គម្រោងជួសជុលផ្លូវដីសក្រាលក្រួសធម្មជាតិចំនួន ៤ខ្សែ នៅខេត្តសៀមរាប រួមមានក្នុងឃុំចន្លាស់ដៃ ស្រុកក្រឡាញ់ ៣ខ្សែ និងក្នុងឃុំពាក់ស្នែង ស្រុកអង្គរធំ ១ខ្សែ ត្រូវបានប្រកាសបិទបញ្ចប់ការដេញថ្លៃដោយជោគជ័យ នៅថ្ងៃទី២៧ ខែឧសភា ឆ្នាំ២០២៤នេះ ដោយមានការចូលរួមពីមន្ត្រីបច្ចេកទេសខេត្ត គណៈកម្មការលទ្ធកម្មឃុំ ក្រុមហ៊ុនម៉ៅការ នឹងអ្នកពាក់ព័ន្ធមួយចំនួនទៀត។
លោក ប៊ូន ឈឿត ប្រធានគណៈកម្មការលទ្ធឃុំចន្លាស់ដៃ ស្រុកអង្គរធំ បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំចន្លាស់ដៃ បានដាក់ដេញថ្លៃគម្រោងជួសជុលផ្លូវដីសក្រាលក្រួសធម្មជាតិចំនួន៣ខ្សែ ប្រវែង១.០០០ម៉ែត្រ ទទឹងផ្លូវ៥ម៉ែត្រ កម្រាស់០.១៥ម៉ែត្រ និងដាក់លូមុខកាត់០.៦ម៉ែត្រ ប្រវែង៦ម៉ែត្រចំនួន២កន្លែង រួមជាមួយនឹងស្លាកសញ្ញាគម្រោងចំនួន៣ ក្នុងតម្លៃប៉ាន់ស្មាន ១១២.៣៥២.៥០១រៀល ដោយមានក្រុមហ៊ុនចំនួន៧ បានដាក់សំណើរ។ ជាលទ្ធផលបានទៅលើក្រុមហ៊ុន អំ ឡូ ក្នុងតម្លៃ ៣៦.០០០.០០០រៀល។
ដោយឡែកប្រធានគណៈកម្មការលទ្ធឃុំពាក់ស្នែង ស្រុកអង្គរធំ លោក សុខ ស៊ា ក៏បានឲ្យដឹងដែរថា ចំពោះគម្រោងមូលនិធិឃុំឆ្នាំ២០២៤នេះ ឃុំពាក់ស្នែង បានដាក់ដេញថ្លៃគម្រោងជួសជុលផ្លូវដីសក្រាលក្រួសធម្មជាតិចំនួន១ខ្សែ ប្រវែង៩០០ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ ដាក់លូកាត់ផ្លូវ៤កន្លែង និងលូការពារផ្លូវ១ រួមនឹងស្លាកសញ្ញាគម្រោង១ ក្នុងតម្លៃប៉ាន់ស្មាន ១០៣.០២៣.៥៨៣រៀល ដោយមានក្រុមហ៊ុនចំនួន៦ បានដាក់សំណើរ។ ជាលទ្ធផលបានទៅលើក្រុមហ៊ុន អុី សៀងហៃ ក្នុងតម្លៃ ៣១.៤១០.៤០០រៀល។
ជាមួយនឹងការទទួលបានគម្រោងនេះ តំណាងក្រុមហ៊ុនទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យាផងដែរ៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
