នៅព្រឹកថ្ងៃទី៣០ ខែឧសភា ឆ្នាំ២០២៤ លោក សំកុល សុចិត្រា អភិបាលរងខេត្តសៀមរាប តំណាងឯកឧត្តម ប្រាក់ សោភ័ណ អភិបាលខេត្ត រួមនឹងថ្នាក់ដឹកនាំខេត្តមួយចំនួនទៀត បានទទួលជួបសម្តែងការគួសម និងពិភាក្សាការងារជាមួយប្រតិភូស្រុកសាវយ៉ាង (Shaoyang) នៃសាធារណរដ្ឋប្រជាមានិតចិន ដឹកនាំដោយលោក កុង ហុងកូវ (Gong Hongguo) សមាជិកគណៈកម្មាធិការអចិន្ត្រៃយ៍បក្សកុម្មយនីស្តចិន និងជាប្រជាននាយកដ្ឋានការងាររណសិរ្សរួបរួមស្រុក Shaoyang និងសហការី។
លោក សំកុល សុចិត្រា បានលើកឡើងថា ខេត្តសៀមរាប ពឹងផ្អែកទៅលើវិស័យកសិកម្ម និងទេសចរណ៍ ដោយប្រជាពលរដ្ឋចំនួន៨០ភាគរយ ជាប្រជាកសិករ។ ខេត្តសៀមរាបជាខេត្តសម្បូរទៅដោយសម្បត្តិវប្បធម៌ និងរមណីយដ្ឋានធម្មជាតិ គឺមានប្រាង្គប្រាសាទ ដែលបានចុះបញ្ចូលជាសម្បត្តិបេតិកភណ្ឌវប្បធម៌ពិភពលោករបស់មនុស្សជាតិទៀតផង។ ខេត្តសៀមរាប ជាខេត្តមួយដែលបានចងសម្ព័ន្ធមេត្រីភាពជាមួយបណ្តាខេត្តក្រុង នៃសាធារណរដ្ឋប្រជាមានិតចិនច្រើនជាងគេនៅកម្ពុជា។ ទោះបីខេត្តមានសម្ព័ន្ធមេត្រីភាពច្រើនក៏ពិតមែន តែតម្រូវការចាំបាច់របស់ខេត្ត នូវតែស្វែងរកនូវដៃគូចូលមកវិនិយោគក្នុងខេត្តជាបន្តលើវិស័យកសិកម្ម និងទេសចរណ៍ ដើមី្បបំពេញនូវតម្រូវការរបស់ភ្ញៀវ។ លោកសំណូមពរដល់ប្រតិភូជួយធ្វើការផ្សព្វផ្សាយ ពីសក្តានុពលរបស់ខេត្តសៀមរាប ជូនទៅប្រជាជនក្នុងស្រុកសាវយ៉ាង ក៏ដូចប្រជាជនចិនទាំងមូលចូលមកធ្វើទេសចរ និងវិនិយោគ ព្រមទាំងបើកការហោះហើរត្រង់ពីស្រុកសាវយ៉ាង មកកាន់ខេត្តសៀមរាបផងដែរ។
លោក កុង ហុងកូវ បានបញ្ជាក់ថា គោលបំណងនៃដំណើរទស្សនកិច្ចនៅខេត្តសៀមរាបនាឱកាសនេះ គឺដើមី្បត្រួតពិនិត្យ ស្វែងយល់ និងរកឱកាសស្រុកសាវយ៉ាង បានចូលរួមក្នុងកម្មវិធីខ្សែក្រវ៉ាតមួយផ្លូវមួយឲ្យកាន់តែសកម្ម ក្នុងការផ្សាភ្ជាប់ចំណងមិត្តភាពនៃប្រទេសទាំងពីរ និងការអភិវឌ្ឍន៍របស់ប្រទេសកម្ពុជា សំខាន់គឺខេត្តសៀមរាប ដែលជាខេត្តសម្ព័ន្ធមេត្រីភាពនឹងគ្នា។ លោកថាស្រុកសាវយ៉ាង ជាខេត្តមានសក្តានុពលលើវិស័យទេសចរណ៍ និងកសិកម្ម ដូចនឹងខេត្តសៀមរាបដែរ ដោយមានភ្នំមួយត្រូវបានចុះបញ្ជូលជាសម្បត្តិបេតិកភណ្ឌពិភពលោកដូចប្រាសាទអង្គរវត្តដែរ។
ព័ត៌មានជាតិ ថ្មីៗ
លោក កុង ហុងកូវ ក៏បានឲ្យដឹងថា អ្នកវិនិយោគចិនមកពីស្រុក Shaoyang បានមកធ្វើវិនិយោគនៅកម្ពុជា និងខេត្តសៀមរាប រួមទាំងពាណិជ្ជករផងដែរ ។ ម៉្យាងទៀតស្រុកសាវយ៉ាង ដែលសម្បូរទៅដោយអ្នកដឹកនាំជាន់ខ្ពសនៃសាធារណរដ្ឋប្រជាមានិតចិន។ ជាមួយនោះរាល់សំណើររបស់រដ្ឋបាលខេត្តសៀមរាបលើកឡើង លោកនឹងដាក់ជូនដល់ថ្នាក់ដឹកនាំ ព្រមទាំងធ្វើការផ្សព្វផ្សាយអំពីសក្តានុពលរបស់ខេត្តសៀមរាប ជូនដល់ប្រជាជនចិន សំខាន់វិស័យកសិកម្ម និង ទេសចរណ៍។
លោក សំកុល សុចិត្រា បានគូសបញ្ជាក់ថា សាធារណរដ្ឋប្រជាមានិតចិន គឺជាមហាមិត្តដែកថែបរបស់កម្ពុជា ដែលមានប្រវត្តិសាស្ត្រជាយូរលង់មកហើយ នាសម័យអង្គរ តាមរយៈការទូត ជីតាខ្វាន់។ លោកមានសង្ឃឹមជឿជាក់ថា ទៅអនាគតយើងមានធនធានមនុស្ស រួមទាំងវប្បធម៌ ក្នុងការរួមគ្នាថែរក្សា ព្រមទាំងធ្វើកិច្ចសហការជាមួយគ្នារវាងខេត្ត និងស្រុកសាវយ៉ាង ទាំងពីរផងដែរ។ ម៉្យាងទៀតរាល់ចំណុចសំខាន់ៗដែលគណៈប្រតិភូផ្តល់ជូន ដែលជាប្រទីបឆ្លុះបញ្ចាំង ធ្វើឲ្យចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ កាន់តែមានភាពរឹងមាំតទៅអនាគត៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
