ទេសរដ្ឋមន្ត្រីទទួលបន្ទុកកិច្ចការអតីតយុទ្ធជន ជនពិការ និងជាអគ្គលេខាធិការសមាគមអតីតយុទ្ធជនកម្ពុជា ឯកឧត្តមកិត្តិសង្គហបណ្ឌិត គន់ គីម បានធ្វើការក្រើនរំឭក និងជំរុញដល់អាជ្ញាធរឃុំសង្កាត់ត្រូវបន្ថែមការយកចិត្តទុកដាក់លើប្រជាពលរដ្ឋ នៅក្នុងមូលដ្ឋានរបស់ខ្លួន ជាពិសេសការពន្លឿនដោះស្រាយដីសង្គមកិច្ច និងការសាងសង់ផ្ទះជូនអតីតយុទ្ធជន។
ឯកឧត្តមទេសរដ្ឋមន្ត្រី ថ្លែងបែបនេះក្នុងឱកាសអញ្ជើញជាធអិបតីក្នុងពិធីប្រកាសសមាសភាពប្រធានគណៈកម្មាធិការសមាគមអតីតយុទ្ធជនកម្ពុជាខេត្តសៀមរាប នាព្រឹកថ្ងៃទី២៧ ខែឧសភា ឆ្នាំ២០២៤ នៅខេត្តសៀមរាប ដោយមានការចូលរួមពីលោក នាក់ ណេរ៉ុន អភិបាលរងខេត្ត រួមនឹងវត្តមានឯកឧត្តម លោកជំទាវជាប្រតិភូអបដំណើរ ថ្នាក់ដឹកនាំខេត្ត និងមន្ត្រីរាជពាក់ព័ន្ធជាច្រើនរូបទៀត។
ឯកឧត្តមទេសរដ្ឋមន្ត្រី គន់ គីម មានប្រសាសន៍ថា អតីតយុទ្ធជនពិតជាបានលះបង់ច្រើនណាស់ចំពោះប្រទេសជាតិ ជាពិសេសនាសម័យសង្គ្រាម ដែលពួកគាត់បានធ្វើពលិកម្មគ្រាប់បែបយ៉ាងក្នុងការនាំយកសន្តិភាពជូនជាតិមាតុភូមិ។ ដើម្បីជាការឆ្លើយតបទៅនឹងគុណបំណាច់មិនអាចកាត់ថ្លៃបាន របស់បងប្អូនអតីតយុទ្ធជន ក្នុងបុព្វហេតុស្វែងរកសុខសន្តិភាព ជូនប្រទេសជាតិមាតុភូមិ គឺឯកឧត្តមទេសរដ្ឋមន្ត្រី បានណែនាំ និងស្នើដល់អាជ្ញាធរមានសមត្ថកិច្ច មន្ទីរជំនាញពាក់ព័ន្ធ ត្រូវបង្កើនការយកចិត្តទុកដាក់ ចំពោះសុខទុក្ខ ការលំបាក ក្នុងជីវភាពរស់នៅរបស់បងប្អូនក្រុមគ្រួសារអតីតយុទ្ធជនឲ្យបានល្អថែមទៀត។ ក្នុងនោះដែរអាជ្ញាធរដែនដី សមត្ថកិច្ច មន្ទីរជំនាញពាក់ព័ន្ធ ត្រូវបង្កើនការយកចិត្តទុកដាក់ខ្ពស់ ចំពោះសុខទុក្ខ ការលំបាក ក្នុងជីវភាពរស់នៅរបស់បងប្អូន ក្រុមគ្រួសារអតីតយុទ្ធជនឲ្យបានល្អ ជាពិសេសមេប៉ុស្តិ៍រដ្ឋបាល មេឃុំ ចៅសង្កាត់ ត្រូវចាត់មន្ត្រីរបស់ខ្លួនណាម្នាក់ឲ្យកាន់ការងារអតីតយុទ្ធជន និងក្តាប់ស្ថានភាព ជីវភាពរស់នៅរបស់បងប្អូនអតីយុទ្ធជន ឲ្យបានច្បាស់លាស់ ដើម្បីធានាថាបងប្អូនយើង ទទួលបាននូវការយកចិត្តទុកដាក់ និងភាពកក់ក្តៅពីប្រមុខរាជរដ្ឋាភិបាល។
បើតាមលោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប និងជាប្រធានគណៈកម្មាធិការសមាគមអតីតយុទ្ធជនកម្ពុជាខេត្ត បានឲ្យដឹងថា ក្នុងឆ្នាំ២០២៤នេះ ខេត្តសៀមរាប មានអតីតយុទ្ធជនសរុប ៨.៩១៥នាក់ ក្នុងនោះបានចូលជាសមាជិកសមាគមអតីតយុទ្ធជនកម្ពុជា (ស.អ.ក) ចំនួន ៦.៧២២នាក់ និងនៅក្រៅសមាគមមានចំនួន ២.១៩៣នាក់ ដោយបានធ្វើបច្ចុប្បន្នភាពទាំងក្នុង និងក្រៅសមាគមទទួលបានលទ្ធផលមានអ្នកនៅក្នុងបន្ទុកសរុបចំនួន ១០.២៤២នាក់។
លោកបន្តថា ជាមួយនឹងការងារនេះ លោកនឹងបន្តសហការជាមួយមន្ទីរស្ថាប័នពាក់ព័ន្ធ ជំរុញការដោះស្រាយសម្បទានដីសង្គមកិច្ច ដើម្បីបែងចែកជូនអតីតយុទ្ធជនដែលក្រីក្រ គ្មានដីបង្កបង្កើនផលពិតប្រាកដ ពង្រឹងសមត្ថភាពការងារដល់ក្រុមការងារថ្នាក់ស្រុក និងសាខាឃុំសង្កាត់ ដើម្បីធានាឲ្យការអនុវត្តន៍ការងារនៅមូលដ្ឋានទទួលបាននូវគុណភាព និងប្រសិទ្ធភាព។ ការសហការរៀបចំឯកសារបង្វែរសាច់ប្រាក់ ការបើកផ្តល់ប្រាក់បេឡាមរណសង្គ្រោះ ស្របតាមគោលការណ៍នៃលក្ខន្តិកៈ ស.អ.ក និងលក្ខន្តិកៈបេឡាមរណសង្គ្រោះឲ្យបានទាន់ពេលវេលា និងមានប្រសិទ្ធភាព និងកៀងគរសប្បុរសជន អាជីវករ ក្រុមហ៊ុន និងអង្គការផ្សេងៗ គៀងគររកមូលនិធិ ដើម្បីជួយទ្រទ្រង់សមាគម និងជួយសាងសង់ផ្ទះជូនសមាជិកដែលលំបាកខ្វះទីជម្រក។ ជាពិសេសការជួយបង្កលក្ខណៈងាយស្រួលដល់បងប្អូនអតីតយុទ្ធជន មានអទិភាពទទួលបាននូវសេវាសាធារណៈ ដូចជាការបង្កើតមុខរបរ ការផ្តល់ជំនួយសង្គ្រោះបន្ទាន់ពេលមានជំងឺ ឬគ្រោះថ្នាក់ផ្សេងៗជាយថាហេតុ និងផ្ដល់ការបណ្តុះបណ្តាលវិជ្ជាជីវៈដល់ពួកគាត់ផងដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
