គម្រោងសាងសង់ផ្លូវបេតុងអាមេចំនួន ៧ខ្សែក្នុងខេត្តសៀមរាប រួមមាន៖ក្នុងឃុំជ្រោយនាងងួន ស្រុកស្រីស្នំចំនួន៦ខ្សែ និងក្នុងឃុំគោល ស្រុកអង្គរជុំ ១ខ្សែ ត្រូវបានប្រកាសបិទបញ្ចប់ការដេញថ្លៃដោយជោគជ័យ នៅថ្ងៃទី២៣ ខែឧសភា ឆ្នាំ២០២៤នេះ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ នឹងអ្នកពាក់ព័ន្ធមួយចំនួនទៀត។
លោក កែវ កី ប្រធានគណៈកម្មការលទ្ធឃុំជ្រោយនាងងួន ស្រុកស្រីស្នំ បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំជ្រោយនាងងួន បានដាក់ដេញថ្លៃគម្រោងសាងសង់ផ្លូវបេតុងអាមេ ៦ខ្សែ ប្រវែង១៨០ម៉ែត្រ ទទឹងផ្លូវ៥ម៉ែត្រ កម្រាស់០.១៥ម៉ែត្រ និងស្លាកសញ្ញាគម្រោងចំនួន៦ ក្នុងតម្លៃប៉ាន់ស្មាន ១២៣.៣៣៤.៦៩៨រៀល ដោយមានក្រុមហ៊ុនដាក់សំណើរចំនួន ៧ក្រុមហ៊ុន។ ជាលទ្ធផលបានទៅលើក្រុមហ៊ុន យ៉ែម សុងីម ក្នុងតម្លៃ ៥០.៤០០.០០០រៀល។
ដោយឡែកប្រធានគណៈកម្មការលទ្ធឃុំគោល ស្រុកអង្គរជុំ លោក វ៉ៃ ហុង ក៏បានឲ្យដឹងដែរថា ចំពោះគម្រោងមូលនិធិឃុំឆ្នាំ២០២៤នេះ ឃុំគោល បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង១៧៥ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ ស្លាកសញ្ញាគម្រោង១ ព្រមទាំងលូចាក់បេតុងការពារផ្លូវ៤កង់ ក្នុងតម្លៃប៉ាន់ស្មាន១០៦.៥០៨.០០០រៀល ដោយមានក្រុមហ៊ុនដាក់សំណើរចំនួន៥។ ជាលទ្ធផលបានទៅលើក្រុមហ៊ុន មុិញ អ៊ា ក្នុងតម្លៃ ៤៩.៧០០.០០០រៀល។
ក្រោយពីបញ្ចប់ការដេញថ្លៃតំណាងក្រុមហ៊ុនម៉ៅការទាំងពីរ ដែលទទួលបានការម៉ៅការចំពោះគម្រោងខាងលើ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
