សិក្ខាកាមដែលជាមន្ត្រីរាជការ និងអ្នកស្ម័គ្រចិត្តក្នុងស្រុកបន្ទាយស្រី ប្រមាណ១០០នាក់ នៅថ្ងៃទី២១ ខែឧសភា ឆ្នាំ២០២៤នេះ បានបញ្ចប់វគ្គបណ្តុះបណ្តាល ស្តីពីការត្រៀមខ្លួនដើម្បីជួយសង្គ្រោះប្រជាជនក្នុងពេលមានគ្រោះទឹកជំនន់ បន្ទាប់ពីឆ្លងកាត់ការសិក្សាទាំងទ្រឹងស្ដី និងអនុវត្តជាក់ស្ដែង រយៈពេល២ថ្ងៃ ក្រោមការគាំទ្រពីរដ្ឋបាលខេត្តសៀមរាប ស្ថានអគ្គកុងស៊ុលចិនប្រចាំខេត្តសៀមរាប សមាគមមិត្តភាពកម្ពុជា-ចិន មូលនិធិចិន PEACELAND និងកងកម្លាំងមកពីកងពលធំអន្តរាគមន៍លេខ២ ខេត្តសៀមរាប។
លោក រិន ឡូត អភិបាលស្រុកបន្ទាយស្រី បានបញ្ជាក់ថា ការទទួលបានការបណ្តុះបណ្ដាលនេះ វាពិតជាមានសារៈសំខាន់ណាស់សម្រាប់មន្ត្រី និងអ្នកពាក់ព័ន្ធនានា ដែលជាការលើកកម្ពស់បន្ថែមនូវមូលធនមនុស្សក្នុងមូលដ្ឋាន លើជំនាញគ្រប់គ្រងគ្រោះមហន្តរាយទឹកជំនន់ ខណៈដែលស្រុកបន្ទាយស្រី តែងតែមានករណីគ្រោះទឹកជំនន់ស្ទើតែរៀងរាល់ឆ្នាំ។ ការបណ្តុះបណ្ដាលនេះដែរ ក៏បានចូលរួមចំណែកក្នុងការអនុវត្តតាមគោលនយោបាយបញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ និងចូលរួមបង្កើនកិច្ចសហប្រតិបត្តិការឆ្នាំនៃការផ្លាស់ប្តូររវាងប្រជាជនកម្ពុជា និងប្រជាជនចិនថែមទៀតផង។
លោកអភិបាលស្រុក ក៏បានលើកទឹកចិត្តដល់សិក្ខាកាមទាំងអស់ដែលបញ្ចប់វគ្គបណ្តុះបណ្ដាលនៅពេលនេះ ត្រូវយកនូវបទពិសោធន៍ចំណេះដឹងពីការសិក្សានេះទៅស្វែងយល់ និងសិក្សាបន្ថែម ដើម្បីឈានឆ្ពោះទៅរួមគ្នាចូលរួមទប់ស្កាត់បាននូវហានិភ័យនានាដែលបង្កឡើងដោយគ្រោះទឹកជំនន់ក្នុងមូលដ្ឋាន។ ជាមួយនោះលោកក៏បានបង្ហាញក្ដីជឿជាក់ថា មិត្តចិននឹងនៅបន្តយកចិត្តទុកដាក់សហការជាមួយរដ្ឋបាលស្រុកបន្ទាយស្រី សម្រាប់ការងារមនុស្សធម៌នានា ហើយរដ្ឋបាលស្រុក ក៏ត្រៀមខ្លួនរួចជាស្រេចក្នុងការធ្វើជាដៃគូក្នុងនាមជាបណ្តាក្រុងស្រុកនានារបស់ប្រទេសចិន។
សិក្ខាកាមដែលបានចូលរួមក្នុងវគ្គបណ្តុះបណ្ដាលនេះ ពួកគាត់ក៏បានបង្ហាញនូវក្ដីរីករាយដែលបានចូលរួមក្នុងវគ្គបណ្តុះបណ្ដាលមួយនេះ ដែលជាបទពិសោធន៍ថ្មីមួយទៀតសម្រាប់ពួកគាត់ ក្នុងការចូលរួមជាមួយអាជ្ញាធរ និងមន្ត្រីពាក់ព័ន្ធ លើសកម្មភាពបង្ការ ត្រៀមជួយសង្គ្រោះបងប្អូនប្រជាពលរដ្ឋក្នុងមូលដ្ឋានពេលដែលមានគ្រោះទឹកជំនន់។ ក្នុងនោះពួកគាត់បានសំណូមពរដល់ប្រទេសចិន សូមបន្តជួយបើកវគ្គបណ្តុះបណ្ដលនេះបន្ថែមទៀត ព្រោះពួកគាត់គិតថា នៅតាមមូលដ្ឋានបើសិនជាមានមន្ត្រី និងអ្នកស្ម័គ្រចិត្ត រួមនឹងប្រជាពលរដ្ឋទូទៅបានយល់ដឹងច្រើនពីការងារនេះ វានឹងមានភាពល្អប្រសើរក្នុងការការពារខ្លួន និងជួយសង្គ្រោះអ្នកដទៃនៅពេលមានគ្រោះទឹកជំនន់ទៀតផង៕
អត្ថបទ៖ លោក អ៊ុន ណារាជ្យ
រូបភាព៖ លោក ធន់ ពូថេ
