នៅព្រឹកថ្ងៃទី៣០ ខែឧសភា ឆ្នាំ២០២៤នេះ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានអញ្ជើញជាអធិបតីបញ្ចុះបឋមសិលាចាប់ដំណើរការសាងសង់ស្ពានបេតុងឆ្លងស្ទឹងខាងមុខវត្តគោកដូងសំរោងក្លាង ព្រំប្រទល់នៃស្រុកក្រឡាញ់ ខេត្តសៀមរាប និងស្រុកព្រះនេត្រព្រះ ខេត្តបន្ទាយមានជ័យ ដែលជាសមិទ្ធិផលថ្មីមួយទៀតសម្រាប់បម្រើដល់ប្រជាពលរដ្ឋក្នុងមូលដ្ឋាននៃស្រុកទាំង២ ឆ្លងកាត់ប្រចាំថ្ងៃ។
លោក សុខ ណារ៉េត អភិបាលស្រុកក្រឡាញ់ បានឲ្យដឹងថា ស្ពាននេះមានបណ្តោយ៤៥ម៉ែត្រ ទទឹង៦.៣០ម៉ែត្រ មានទីតាំងស្ថិតនៅទល់មុខវត្តគោកដូងសំរោងក្លាង ក្នុងភូមិក្រឡាញ់ ឃុំក្រឡាញ់ ស្រុកក្រឡាញ់ ខេត្តសៀមរាប ដែលការសាងសង់នេះផ្តួចផ្តើមឡើងដោយព្រះចៅអធិការវត្ត ព្រះសង្ឃ អាចារ្យ គណៈកម្មការ ហើយគ្រោងនឹងចំណាយថវិកាប្រមាណ២០ម៉ឺនដុល្លារ។ ដើមឡើយការធ្វើដំណើរឆ្លងទៅមករបស់ប្រជាពលរដ្ឋក្រៅពីតាមបណ្តោយផ្លូវជាតិ គឺប្រើប្រាស់ស្ពានយោលចំនួន ១០កន្លែង។ ដោយមើលឃើញពីការលំបាករបស់ប្រជាពលរដ្ឋទាំងពីរស្រុកក្នុងការធ្វើការដំណើរប្រាស្រ័យទាក់ទងគ្នាទៅវិញទៅទៅមក ក៏ដូចជាការសំរួលដល់ការដឹកជញ្ជូនទំនិញផ្សេងៗ ទើបព្រះសង្ឃ និងប្រជាពុទ្ឋបរិស័ទចំណុះជើងវត្តបានឯកភាពគ្នាសាងសង់ស្ពាននេះឡើង។
ឯកឧត្តម សៀង ណាំ មានប្រសាសន៍ថា ស្ពានបេតុងថ្មីដែលចាប់ផ្ដើមសាងសង់នេះ នឹងក្លាយទៅជាសមិទ្ឋផលថ្មីមួយទៀត ដែលផុសចេញពីសន្តានចិត្តដ៍ប្រពៃថ្លៃថ្លាររបស់ព្រះចៅអធិការ ព្រះសង្ឃ គណៈកម្មការវត្ត ប្រជាពុទ្ឋបរិស័ទនិងសប្បុរសជនជិតឆ្ងាយ ដែលបានលះបង់ធនធានដើម្បីកសាង ជាពិសេសបានការសហការសម្របសម្រួលពីអាជ្ញាធរមូលដ្ឋានគ្រប់លំដាប់ថ្នាក់ និងសបញ្ជាក់ឱ្យឃើញពីការរីកចម្រើននៃវិស័យពុទ្ឋចក្រនៅកម្ពុជាមួយកម្រិតទៀត។ សមិទ្ធផលនេះ បញ្ជាក់ឲ្យឃើញពីការរីកចម្រើននៃប្រទេសជាតិ មានភាពសុខសាន អភិវឌ្ឍរីកលូតលាស់លើគ្រប់វិស័យក្រោមការដឹកនាំដ៏ឈ្លាវៃរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី ដែលជាថ្នាក់ដឹកនាំពោរពេញទៅដោយសមត្ថភាព និងជាអ្នកបន្តវេនប្រកបដោយសក្តានុពល ពីសម្តេចតេជោ ហ៊ុន សែន អតីតនាយករដ្ឋមន្រ្តី ដែលជាមគ្គុទេសក៍ឯក ជាស្ថាបនិកនៃសន្តិភាព និងការបង្រួបបង្រួមជាតិខ្មែរ។
ឯកឧត្តមមានប្រសាសន៍ទៀតថា ក្នុងតម្រាព្រះពុទ្ឋសាសនា ការចូលរួមធ្វើផ្លូវ ជីកស្រះ ជីកអណ្តូងទឹក សង់ស្ពានជាដើម គឺបានបុណ្យទាំងយប់ទាំងថ្ងៃ និយាយរួមការសង់ស្ពាន និងផ្លូវ គឺបានផលប្រយោជន៍ច្រើនណាស់ ចូលរួមកាត់បន្ថយការលំបាក ជួយសម្រួលដល់ការធ្វើដំណើរ និងការដឹកជញ្ជូនផ្សេងៗបានងាយស្រួល ឆាប់រហ័ស ដែលកត្តានេះនឹងរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋយើង។ ជាមួយគ្នានេះឯកឧត្តម ក៏បានប្រគេនថវិកាចំនួន ២ម៉ឺនដុល្លារសម្រាប់ជួយក្នុងការសង់ស្ពាននេះផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
