ពិធីបុណ្យវិសាខបូជា គឺជាបុណ្យ ដ៏ធំ និងសំខាន់ជាងគេ ក្នុងចំណោមពិធីបុណ្យធំៗ នៃវិស័យព្រះពុទ្ធសាសនា។ មិនថាតែនៅប្រទេសកម្ពុជាទេ ដែលតែងរៀបចំពិធីបុណ្យនេះ តែបណ្ដាប្រទេសជិត ២០០ ផ្សេងទៀត ក៏បានកំពុងរៀបចំពិធីនេះផងដែរ។ សម្រាប់ក្រុងសៀមរាប នៅពេលព្រឹក និងពេលរសៀល ថ្ងៃទី២២ ខែឧសភា ដែលជាទិវាបុណ្យវិសាខបូជានេះ គេឃើញមានការរៀបចំក្បួនដង្ហែយ៉ាងអ៊ូរអរ នៅតាមដងផ្លូវសំខាន់ៗ នៅក្នុងក្រុងសៀមរាប។
ចំពោះការប្រារព្ធទិវាបុណ្យវិសាខបូជា នៅពេលព្រឹក គេសង្កេតឃើញមានការរៀបចំ សណ្ដាប់ធ្នាប់នៅតាមដងផ្លូវ ចេញពីបរិវេណប្រាសាទបាយ័ន ឆ្ពោះទៅកាន់ក្រុងសៀមរាប ដែលជាក្បួនរថយន្តជាច្រើនគ្រឿង អមដោយបដាពាក្យស្លោកផ្សារភ្ជាប់ជាមួយអត្ដន័យនៃពិធីបុណ្យ។
ដោយឡែក នៅពេលរសៀល គេក៏ឃើញមានការនិមន្ត និងដើរ រួមនិងក្បួនរថយន្ត យ៉ាងច្រើនកុះករ ពីសំណាក់ព្រះសង្ឃ មន្ត្រីរាជការ លោកគ្រូ អ្នកគ្រូ ប្រជាពលរដ្ឋ និងសិស្សានុសិស្ស ធ្វើការដង្ហែក្បួន ដោយដំណើរចេញពីវត្តដំណាក់ ក្នុងក្រុងសៀមរាប ឆ្ពោះតាមបណ្ដោយស្ទឹងសៀមរាប និងបន្តទៅតាមផ្លូវស៊ីវត្ថា តំបន់ផាប់ស្ទ្រីត (Pub Street) និង បញ្ចប់ក្បួនដង្ហែនៅវត្តដំណាក់វិញ។
ក្នុងនោះដែរ ដើម្បីរំលឹកគុណ ដល់ព្រះសមា្មសម្ពុទ្ធ ដែលជា ព្រះបរមសាស្តានៃព្រះពុទ្ធសាសនា និងតបស្នងសងគុណចំពោះ អ្នកមានគុណទាំងឡាយ កាលពីចុងសប្ដាហ៍កន្លងនេះ សាលាអនុគណក្រុងសៀមរាប សហការជាមួយអាជ្ញាធរខេត្ត បានរៀបពិធីកោរសក់ និងបួងសក់ បំបួសកុលបុត្រ កុលធីតា ឆ្នាំទី១២ ដែលមានចំនួនសរុប ៤៥០ នាក់។ ពិធីបំបួសនេះដែរ មានគោលបំណងអប់រំ និងក្រើនរំលឹកដល់យុវជនខ្មែរ ដែលកំពុងប្រព្រឹត្តទង្វើខុសឆ្គងក្នុងសង្គម ឱ្យងាកមកអប់រំចិត្តតាមរយៈ ការស្ដាប់ព្រះធម៌ និងបដិបត្តិតាមពុទ្ធឱវាទ ដើម្បីអប់រំផ្លូវចិត្តឱ្យទទួលយកអំពើល្អ ការអប់រំណែនាំពីមាតាបិតា គ្រូអាចារ្យ ដើម្បីឱ្យក្លាយជាធនធានមនុស្សសម្រាប់ប្រទេសជាតិ នាពេលអនាគត។
គួររំលឹកថា ពិធីបុណ្យវិសាខបូជា ប្រារព្ធឡើង មានគោលបំណងរំលឹកនូវបុព្វហេតុអស្ចារ្យ ៣ប្រការរបស់ព្រះសម្មាសម្ពុទ្ឋបរមគ្រូនៃយើង។ បុណ្យនេះ ត្រូវបានរាជរដ្ឋាភិបាលចាត់ទុកជា បានចាត់ទុកជាបុណ្យជាតិ និងទទួលស្គាល់ ដោយអង្គការសហប្រជាជាតិ កាលពីនៅថ្ងៃ១៥ខែធ្នូឆ្នាំ១៩៩៩ ដែលមានសមាជិកជិត២០០ប្រទេស បានអនុម័ត ជាឯកច្ឆន្ទទទួលស្គាល់ និងចាត់ទុកបុណ្យវិសាខបូជាជាទិវាបុណ្យអន្តរជាតិដោយឈរលើហេតុពីរយ៉ាងគឺព្រះពុទ្ឋសាសនាកើតមុនសាសនាដទៃ ដោយមានភាពច្បាស់លាស់ទាំងពាក្យប្រៀនប្រដៅ និងពេលវេលាសំខាន់មួយទៀត គឺធម៌អហឹង្សាមិនឱ្យមនុស្សបៀតបៀនគ្នា និងបង្ហាញពីការចូលរួមចំណែករបស់ព្រះពុទ្ធសាសនាក្នុងពិភពលោកជាង២៥០០ឆ្នាំមកនេះ ហើយនិងកំពុងបន្តនូវឥទ្ធិពល ក្នុងការលើកស្ទួយចិត្តវិញ្ញាណរបស់មនុស្សជាតិ តទៅទៀត។
អត្ថបទ និងរូបភាព៖ លោក យូ វង្ស, និងលោក បូ សាវី
កែសម្រួល៖ លោក សេង ផល្លី
