នាព្រឹកថ្ងៃទី២១ ខែឧសភា ឆ្នាំ២០២៤នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយរដ្ឋបាលស្រុកសូទ្រនិគម បានបើកកិច្ចប្រជុំផ្សព្វផ្សាយសេចក្ដីប្រកាសកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ នៅក្នុងភូមិចំនួន៨ មានភូមិឈូក ភូមិបុស្ស ភូមិបុស្សធំ ភូមិដំរីឆ្លង ភូមិសំបាត ភូមិសំរោង ភូមិរំដេង និងភូមិជប់ នៃឃុំខ្នារពោធិ៍ ស្រុកសូទ្រនិគម ខេត្តសៀមរាប ដែលពិធីនេះធ្វើឡើងក្នុងបរិវេនវត្តត្រសាលរស្មីមានជ័យ ហៅវត្តឈូក។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានឲ្យដឹងថា ដើម្បីទទួលបានវិញ្ញាបនបត្រសម្គាល់ម្ចាស់អចលនវត្ថុយើងត្រូវអនុវត្ត ៥ដំណាក់កាល៖ ទី១.ត្រៀមរៀបចំតំបន់ធ្វើការវិនិច្ឆ័យ បង្កើតកណៈកម្មការរដ្ឋបាល ការជូនដំណឹងកិច្ចប្រជុំផ្សព្វផ្សាយ និងដំណើរការផ្សព្វផ្សាយអំពីការចុះបញ្ជីមានលក្ខណៈជាប្រព័ន្ធ, ទី២.ប្រតិបត្តិការបច្ចេកទេស គឺការកំណត់ព្រំ, ទី៣.បិតផ្សាយជាសាធារណៈនូវឯកសារនៃការវិនិច្ឆ័យ ប្លង់សុរិយាដី និងបញ្ជីឈ្មោះម្ចាស់ដី ១៥ថ្ងៃ, ទី៤.ការសម្រេចឯកសារនៃការវិនិច្ឆ័យ និងទី៥.ចេញវិញ្ញាបនបត្រសម្គាល់ម្ចាស់អចលនវត្ថុ និងចែកបណ្ណទាំងនោះជូនប្រជាពលរដ្ឋ។ លោកបញ្ជាក់ថា ក្នុងដំណាក់កាលទី៣ គឺដំណាក់កាលបិតផ្សាយជាសាធារណៈនូវឯកសារនៃការវិនិច្ឆ័យ ប្លង់សុរិយាដី និងបញ្ជីឈ្មោះម្ចាស់ដី ប្រសិនបើប្រជាពលរដ្ឋមានបញ្ហាដូចជាខុសឈ្មោះ សាវតាដី និងទំហំជាដើមនោះ អាចដាក់ពាក្យបណ្ដឹងបានមកកាន់ក្រុមការងារដែលប្រចាំការងារនៅទីនោះ ដែលមានរយៈពេល១៥ថ្ងៃ។
លោក គិម វណ្ណៈ អភិបាលស្រុកសូទ្រនិគម បានជំរុញដល់បងប្អូនប្រជាពលរដ្ឋ សូមចូលរួមក្នុងការងារកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធនេះប្រកបដោយការយោគយល់ និងអធ្យាស័យគ្នាខ្ពស់ លើការសម្រេចទុកនូវទំហំផ្លូវដែលសមស្រប ដើម្បីងាយស្រួលក្នុងការធ្វើដំណើរ និងដើម្បីបង្កលក្ខណៈងាយស្រួលនាពេលអនាគតលើប្រព័ន្ធគមនាគមន៍នៅតាមមូលដ្ឋាន ព្រោះនៅពេលដែលភូមិឃុំមានប្រព័ន្ធផ្លូវធំទូលាយ វានឹងបង្កភាពងាយស្រួលយ៉ាងច្រើនបែបច្រើនយ៉ាងសម្រាប់ការរស់នៅរបស់ពលរដ្ឋ ដូចជាការធ្វើដំណើរប្រកបដោយភាពងាយស្រួល លឿនរហ័ស និងកាត់បន្ថយពេលវេលានៃការធ្វើដំណើរ។
លោកអភិបាលស្រុកបន្តថា ផ្លូវវាក៏ជាផ្នែកមួយដែលទាក់ទាញនូវអ្នកវិនិយោគលើកផ្នែកអចនលវត្ថុ ដែលជាហេតុធ្វើឱ្យតំបន់នេះ ឬមូលដ្ឋាននេះនឹងមានសេដ្ឋកិច្ចខ្ពស់ជាបន្តបន្ទាប់ នៅពេលដែលមានលំហូរមនុស្សច្រើន នោះក៏ជាពេលដែលមានលំហូរនៅសេដ្ឋកិច្ចមកកាន់ប្រជាពលរដ្ឋក្នុងតំបន់នេះដូចគ្នា។ ដូច្នេះសំណូមពរឱ្យប្រជាពលរដ្ឋក្នុងតំបន់វិនិច្ឆ័យសម្រាប់ការចុះបញ្ជីដីធ្លីជាប្រព័ន្ធក្នុងភូមិទាំង៨នេះ ចូលរួមសហការ និងលះបង់នូវផលប្រយោជន៍ផ្ទាល់ខ្លួនបន្តិចបន្តួចមកជាផលប្រយោជន៍សម្រាប់ប្រជាពលរដ្ឋនាពេលអនាគត និងដើម្បីសង្គមជាតិយើងប្រកបដោយភាពរុងរឿង និងការអភិវឌ្ឍន៍ប្រកបដោយចីរភាព៕
អត្ថបទ និងរូបភាព៖ លោក ហេង វ៉ាន្នី
កែសម្រួល៖ លោក អ៊ុន ណារាជ្យ
