ថ្លែងនៅក្នុងពិធីផ្សព្វផ្សាយប្រកាសកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈប្រព័ន្ធក្នុងភូមិចំនួន៧ នៃឃុំបឹងមាលា ស្រុកស្វាយលើ ខេត្តសៀមរាប នាថ្ងៃទី២៣ ខែឧសភា ឆ្នាំ២០២៤ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានអំពាវនាវដល់បងប្អូនប្រជាពលរដ្ឋទាំងអស់ដែលជាម្ចាស់ដី ឬអ្នកកាន់កាប់ដី សូមចូលរួមសហការជាមួយក្រុមការងារជំនាញចុះវាស់វែងដីធ្លី ដោយចូលរួមបោះបង្គោលព្រំដីដោយបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារមួយចំនួនដែលពាក់ព័ន្ធទុកឲ្យរួចរាល់។
លោក ស៊ុន សុជាតិ បានបញ្ជាក់ថា ឯកសារដែលពាក់ព័ន្ធរួមមានដូចជា៖ អត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ សំបុត្រកំណើត សំបុត្រអាពាពិពាហ៍ និងអត្តសញ្ញាណក្បាលដីដូចជា ប័ណ្ណកម្មសិទ្ធិ បង្កាន់ដៃទទួលពាក្យ លិខិតលក់ទិញ លិខិតផ្ទេរសិទ្ធ សេចក្តីសំរេចរបស់តុលាការ ជាមុនសិន មុននឹងដំណើរការនៃការកំណត់ព្រំ វាស់វែង វិនិច្ឆ័យឈានចូលមកដល់។
ក្នុងឱកាសនោះដែរ លោក អៀង ពិសិដ្ឋ អភិបាលស្រុកស្វាយលើ មានប្រសាសន៍ថា ដើម្បីសម្រេចទៅដល់ការចេញវិញ្ញាបនបត្រសម្គាល់ម្ចាស់អចលនទ្រព្យគឺទាមទារឱ្យម្ចាស់ក្បាលដីជាអ្នកកំណត់ព្រំជាមួយអ្នកជិតខាង ចំណែកមន្ត្រីបច្ចេកទេសគ្រាន់តែជាអ្នកវាស់វែងទៅតាមព្រំដែលចង្អុលបង្ហាញដោយម្ចាស់ដីតែប៉ុណ្ណោះ។ ដូច្នេះសូមឱ្យមានការឯកភាពគ្នាដោយដាំបង្គោលរឹងមាំទុកជាមុនសិន មុនក្រុមការងារទៅដល់ ជាមួយនេះម្ចាស់ដីក៏ត្រូវត្រៀមឯកសារចាំបាច់មួយចំនួនផងដែរ។ លោកអភិបាលស្រុកបានសំណូមពរដល់អាជ្ញាធរឃុំ មេភូមិ ឬចាស់ព្រឹទ្ឋាចារ្យក្នុងភូមិត្រូវចូលរួមគ្រប់ដំណើរការអនុវត្តការងារនេះឱ្យបានជាប់ជាប្រចាំដើម្បីធានាឱ្យមានតម្លាភាព ច្បាស់លាស់ត្រឹមត្រូវ និងដោះស្រាយបញ្ហាឱ្យទាន់ពេលវេលា និងឆាប់រហ័សដោយភាពទទួលខុសត្រូវ។
សូមជំរាបថា ខេត្តសៀមរាបជាខេត្តមួយក្នុងចំណោមខេត្តអាទិភាពទាំង ២៥រាជធានី-ខេត្ត ដែលត្រូវបានអនុវត្តការចុះបញ្ជីដីធ្លីមានលក្ខណៈជាប្រព័ន្ឋរបស់កម្មវិធីអនុវិស័យរដ្ឋបាលដីធ្លីដែលគាំទ្រថវិកាដោយរាជរដ្ឋាភិបាល ក្រោមការដឹកនាំដោយក្រសួងរៀបចំដែនដីនគរូបនីយកម្ម និងសំណង់ និងអនុវត្តដោយមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ដោយមានកិច្ចសហការពីអាជ្ញាធរដែនដីជាពិសេសតាមការចង្អុលបង្ហាញរបស់អភិបាលខេត្តសៀមរាប៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
