នាឱកាសទិវាជាតិនៃការចងចាំ ២០ឧសភា ឆ្នាំ២០២៤នេះ អាជ្ញាធរស្រុកបន្ទាយស្រី ខេត្តសៀមរាប បានអំពាវនាវដល់ប្អូនប្អូនប្រជាពលរដ្ឋគ្រប់រូប ចូលរួមថែរក្សា ការពារសន្តិភាពនៅកម្ពុជាឲ្យបានគង់វង្ស ដើម្បីកុំឱ្យរបបដ៏ខ្មៅងងឹតដែលកម្ពុជាធ្លាប់ជួបប្រទះត្រលប់មកវិញសារជាថ្មី។
ក្នុងឱកាសរៀបចំពិធីរំលឹកវិញ្ញាណក្ខន្ទ នៅវត្តព្រះដាក់ ស្រុកបន្ទាយស្រី នាព្រឹកថ្ងៃទី២០ ខែឧសភា ឆ្នាំ២០២៤នេះ លោក រិន ឡូត អភិបាលស្រុក មានប្រសាសន៍ថា ទិវាជាតិនៃការចងចាំ គឺជាការរម្លឹកដល់ការបាត់បង់ប្រជាជនខ្មែរប្រមាណជិត ៣លាននាក់ ក្នុងរបបប្រល័យពូជសាសន៍ប៉ុល ពត និងបានបញ្ជាក់ថាភ្នក់ភ្លើងសង្គ្រាម ដែលពលរដ្ឋខ្មែរឆ្លងកាត់ជិត ៣ទស្សវត្ស បន្សល់ទុកត្រឹមតែការឈឺចាប់។ បញ្ហាសង្គ្រាមបានធ្វើឱ្យមានទឹកភ្នែក ការកាប់សម្លាប់ ការបំផ្លិចបំផ្លាញ ការជម្លៀសចេញពីទីលំនៅ និងការបង្ខំឱ្យធ្វើការដូចសត្វធាតុជាដើម។ មិនតែប៉ុណ្ណោះ ប្រជាពលរដ្ឋកម្ពុជា ក៏ត្រូវស្លាប់ដោយគ្មានថ្នាំសង្កូវព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មានលទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិតដែលជាសិទ្ធិមូលដ្ឋានមានពីកំណើតរបស់មនុស្ស ក៏គ្មានដែរ។
លោកអភិបាលស្រុកបន្តថា កត្តាសន្តិភាព បានផ្តល់ឱកាសគ្រប់យ៉ាងដល់សង្គមកម្ពុជាយើង ក្នុងការរួមគ្នាកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនទៅមុខទៀត។ ដូច្នេះប្រជាពលរដ្ឋខ្មែរត្រូវចងចាំឲ្យជាប់ជានិច្ចនូវកត្តាសន្តិភាពនេះ ហើយត្រូវរួមគ្នាថែរក្សាការពារសន្តិភាពឱ្យបានគង់វង្ស ដើម្បីឲ្យប្រទេសជាតិយើងពោពេញទៅដោយសេរីភាពក្នុងការរស់នៅ ប្រកបរបរ និងធ្វើសកម្មភាពផ្សេងៗទៀតផងដែរ។
សូមរម្លឹកថាជូនថា ទិវាជាតិនៃការចងចាំ ២០ឧសភា មានឈ្មោះថា «ទិវាចងកំហឹង» ដើម្បីបញ្ជាក់ពីការចងកំហឹងទៅនឹងរបបខ្មែរក្រហម ដែលបានកាប់សម្លាប់ ប្រជាពលរដ្ឋខ្មែរ។ ប៉ុន្តែចាប់ពីឆ្នាំ២០១៨ នៅពេលរដ្ឋាភិបាល កំណត់យកថ្ងៃនេះជាថ្ងៃបុណ្យជាតិ ក៏មានការប្តូរឈ្មោះជា «ទិវាជាតិនៃការចងចាំ» ដើម្បីជាការរំឭកដល់ជនរងគ្រោះ និងការឈឺចាប់ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យ ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩៕
អត្ថបទ៖ លោក អ៊ុន ណារាជ្យ
រូបភាព៖ លោក ធន់ ពូថេ
