ស្នងការនគរបាលខេត្ដសៀមរាប លោកឧត្ដមសេនីយ៍ទោ ហួត សុធី បានបង្ហាញការប្ដេជ្ញាចិត្ដអនុវត្ដន៍យ៉ាងម៉ឺងម៉ាត់ ចំពោះក្រុមក្មេងទំនើងដែលធ្វើសកម្មភាពណាមួយប៉ះពាល់ដល់សន្ដិសុខសង្គមជាតិ និងសុខសុវត្ថិភាពដល់ភ្ញៀវទេសចរនៅក្នុងខេត្តទេសចរណ៍មួយនេះ តាមយុទ្ធសាស្ដ្របារចកចេញពីទឹកឱ្យអស់ និងពន្លត់រងើកភ្លើងឱ្យអស់មិនបាច់អង្គុយបក់ផ្សែង។
លោកឧត្ដមសេនីយ៍ទោ ហួត សុធី បានបញ្ជាក់ថា បច្ចុប្បន្ននេះនៅតាមបណ្ដាស្រុកមួយចំនួនក្នុងខេត្ដសៀមរាប មានក្មេងទំនើងបង្កបញ្ហាដល់តំបន់ទេសចរណ៍ ក៏ដូចជាធ្វើសកម្មដេញកាប់ចាក់គ្នាយ៉ាងអនាធិបតេយ្យ។ ចាប់ពីពេលនេះតទៅ ស្នងការនគរបាលខេត្ដសៀមរាប នឹងអនុវត្ដតាមបញ្ជារាជរដ្ឋាភិបាល នឹងមិនឱ្យមានក្មេងទំនើងធ្វើសកម្មភាពបានទៀតឡើយ បើទោះបីពួកគេបង្កបញ្ហាដល់សង្គមនៅកន្លែងណាក៏ដោយ។ ជាមួយនោះអធិការរដ្ឋាននគរបាលក្រុងស្រុកទាំងអស់ ត្រូវអនុវត្ដន៍លុបបំបាត់ក្មេងទំនើបឱ្យបានគ្រប់រូបភាព និងធ្វើឡើង២៤ លើ២៤ម៉ោង។
លោកឧត្ដមសេនីយ៍ទោ ក៏បានឲ្យដឹងដែរថា ក្នុងខែឧសភានេះ សមត្ថកិច្ចយើងបានបង្ក្រាបសកម្មភាពក្មេងទំនើងចំនួន៦នាក់ បញ្ជូនទៅតុលាការអនុវត្ដតាមនិតិវិធី។ ក្នុងនោះលោកក៏បានអំពាវនាវដល់ស្ថាប័នតុលាការ ត្រូវអនុវត្តច្បាប់ចំពោះក្មេងទំនើងនេះឱ្យបានត្រឹមត្រូវ និងម៉ត់ចត់ ដើម្បីពង្រឹងនូវគុណភាពនៃការអនុវត្តច្បាប់កម្ពុជា ឱ្យកាន់តែល្អប្រសើរបន្ថែមទៀត ហើយអាណាព្យាបាលគ្រប់រូបត្រូវចូលរួមអប់រំកូនចៅឱ្យបានល្អប្រសើរ ដើម្បីសុខសន្ដិភាពនៅក្នុងសង្គម៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
