ថ្លែងក្នុងកិច្ចប្រជុំពិភាក្សាការងាររបស់គណៈកម្មការក្រុមប្រឹក្សាសកម្មភាពជនពិការខេត្តសៀមរាប នារសៀលថ្ងៃទី២០ ខែឧសភា ឆ្នាំ២០២៤ លោក នាក់ ណេរ៉ុន អភិបាលរងខេត្ត និងជាប្រធានក្រុមប្រឹក្សាជនពិការខេត្តសៀមរាប បានធ្វើការជំរុញដល់គ្រប់ភាគីទាំងអស់ ត្រូវយកចិត្តទុកដាក់ក្នុងការលើកកម្ពស់សិទ្ធិរបស់ជនមានពិការភាព ដូចជាការផ្តល់ឱកាសការងារ ការសាងសង់សំណង់គ្រឹះស្ថានសាធារណៈត្រូវបង្កលក្ខណៈងាយស្រួលដល់ពួកគាត់ជាដើម។
លោក នាក់ ណេរ៉ុន បានលើកឡើងថា គ្រប់អាណត្តិរបស់រាជរដ្ឋាភិបាលកម្ពុជា តែងតែយកចិត្តទុកដាក់យ៉ាងខ្លាំងចំពោះជនមានពិការភាព ហើយបច្ចុប្បន្នសំណង់អគារសាធារណៈមួយចំនួនក៏បានគិតគូរអំពីការបង្កលក្ខណៈងាយស្រួលដល់ពួកគាត់ផងដែរ។ ជាក់ស្តែងនៅក្នុងការស្ថាបនាផ្លូវ៣៨ខ្សែ ក្នុងក្រុងសៀមរាប ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន គឺបានសាងសង់នូវគំនូសសម្រាប់បងប្អូនជាជនដែលមានពិការភាព។ ទន្ទឹមនោះ នៅក្នុងតំបន់រមណីដ្ឋានអង្គរ ក៏គេសង្កេតឃើញថា អាជ្ញាធរជាតិអប្សរា ក៏បានយកចិត្តទុកដាក់សាងសង់ជម្រាលនៅតាមប្រាសាទមួយចំនួន ក៏ដូចជាការសាងសង់បន្ទប់ទឹកសម្រាប់ជនមានពិការភាព ដែលនេះស្តែងឲ្យឃើញពីការយកចិត្តទុកដាក់របស់បណ្តាអង្គភាពស្ថាប័នចំពោះជនមានពិការភាព។
បើទោះយ៉ាងនេះក្តី លោកអភិបាលរងខេត្ត ក៏នៅតែទទូចដល់គ្រប់បណ្តាអ្នកពាក់ព័ន្ធត្រូវចូលរួមបន្ថែមទៀត ដូចជាការរៀបចំចំណតសម្រាប់ជនពិការនៅតាមទីសាធារណៈ ហើយតាមបណ្តាមន្ទីរអង្គភាព ដែលមិនទាន់មានទីជម្រាលសម្រាប់ជនពិការ ត្រូវរៀបចំកែច្នៃយ៉ាងណាដើម្បីបង្កលក្ខណៈឲ្យពួកគាត់មានភាពងាយស្រួល។ ជាមួយគ្នានេះ ការផ្តល់ឱកាសការងារដែលសមស្របជាមួយចំណេះជំនាញរបស់ពួកគាត់ក៏ជាការរួមចំណែកនៅក្នុងការលើកកម្ពស់សិទ្ធិរបស់ពួកគាត់ដែរ។ ក្នុងសម័យបច្ចេកវិទ្យា ជនមានពិការភាពខ្លះមានចំណេះជំនាញខ្លាំងជាងមនុស្សធម្មតាផង ពួកគាត់ចង់បានការងារធ្វើ តែពួកគាត់មិនចង់បានការដាក់ទាននោះទេ។
ព័ត៌មានជាតិ ថ្មីៗ
យោងតាមរបាយការណ៍បូកសរុបលទ្ធផលការងារប្រចាំឆ្នាំ២០២៣ របស់ក្រុមប្រឹក្សាសកម្មភាពជនពិការខេត្តសៀមរាប បានឲ្យដឹងថា នៅក្នុងឆ្នាំ២០២៣ ក្រុមការងារបានកំណត់អត្តសញ្ញាណកជនមានពិការភាពដោយបានសម្ភាសន៍លើមនុស្សជាង១៧.០០០នាក់ និងបានផ្តល់បណ្ណសម្គាល់ជនមានពិការភាពចំនួន៧.៨៤៤បណ្ណ។ បើទោះបីជាមានការខិតខំយ៉ាងនេះក្តីក្រុមការងារក៏បានជួបប្រទះនូវបញ្ហាប្រឈមមួយចំនួនដូចជា ជនមានពិការភាពមួយចំនួននៅតែដើរបែបអណាធិបតេយ្យតាមទីសាធារណៈ ខ្លះមានផ្ទុកសារធាតុញៀន និងខ្លះពុំមានអសយដ្ឋានជាក់លាក់៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
