នៅព្រឹកថ្ងៃទី២៣ ខែឧសភា ឆ្នាំ២០២៤នេះ ក្រុមប្រឹក្សាខេត្តសៀមរាប បានបើកកិច្ចប្រជុំវិសាមញ្ញដែលជាកិច្ចប្រជុំចុងក្រោយសម្រាប់អាណត្តិទី៣ ដោយបានលើកយករបៀបវារៈចំនួន២ មកពិនិត្យពិភាក្សា និងអនុម័ត ក្រោមការដឹកនាំរបស់ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប និង លោក យុន លីនណេ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលខេត្ត ដោយមានការចូលរួមពីលោកអភិបាលរងខេត្ត តំណាងមន្ទីរអង្គភាព និងមន្ត្រីរាជការពាក់ព័ន្ធជាច្រើនរូប។
ថ្លែងបើកកិច្ចប្រជុំ ឯកឧត្តម អ៊ាន ឃុន បានបញ្ជាក់ថា របៀបវារៈចំនួន២ ដែលលើកយកមកពិនិត្យ ពិភាក្សា និងអនុម័តនាថ្ងៃនេះរួមមាន៖ ទី១.ពិនិត្យ ពិភាក្សា និងអនុម័តទៅលើសេចក្តីព្រាងកំណត់ហេតុកិច្ចប្រជុុំសាមញ្ញលើកទី៦០ របស់ក្រុមព្រឹក្សាខេត្តសៀមរាប អាណត្តិទី៣ កាលពីថ្ងៃទី៧ ខែឧសភា ឆ្នាំ២០២៤ និងទី២.ពិនិត្យ ពិភាក្សា និងអនុម័តលើសេចក្តីព្រាងរបាយការណ៍បូកសរុបលទ្ធផលការងារបញ្ចប់អាណត្តិទី៣(២០១៩-២០២៤) របស់ក្រុមប្រឹក្សាខេត្តសៀមរាប។
សូមជម្រាបថា ក្នុងកិច្ចប្រជុំនោះដែរ សមាជិកនៃកិច្ចប្រជុំក៏បានលើកឡើងនូវចំណុចមួយចំនួន ដើមី្បឲ្យទីចាត់ការរដ្ឋបាលសាលាខេត្ត ធ្វើការកែសម្រួលនូវខ្លឹមសារ អត្ថន័យ អក្ខរាវិរុទ្ធ ព្រមទាំងតួលេខ នៅក្នុងរបាយការណ៍រយៈពេល៥ឆ្នាំ នៃអាណត្តិទី៣ ក្រុមប្រឹក្សាខេត្ត រួមនឹងរបាយការណ៍មួយចំនួនទៀត។ ក្នុងនោះដែរសាម៉ីមន្ទីរអង្គភាពពាក់ព័ន្ធ ក៏បានធ្វើការស្រាយបំភ្លឺទៅលើករណីទាំងនោះដើមី្បធ្វើការកែតម្រូវ ហើយករណីនៅសល់នឹងពន្លឿនក្នុងការដោះស្រាយ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះដែរ លោក យុន លីនណេ អភិបាលរងខេត្ត បានថ្លែងអំណរគុណដល់ឯកឧត្តមប្រធាន និងសមាជិកក្រុមប្រឹក្សាខេត្ត ក្នុងការដឹកនាំសម្របសម្រួលលើការងាររបស់រដ្ឋបាលខេត្ត ក្នុងមួយអាណត្តិទី៣ កន្លងមកនេះ ធ្វើឲ្យខេត្តសៀមរាបមានការអភិវឌ្ឍន៍ រីកចម្រើនទៅមុខ ទោះបីក្នុងអាណត្តិទី៣ បានរងនូវវិបត្តិជំងឺកូវីដ-១៩ ដែលធ្វើឲ្យប៉ះពាល់ដល់សេដ្ឋជាតិក៏ដោយ។ ម៉្យាងទៀតក្នុងអាណត្តិទី៣ នៃក្រុមប្រឹក្សាខេត្តនេះ ខេត្តសៀមរាបក៏ ទទួលបានសមទ្ធិផលធំៗ មានផ្លូវ៣៨ខ្សែ ការកែលម្អរដងស្ទឹងប្រវត្តិសាស្ត្រ ស្ថានីយ៍ទឹកស្អាត មន្ទីរពេទ្យ អាកាសយានដ្ឋានអន្តរជាតិសៀមរាបអង្គរ រួមនឹងសមិទ្ធិផលតូចធំជាច្រើនទៀតផងដែរ។
ថ្លែងបិទកិច្ចប្រជុំ ឯកឧត្តម អ៊ាន ឃុន បានធ្វើការវាយតម្លៃខ្ពស់អំពីលទ្ធផលដែលក្រុមប្រឹក្សាខេត្ត រដ្ឋបាលខេត្តអនុវត្តបានក្នុងអាណត្តិទី៣នេះ ដែលទទួលបានសមទ្ធិផលជាច្រើន ដើម្បីបម្រើដល់ផលប្រយោជន៍ប្រជាពលរដ្ឋ ភ្ញៀវជាតិ អន្តរជាតិ ដែលចូលមកកាន់ខេត្តប្រវត្តិសាស្ត្រមួយនេះ។ ឯកឧត្តមក៏បានធ្វើការថ្លែងអំណរគុណដល់ថ្នាក់ដឹកនាំគ្រប់ជាន់ថ្នាក់ រដ្ឋបាលក្រុងស្រុក ឃុំសង្កាត់ និងមន្ត្រីរាជការ កងកម្លាំងទាំងបី ដែលបានរួមសហការគ្នាល្អ ដើមី្បធានានូវសុវត្ថិភាព សន្តិសុខ សណ្តាប់ធ្នាប់សាធារណៈ និងអនុវត្តបានល្អលើគោលនយោបាយភូមិឃុំសង្កាត់មានសុវត្ថិភាព។ ជាមួយនោះឯកឧត្តម ក៏បានធ្វើការណែនាំដល់រដ្ឋបាលខេត្ត ក្រុងស្រុក និងថ្នាក់ដឹកនាំមន្ទីរ និងកងកម្លាំងទាំងបី បន្តអនុវត្តក្នុងអាណត្តិទី៤ នៃក្រុមប្រឹក្សាខេត្តសៀមរាប បានរួមសហការគ្នាបានល្អក្នុងការអនុវត្តតួនាទីភារកិច្ច ស្របទៅនឹងគោលនយោបាយរបស់រាជរដ្ឋាភិបាល។ ម៉្យាងទៀតក៏ត្រូវបន្តការផ្តល់សេវាសាធារណៈ ជូនប្រជាពលរដ្ឋឲ្យបានទាន់ពេលវេលា សំដៅលើកកម្ពស់ជីវភាពរបស់ប្រជាពលរដ្ឋឲ្យកាន់តែមានភាពប្រសើរឡើងថែមទៀត៕
អត្ថបទ៖ កញ្ញា ប្រន ស្រីនិត
រូបភាព៖ លោក អ៊ុន ណារាជ្យ
