ផ្សារផលិតផលកម្ពុជា ជាទីតាំងប្រមូលផ្តុំដោយផលិតផលដែលជាស្នាដៃនៃការច្នៃប្រឌិតរបស់កូនខ្មែរ នៅតាមបណ្តោយផ្លូវឧកញ៉ា អ៊ុំឃុន ក្នុងក្រុងសៀមរាប កំពុងទទួលបានការចាប់អារម្មណ៍ និងការគាំទ្រយ៉ាងខ្លាំងពីសំណាក់អ្នកទេសចរជាជនបរទេស ទៅលើផលិតផលកែច្នៃជាច្រើនដូចជា គ្រឿងអលង្កាច្នៃចេញពីសំបកគ្រាប់កាំភ្លើង គ្រឿងអលង្ការច្នៃចេញថ្មភក់ ច្នៃចេញគ្រាប់ធញ្ញជាតិ និងវត្ថុសិល្បៈរបស់ខ្មែរយើងជាច្រើនមុខរាប់មិនអស់។
អ្នកស្រី ភក្តី ដែលជាអាជីវករលក់សម្លៀកបំពាក់ដែលច្នៃចេញអំពីក្រណាត់ស៊ឹងខ្មែរនៅក្នុងផ្សារខាងលើ បានឲ្យដឹងថា កន្លងមកប្រធានគ្រប់គ្រងផ្សារ បានខិតខំយ៉ាងខ្លាំងនៅក្នុងការផ្សព្វផ្សាយ ដើម្បីឲ្យអ្នកទេសចរបានដឹង បានស្គាល់អំពីទីកន្លែងដែលមានសុទ្ធសឹងជាស្នាដៃកូនខ្មែរមួយនេះ។ ប៉ុន្តែបើទោះជាយ៉ាងនេះក្តី គេសង្កេតឃើញអ្នកទេសចរបរទេសមកកាន់ផ្សារនេះ មានចំនួនច្រើនជាងជនជាតិខ្មែរ។ អ្នកស្រីថា ភ្ញៀវទេសចរណ៍ជាតិហាក់បីដូចជារំលង ឬអាចមកពីបងប្អូនខ្មែរយើងមិនទទួលបានព័ត៌មាន ឬមិនចាប់អារម្មណ៍។
ចំណែកលោក ម៉ន ជា សិល្បករផ្នែកគំនូរ និងជាអាជីវករនៅក្នុងផ្សារនេះ ក៏បង្ហាញនូវការយល់ឃើញប្រហាក់ប្រហែលនឹងអាជីវករដទៃទៀតដែរ។ ក្នុងនោះពួកគាត់អំពាវនាវដល់បងប្អូនខ្មែរដែលអញ្ជើញមកលេងខេត្តសៀមរាប គួរតែមកទស្សនានៅផ្សារកសិផលកម្ពុជានេះ ដើម្បីឈ្វេងយល់ថា ផលិតផលខ្មែរយើងមានអ្វី? ហើយក៏ជាការផ្លាស់ប្តូរបទពិសោធន៍គ្នាទៅវិញទៅមកដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
