កាលពីថ្ងៃទី២៧ ខែឧសភា ឆ្នាំ២០២៤នេះ សិក្ខាកាមចំនួន១៣៧នាក់ មកពីគ្រួសារក្រីក្រ និងគ្រួសារងាយរងហានិភ័យក្នុងខេត្តសៀមរាប បានធ្វើតេស្តវាយតម្លៃសមត្ថភាពបញ្ចប់វគ្គបណ្តុះបណ្តាល បន្ទាប់ពីបានធ្វើការសិក្សារយៈពេល៤ខែកន្លងមក ក្នុងកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវ:
នៅវិទ្យាស្ថានពហុបច្ចេកទេសភូមិភាគតេជោសែនសៀមរាប។
ឯកឧត្ដម ប៉ុក ប៉ាន់ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ថា កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវ:នេះ រៀបចំឡើងស្របតាមការតម្រង់ទិសគោលនយោបាយរបស់រាជរដ្ឋាភិបាល ដោយធានាថា ពលរដ្ឋម្នាក់មានជំនាញមួយយ៉ាងតិចប្រចាំជីវិត និងអនុវត្តតាមអភិក្រមរបស់សម្ដេចធិបតីនាយករដ្ឋមន្ត្រី គឺសិស្សត្រូវរៀនឱ្យចប់ ឱ្យចេះ ឱ្យមានការងារ។ ចំពោះការសិក្សាទៅលើជំនាញ C1 នេះ គឺពិតជាបានជួយចូលរួមចំណែកសំខាន់ណាស់ក្នុងការជួយដល់ប្រជាពលរដ្ឋក្រីក្រឱ្យពួកគាត់មានការងារធ្វើសម្រាប់ជួយជីវភាពគ្រួសារនៅពេលបញ្ចប់ការសិក្សា។
ឯកឧត្ដមរដ្ឋលេខាធិការបានបញ្ជាក់ថា នេះជាផែនការបណ្ដុះបណ្ដាលជំនាញដល់យុវជនក្រីក្រ និងរងហានីភ័យចំនួន ១.៥លាននាក់ ក្នុងរយៈពេល៥ឆ្នាំរបស់រាជរដ្ឋាភិបាល។ ដូចនេះសូមឲ្យអាជ្ញាធរមូលដ្ឋាន ត្រូវតាមដានដល់ប្រជាពលរដ្ឋដែលមានជីវភាពគ្រួសារខ្វះខាត និងគ្រួសារងាយរងហានីភ័យ ហើយជំរុញឱ្យពួកគាត់ចូលរួមចុះឈ្មោះចូលរៀនវគ្កបណ្ដុះបណ្ដាលនូវជំនាញ វិជ្ជាជីវៈ និងបច្ចេកទេសនេះ ឱ្យបានច្រើន ស្របទៅតាមពាក្យស្លោកថា មនុស្សម្នាក់ត្រូវមានជំនាញមួយប្រចាំជីវិត។
បើតាមលោកស្រី ផង់ ពុទ្ធី នាយិកាវិទ្យាស្ថានពហុបច្ចេកទេសភូមិភាគតេជោសែន សៀមរាប បានឲ្យដឹងថា សិក្ខាកាមដែលបានធ្វើតេស្ដបញ្ចប់កម្រិតសញ្ញាបត្របច្ចេកទេស និងវិជ្ជាជីវៈមួយនេះ មានចំនួន១៣៧នាក់ លើ៥មុខជំនាញ រួមមាន៖ ការតណ្ដាញអគ្គិសនី សេវាកម្មបរិក្ខាម៉ាស៊ីនត្រជាក់ ជំនាញការរចនាក្វ្រាហ្វិកដោយកុំព្យូទ័រ ជំនាញសំអាងកាយ ជំនាញជំនួយការចុងភៅ ដោយពួកគាត់បានសិក្សារយៈពេល ៤ខែកន្លងមក ទាំងទ្រឹស្ដី ការអនុវត្ដ និងចុះកម្មសិក្សា។
សូមបញ្ជាក់ថា ផែនការបណ្ដុះបណ្ដាលជំនាញដល់យុវជនក្រីក្រ និងរងហានីភ័យចំនួន ១.៥លាននាក់ ក្នុងរយៈពេល៥ឆ្នាំរបស់រាជរដ្ឋាភិបាល វិទ្យាស្ថានពហុបច្ចេកទេសភូមិភាគតេជោសែនសៀមរាប បានទទួលចុះឈ្មោះយុវជនក្រីក្រ និងគ្រួសាររងហារនីភ័យ ជំហ៊ានទី១ បានជាង ៣៤០នាក់ និងការទទួលឱ្យចូលរៀនជំហ៊ានទី២ នឹងត្រូវចាប់ផ្ដើមចូលរៀននៅដើមខែមិថុនា ឆ្នាំ២០២៤ខាងមុខនេះ។ ក្នុងនោះយុវជនមកពីគ្រួសារក្រីក្រ និងគ្រួសាររងហានីភ័យ ក៏បានទទួលប្រាក់ឧបត្ថម្ភ ២៨ម៉ឺនរៀល ក្នុងមួយខែ រយៈពេលមួយ៤ខែផងដែរ៕
អត្ថបទ និងរូបភាព៖ លោក ជា ស្រស់ , បូ សាវី
កែសម្រួល៖ លោក អ៊ុន ណារាជ្យ
