នៅព្រឹកថ្ងៃទី២៧ ខែឧសភា ឆ្នាំ២០២៤នេះ ប្រជាពលរដ្ឋចំនួន៣០០គ្រួសារ រស់នៅក្នុងចំនួន១២ នៃក្រុងសៀមរាប បានទទួលអំណោយជាគ្រឿងឧបភោគបរិភោគពីព្រះចៅអធិការវត្តប្រាសាទគោកចក ក្រុងសៀមរាប និងសប្បុរសជននៃសមាគមសង្រ្គោះជីវិត ប្រទេសសឹង្ហបុរី ដែលអំណោយរួមមាន៖ អង្ករ មី ទឹកស៊ីអ៊ីវ បេងឆា និងថវិកាមួយចំនួនទៀត។
លោក Goh Tung Hong ប្រធានសមាគមសង្រ្គោះជីវិត នៃប្រទេសសិង្ហបុរី បានបញ្ជាក់ថា សមាគមសង្រ្គោះជីវិត គឺជាសមាគមមួយដែលមិនបម្រើនឲ្យយោបាយណាមួយឡើយ គឺបម្រើតែចលនាមនុស្សធម៌នៅលើកពិភពលោកនេះ។ ជាក់ស្ដែងថ្ងៃនេះក្រុមការងារ បាននាំយកអំណោយមួយចំនួនមកចែកជូនដល់បងប្អូន ដើម្បីជាការជួយដោះស្រាយ និងសម្រាលនូវការខ្វះខាតរបស់បងប្អូនចំពោះមុខបានមួយរយៈ ហើយសមាគមលោកនឹងបន្តជួយដល់ប្រជាពលរដ្ឋកម្ពុជា ដែលជួបការខ្វះខាតនៅតំបន់មូលដ្ឋានផ្សេងៗបន្តទៀត។
ក្នុងនាមអាជ្ញាធរខេត្ត លោក សុខ ថុល អភិបាលរងខេត្ត បានថ្លែងអំណរព្រះគុណ និងអរគុណ ចំពោះព្រះគ្រូចៅអធិការវត្ត និងសប្បុរសជននៃសមាគមសង្រ្គោះជីវិត នៃប្រទេសសិង្ហបុរី ដែលបាននាំយកអំណោយចែកជូនដល់បងប្អូនប្រជាពលរដ្ឋនាពេលនេះ ដើម្បីចូលរួមដោះស្រាយទុក្ខលំបាករបស់ប្រជាពលរដ្ឋក្រីក្រ ជាមួយរាជរដ្ឋាភិបាលកម្ពុជា។ កាយវិការសប្បុរសធម៌នេះ វានឹងធ្វើឲ្យក្លាយជាកាលនុវត្តភាពក្នុងការរឹតចំណងសាមគ្គីភាព និងការពង្រឹងកិច្ចទំនាក់ទំនង សហប្រតិបត្តិការល្អរវាងប្រទេសជាតិ និងប្រជាជនទាំងពីរកាន់តែមានភាពរឹងមាំទ្វេរឡើង។ ក្នុងនីតិកាលទី៧នេះរាជរដ្ឋាភិបាលកម្ពុជា ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី បានកំពុងជំរុញនូវការអភិវឌ្ឍន៍លើគ្រប់វិស័យ ទាំងនៅទីប្រជុំជន និងជនបទ ក្នុងគោលដៅកាត់បន្ថយភាពក្រីក្ររបស់ប្រជាជន ក្នុងការជម្រុញកំណើនការងារ តាមរយៈការបង្កនូវលក្ខណៈងាយស្រួល លើបរិស្ថានវិនិយោគនៅតាមបណ្តាមូលដ្ឋានទូទាំងប្រទេស។ ម៉្យាងទៀតក៏បានពង្រឹងនូវកិច្ចសហប្រតិបត្តិការអន្តរជាតិ ជាមួយបណ្តាប្រទេសនានា ស្របតាមគោលនយោបាយបើកចំហរជើងមេឃរបស់រាជរដ្ឋាភិបាល ។
មានប្រសាសន៍ក្នុងឱកាសនោះដែរ ឯកឧត្តមឧកញ៉ា បណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប បានធ្វើការវាយតម្លៃខ្ពស់ ចំពោះស្មារតីសប្បុរសធម៌របស់សប្បុរសជនសមាគមសង្រ្គោះជីវិត ក្នុងការជួយសម្រួលដល់ការលំបាករបស់គ្រួសារខ្វះខាត នៅសង្កាត់ទាំង១២ក្នុងក្រុងសៀមរាប ដែលធ្វើឲ្យវប្បធម៌នៃការទំនាក់ទំនងរវាងប្រជាជនទាំងពីរ កម្ពុជា-សិង្ហបុរី កាន់តែធ្វើឲ្យចំណងមិត្តភាព សាមគ្គីភាព កិច្ចសហប្រតិបត្តិការប្រទេសទាំងពីរស្ថិតស្ថេរជានិច្ចនិរន្តទៅអនាគត។ ឯកឧត្តមក៏បានណែនាំដល់បងប្អូនប្រជាពលរដ្ឋត្រូវជំរុញកូនចៅរបស់ខ្លួនឲ្យបានចូលទៅសិក្សារៀនសូត្រឲ្យបានខ្ពស់ៗគ្រប់ៗគ្នា ក្នុងការកសាងបណ្តុះបណ្តាលនូវធនធានមនុស្សនៅកម្ពុជា មានការអភិវឌ្ឍន៍រីកចម្រើននាពេលអនាគត។ ឯកឧត្តមក៏បានសំណូមពរដល់សប្បុរសជន បន្តសកម្មភាពរបស់ខ្លួននៅកម្ពុជាបន្តទៀត ក្នុងការចូលរួមអភិវឌ្ឍន៍ជាមួយរាជរដ្ឋាភិបាលកម្ពុជា ដូចជាការសាងសង់អគារសិក្សា មណ្ឌលសុខភាព ផ្លូវថ្នល់ អណ្តូងទឹកស្អាត និងបង្គន់អនាម័យ បរិស្ថានផងដែរ៕
អត្ថបទ និងរូបភាព៖ លោក យូ វង្ស, ទ្រា ពន្លឺ
កែសម្រួល៖ លោក អ៊ុន ណារាជ្យ
