ថ្លែងក្នុងកិច្ចប្រជុំត្រៀមរៀបចំព្រឹត្តិការណ៍ជំនួបក្រុមម៉ូតូទេសចរណ៍ Siem Reap Bike Week នៅលើទឹកដីនៃខេត្តសៀមរាប នៅព្រឹកថ្ងៃទី២០ ខែឧសភា ឆ្នាំ២០២៤នេះ លោក ង៉ូវ សេងកាក់ អភិបាលខេត្ត បានជំរុញដល់គ្រប់មន្ទីរអង្គភាពពាក់ព័ន្ធ បង្កើនការយកចិត្តទុកដាក់ក្នុងនាមជាម្ចាស់ផ្ទះ ត្រៀមរៀបចំព្រឹត្តិការណ៍ដ៏ធំនេះ ធ្វើយ៉ាងណាឲ្យដំណើរការទៅដោយរលូន និងទទួលបានជោគជ័យទៅតាមការរំពឹងទុក។
សូមជម្រាបថា ក្រសួងទេសចរណ៍ ក្រោមកិច្ចសហការជាមួយអង្គការសប្បុរសធម៌ហ្វិចឆឺរ៉ាល់ រួមនឹងក្រុមហ៊ុនមួយចំនួន នឹងរៀបចំព្រឹត្តិការណ៍ជំនួបក្រុមម៉ូតូទេសចរណ៍ Siem Reap Bike Week ដែលប្រមូលផ្តុំម៉ូតូល្បីៗនៅជុំវិញតំបន់អាស៊ាន និងក្នុងប្រទេស រយៈពេល៣ថ្ងៃ ចាប់ពីថ្ងៃទី២៤-២៦ ខែឧសភា ឆ្នាំ២០២៤តទៅ នៅក្នុងបរិវេណអាកាសយានដ្ឋានចាស់ខេត្តសៀមរាប ដោយក្នុងព្រឹត្តិការណ៍នោះនឹងមានកម្មវិធីជាច្រើនទៀតដូចជា៖ ការប្រកួតកីឡាគុនខ្មែរ ការប្រគុំតន្ត្រី ស្តង់អាហារ និងកម្មវិធីផ្សេងៗជាច្រើនទៀត។
លោក ង៉ូវ សេងកាក់ មានប្រសាសន៍ថា កន្លងមកខេត្តសៀមរាប ធ្លាប់បានរៀបចំកម្មវិធីតូចធំជាច្រើន តែនេះជាលើទី១ ហើយសម្រាប់ខេត្តសៀមរាប ដែលមានការរៀបចំព្រឹត្តិការណ៍នេះឡើង ប៉ុន្តែលោកបានបង្ហាញក្ដីជឿជាក់ថា អ្នកពាក់ព័ន្ធនឹងសហការរៀបចំកម្មវិធីនេះដំណើរការទៅដោយរលូន និងទទួលបានជោគជ័យ សម្រាប់ជាមុខមាត់កម្ពុជា ជាពិសេសខេត្តសៀមរាប ទឹកដីអង្គរ។ តែក្នុងនោះលោកបានសង្កត់ធ្ងន់ថា ការរៀបចំព្រឹត្តិការណ៍ Siemreap Bike Week នាពេលខាងមុខនេះ ក៏ជាឱកាសដ៏ល្អក្នុងការជំរុញបង្កើនការផ្សព្វផ្សាយពីសក្តានុពលទេសចរណ៍ដ៏សម្បូរបែបរបស់កម្ពុជាទៅកាន់ពិភពលោកផងដែរ ដូចនេះអ្នកពាក់ព័ន្ធទាំងត្រូវចូលរួមផ្សព្វផ្សាយសម្រាប់ព្រឹត្តិការណ៍នេះឲ្យបានទូលំទូលាយ ស្របទៅនឹងយុទ្ធនាការ “ទស្សនាសៀមរាប ឆ្នាំ២០២៤” “ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤” “ឆ្នាំទេសចរណ៍ កម្ពុជា-ឥណ្ឌា” និងជាការជំរុញទេសចរណ៍ក្នុងស្រុក ក៏ដូចជារួមចំណែកជំរុញប្រសិទ្ធភាព នៃការអនុវត្តយុទ្ធសាស្ត្រ “បង្កើន៥ និងអភិវឌ្ឍ៣” របស់ក្រសួងទេសចរណ៍ទៀតផង។
ឯកឧត្ដម គុជ បញ្ញាសា រដ្ឋលេខាធិការក្រសួងទេសចរណ៍ មានប្រសាសន៍ថា ខេត្តសៀមរាប ជាខេត្តដែលមានសក្កានុពលទេសចរណ៍ដ៏ខ្លាំងក្លាបំផុតក្នុងប្រទេសកម្ពុជា ដូច្នេះព្រឹត្តិការណ៍នេះ វាក៏ជាឱកាសបង្កើននូវការទាក់ទាញចំពោះភ្ញៀវទេសចរគ្រប់មជ្ឈដ្ឋានមកទស្សនាខេត្តសៀមរាប ដែលសំបូរទៅដោយសម្បត្តិវប្បធម៌នេះ ឲ្យកាន់តែកើនឡើងបន្ថែមទៀត។ ឯកឧត្តម ក៏បានជំរុញ និងលើកទឹកចិត្តដល់ប្រជាពលរដ្ឋដែលមានបំណងចូលរួមដាក់លក់នូវផលិតផលបែបប្រពៃណីខ្មែរយើង អាចចូលរួមយកមកដាក់បង្ហាញក្នុងព្រឹត្តិការណ៍នេះបាន ដែលនេះជាផ្នែកមួយនៃការចូលរួមផ្សព្វផ្សាយពីផលិតផលរបស់ប្រទេសយើងទៅកាន់ពិភពលោកផងដែរ៕
អត្ថបទ និងរូបភាព៖ លោក ហេង វ៉ាន្នី, ហាំ ម៉េងហួត
កែសម្រួល៖ លោក អ៊ុន ណារាជ្យ
