាំ២០២៤នេះ ក្រសួងទេសចរណ៍សហការជាមួយរដ្ឋបាលខេត្តសៀមរាប បានរៀបចំសិក្ខាសាលាផ្សព្វផ្សាយស្តីពី “ស្ត្រី និងការអភិវឌ្ឍបៃតងក្នុងវិស័យទេសចរណ៍” ជូនដល់ស្ត្រីតាមមូលដ្ឋានអាជីវកម្ម សេវាកម្ម និងអ្នកពាក់ព័ន្ធក្នុងវិស័យទេសចរណ៍នៅក្នុងខេត្តសៀមរាប ដើម្បីជំរុញលើកទឹកចិត្ត និងតម្រង់ទិសដល់ស្ត្រីក្នុងវិស័យនេះឱ្យបន្តពង្រឹងសមត្ថភាពទាំងបដិសណ្ឋារកិច្ច និងថែរក្សាសោភ័ណភាព និងភាពបៃតងក្នុងទីក្រុង តាមរយៈការចូលរួមកាត់បន្ថយកាកសំណល់ថង់ប្លាស្ទិកដើម្បីឲ្យទីក្រុងស្អាត ទីក្រុងមានបរិស្ថាន អនាម័យសណ្តាប់ធ្នាប់ល្អផ្តល់ភាពកក់ក្តៅដល់មជ្ឈដ្ឋានរស់នៅរបស់ប្រជាពលរដ្ឋក្នុងទីក្រុង និងភ្ញៀវទេសចរនានា។
លោក ង៉ូវ សេងកាក់ អភិបាលរងខេត្ត មានប្រសាសន៍ថា វិស័យទេសចរណ៍នៅខេត្តសៀមរាប ស្ត្រីបានចូលរួមជាច្រើនលើការអភិវឌ្ឍជំនាញ និងមានសមត្ថភាពផ្នែកទេសចរណ៍ដូចជាបុរសដែរ។ លើសពីនេះក្រុមការងារនៃមន្ទីរទេសចរណ៍ខេត្តក៏បានចូលរួមសម្របសម្រួលជាមួយក្រសួងកិច្ចការនារី ដើម្បីលើកកម្ពស់ស្ត្រី និងពង្រឹងភាពអង់អាចដល់ស្ត្រីនៅតាមសហគមន៍ទេសចរណ៍ធម្មជាតិទៀតផង។ ដូចនេះលោកបានជំរុញដល់មន្ទីរទេសចរណ៍ ត្រូវចងក្រងបង្កើតបណ្តាញស្ត្រី និងជនបង្គោលតាមគោលដៅនៅគ្រប់ផ្នែកនៃវិស័យទេសចរណ៍ សម្រាប់ជាភ្នាក់ងារផ្សព្វផ្សាយបន្ត និងប្រមូលធាតុចូល ដើម្បីងាយស្រួលគ្រប់គ្រង ឆ្លើយតប ដោះស្រាយទាន់ពេលវេលា ពាក់ព័ន្ឋទៅនឹងបញ្ហាអាជីវកម្មនានារបស់ពួកគាត់។
លោកជំទាវ ហ៊ុន ដានី រដ្ឋលេខាធិការក្រសួងទេសចរណ៍ មានប្រសាសន៍ដែរថា ស្ត្រីនៅក្នុងសង្គមសព្វថ្ងៃ គឺមានសមត្ថភាព ចំណេះដឹង និងប្រាជ្ញាស្មារតីមិនចាញ់បុរសនោះទេ ប្រៀបចាញ់តែកម្លាំងកាយប៉ុណ្ណោះ។ ហើយសម្រាប់ការរៀបចំសិក្ខាសាលានាពេលនេះដែរ គឺដើម្បីរំលេចពីសារៈសំខាន់របស់ស្ត្រីក្នុងវិស័យមួយនេះ តាមរយៈសកម្មភាពនាំឱ្យទីក្រុងស្អាត បរិស្ថាន អនាម័យល្អ ព្រោះថាការអភិវឌ្ឍបៃតងក្នុងវិស័យទេសចរណ៍ សំដៅដល់ការចូលរួមថែរក្សាសោភណ្ឌភាព បរិស្ថានអនាម័យ សណ្តាប់ធ្នាប់ទីក្រុងរបស់យើងឱ្យមានភាពស្រស់ត្រកាល ប្រកបដោយផាសុកភាព ចូលរួមការដាំដើមឈើលើកកម្ពស់គុណភាពបរិស្ថាន កាត់បន្ថយការប្រើប្រាស់ថង់ប្លាស្ទិក វិចខ្ចប់សំរាមឱ្យបានត្រឹមត្រូវ ចូលរួមអនុវត្តគោលការណ៍៣ គឺកាត់បន្ថយប្រើប្លាស្ទិក ប្រើប្រាស់ឡើងវិញ កែច្នៃឡើងវិញ។ ក្នុងនោះត្រូវចូលរួមលើកកម្ពស់ការប្រើប្រាស់ផលិតផលក្នុងស្រុក រួមគ្នាសន្សំសំចៃការប្រើប្រាស់ភ្លើង និងទឹក និងរួមគ្នាគោរពច្បាប់ដើម្បីសណ្តាប់ធ្នាប់ល្អ។
បើតាមលោក ពៅ វ៉ារ៉ូ អគ្គនាយករងរដ្ឋបាល និងហិរញ្ញវត្ថុក្រសួងទេសចរណ៍ បានឲ្យដឹងថា ក្នុងមួយឆ្នាំពិភពលោកផលិតប្លាស្ទិកចំនួន ៤០០លានតោន ដោយមនុស្សម្នាក់ជាទូទៅក្នុងមួយឆ្នាំប្រើថង់ប្លាស្ទិកប្រហែល៣០០ថង់។ ដើម្បីអាចកាត់បន្ថយសំណល់ផ្លាស្ទិក យើងត្រូវព្យាយាមក្នុងការប្រើប្រាស់ឡើងវិញ និងការចែច្នៃឡើងវិញដូចជា ដប ឬកែវក្រដាស ដបអាលុយមីញ៉ូម គ្រឿងអេឡិកត្រូនិកចាស់ៗ សុទ្ឋតែអាចកែច្នៃឬជួសជុលប្រើវិញបាន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
