សិក្ខាកាមមកពីគ្រួសារក្រីក្រ និងគ្រួសារងាយរងហានីភ័យ ដែលទទួលបានអាហាររូបករណ៍សិក្សាជំនាញ និងបច្ចេកទេសមិនគិតថ្លៃពីរាជរដ្ឋាភិបាល នៅវិទ្យាស្ថានជាតិពហុបច្ចេកទេសអង្គរ ខេត្តសៀមរាប បានបង្ហាញការជឿជាក់ថា ពួកគាត់នឹងទទួលបានឱកាសការងារល្អសម្រាប់ចិញ្ចឹមជីវិត ក្រោយពីបញ្ចប់វគ្គបណ្ដុះបណ្ដាលកម្រិតជំនាញវិជ្ជាជីវៈ និងបច្ចេកទេស កម្រិត C១។
ក្រុមសិក្ខាកាមពួកគាត់បានលើកឡើងថា ពួកគាត់ជឿលើសមត្ថភាពរបស់ខ្លួនឯង នឹងមានការងារធ្វើល្អមួយសម្រាប់ជីវភាពគ្រួសារ ព្រោះការខិតខំរៀនសូត្រកន្លងទាំងទ្រឹស្ដី ការអនុវត្ដន៍ និងបទពិសោធន៍ចុះកម្មសិក្សា ហើយជំនាញខ្លះក៏មានវិស័យឯកជនទទួលយកទៅធ្វើការដែរ។ មុខជំនាញវិជ្ជាជីវៈបច្ចេកទេសដែលពួកគាត់បណ្ដុះបណ្ដាលរួមមាន បរិក្ខាម៉ាស៊ីនត្រជាក់ ការថែទាំង និងជួសជុលរថយន្ដ និងការតបណ្ដាញអគ្គីសនីតាមសណ្ឋាគារ។ ពួកគាត់បានថ្លែងអំណរគុណដល់រាជរដ្ឋាភិបាល ដែលផ្ដល់ការសិក្សាជំនាញ ការស្នាក់នៅមិនគិតថ្លៃ និងផ្ដល់ថវិកាដល់ពួកគាត់ថែមទៀតផង។
បើតាមលោក ចាន់ វិចិត្រ បានបញ្ជាក់ថា ការបណ្ដុះបណ្ដាលជំនាញវិជ្ជាជីវៈ និងបច្ចេកទេសនេះ គឺអនុវត្តទៅតាមគោលនយោបាយរបស់រាជរដ្ឋាភិបាលកម្ពុជាអាណត្តិថ្មី ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រី ដោយបានគោរពទៅលើអភិក្រមចំនួន៣ គឺរៀនឱ្យចេះ រៀនអោយចប់ រៀនអោយមានការងារធ្វើ។ ជាមួយនេះវិទ្យាស្ថាននឹងបន្ដជ្រើសរើសយុវជនមកពីគ្រសារក្រីក្រ និងងាយរងហានីភ័យ ឱ្យចូលសិក្សាជាបន្ដបន្ទាប់ ដើម្បីឱ្យពួកគាត់មានជំនាញវិជ្ជាជីវៈមួយពិតប្រាកដក្នុងការប្រកបមុខរបរចិញ្ចឹមជីវិត។ លោកក៏បានអំពាវនាដល់យុវជនឱ្យចុះចូលរៀនជំនាញវិជ្ជាជីវៈ និងបច្ចេកទេសឱ្យបានច្រើន ជាពិសេសយុវជនមកពីគ្រួសារក្រីក្រ ដើម្បីងាយស្រួលចាប់យកឱ្យកាសការងារទៅថ្ងៃអនាគត។
សូមបញ្ជាក់ថា កាលពីថ្ងៃទី១៥ ខែឧសភា ឆ្នាំ២០២៤នេះ សិក្ខាកាមមកពីគ្រួសារក្រីក្រ និងគ្រួសាររងហានីភ័យជិត ២០០នាក់ បានធ្វើតេស្ដបញ្ចប់វគ្គសិក្សាកម្រិតសញ្ញាបត្របច្ចេកទេសវិជ្ជាជីវរៈរបស់ខ្លួន បន្ទាប់ពីបានបណ្ដុះបណ្ដាលរយៈពេល៤ខែ នៅវិទ្យាស្ថានជាតិពហុបច្ចេកទេសអង្គរ ខេត្ដសៀមរាប៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
