នៅព្រឹកថ្ងៃទី២៤ ខែឧសភា ឆ្នាំ២០២៤នេះ ក្រសួងមហាផ្ទៃសហការជាមួយរដ្ឋបាលខេត្តសៀមរាប បើកសិក្ខាសាលាផ្សព្វផ្សាយការដាក់ឲ្យអនុវត្តភាពជាដៃគូរវាងរាជរដ្ឋាភិបាល និងអង្គការយូនីសេហ្វ ក្នុងគោលដៅលើកកម្ពស់អភិបាលកិច្ចរដ្ឋបាលថ្នាក់ក្រោមជាតិ ឆ្លើយតបនឹងគោលនយោបាយនានារបស់រាជរដ្ឋាភិបាល ក្នុងការជំរុញការលើកកម្ពស់ជីវភាព សុខភាព សុខុមាលភាពរបស់ប្រជាជនកម្ពុជា ជាពិសេសស្ត្រី កុមារ យុវជន ជនក្រីក្រ ចាស់ជរា ជនមានពិការភាព និងជនងាយរងគ្រោះផ្សេងៗទៀត។
ឯកឧត្តម ជា ប៊ុនហេង អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃ មានប្រសាសន៍ថា ចាប់តាំងពីឆ្នាំ២០០១មក អង្គការយូនីសេហ្វ បានសហការ និងផ្ដល់ការគាំទ្រជាច្រើនដល់កម្ពុជា តាមរយៈគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ កម្មវិធីសិទ្ធិកុមារដែលបានប្ដូរមកជាកម្មវិធីអភិវឌ្ឍន៍សហគមន៍នៅឆ្នាំ២០១១ ដោយផ្ដោតលើការអភិវឌ្ឍន៍សមត្ថភាពមន្ត្រីឃុំសង្កាត់ ក្នុងការរៀបចំផែនការ និងអនុវត្តសេវាសង្គម តាមរយៈការផ្ដល់កញ្ចប់ថវិកាសេវាសង្គមដើម្បីអនុវត្ត អន្តរាគមន៍នានាដូចជាការចុះសំបុត្រកំណើត ការផ្គត់ផ្គង់ទឹកស្អាត និងអនាម័យសាលាមត្តេយ្យសហគមន៍ និងការពារកុមារងាយរងគ្រោះ។
ឯកឧត្តមបញ្ជាក់ថា សម្រាប់រាជរដ្ឋាភិបាលនីតិកាលទី៧នេះ បានសម្រេចបន្តអនុវត្តនៅកម្មវិធីជាតិនេះ សម្រាប់ដំណាក់កាលទី២ ឆ្នាំ២០២១ ដល់ឆ្នាំ២០៣០ ដែលមានចក្ខុវិស័យលើកកម្ពស់គុណភាព ប្រសិទ្ធភាព និងការផ្ដល់សេវាសាធារណៈ និងការបែងចែកផលប្រយោជន៍ពីការអភិវឌ្ឍន៍មូលដ្ឋានជូនប្រជាពលរដ្ឋប្រកបដោយបរិយាប័ណ្ណ និងសមធម៌សង្គម។ ទន្ទឹមនេះការរួមចំណែករបស់អង្គការយូនីសេហ្វ ក្រសួងមហាផ្ទៃ និងក្រសួងស្ថាប័នពាក់ព័ន្ធ ក៏បានដាក់ចេញនៅអភិក្រមរដ្ឋបាលថ្នាក់ក្រោមជាតិ ដែលជាផ្នែកមួយនៃកម្មវិធីកិច្ចសហប្រតិបត្តិការថ្មីសម្រាប់ឆ្នាំ២០២៤-២០២៨ ដើម្បីលើកកម្ពស់គុណភាពសេវាសង្គម និងកិច្ចគាំពារកុមារឲ្យកាន់តែមានប្រសិទ្ធភាព និងបរិយាប័ណ្ណ។ ដូច្នេះកិច្ចការសំខាន់ៗដែលត្រូវអនុវត្តតាមអភិក្រមនេះ គឺដើម្បីរួមចំណែកដល់ការរៀបចំឡើងវិញ និងការបែងចែកតួនាទី និងមុខងាររបស់រដ្ឋបាលថ្នាក់ក្រោមជាតិ ក្នុងការជំរុញឲ្យមានការផ្ដល់ធនធានមនុស្ស និងធនធានហិរញ្ញវត្ថុឲ្យបានគ្រប់គ្រាន់ដល់រដ្ឋបាលថ្នាក់ក្រោមជាតិ និងពង្រឹងដំណើរការធ្វើផែនការផ្អែកលើទិន្នន័យដោយមានការចូលរួមពីប្រជាពលរដ្ឋ និងអ្នកពាក់ព័ន្ធ។
លោក សុខ ថុល អភិបាលរងខេត្ត មានប្រសាសន៍ថា ចាត់តាំងពីឆ្នាំ២០២២៣មក អង្គការយូនីសេហ្វបានគាំទ្រដល់រដ្ឋបាលខេត្ត តាមរយៈគម្រោងកិច្ចការពារកុមារ រួមជាមួយការជួយគាំទ្រទាំងផ្នែកបច្ចេកទេស និងធនធានថវិកាដល់រដ្ឋបាលខេត្ត ក្នុងការអនុវត្តសកម្មភាពសេវាសង្គម និងកិច្ចការពារកុមារនៅរដ្ឋបាលខេត្តសៀមរាប។ តាមរយៈកិច្ចខិតខំប្រឹងប្រែងរបស់អាជ្ញាធរគ្រប់ជាន់ថ្នាក់ និងមានការជួយគាំទ្រផ្នែកបច្ចេកទេស និងថវិកាពីអគ្គនាយកដ្ឋាននៅរដ្ឋបាលក្រសួងមហាផ្ទៃ បានធ្វើឲ្យស្ថានភាពកិច្ចការពារកុមារនៅខេត្តសៀមរាបមានភាពល្អប្រសើរជាលំដាប់។ ប៉ុន្តែទោះជាយ៉ាងនេះក្តីរដ្ឋបាលខេត្តសៀមរាបក៏ទៅក៏នៅតែបន្តប្រឈមជាមួយបញ្ហាផ្សេងៗទៀតសម្រាប់ការអនុវត្តកិច្ចការពារកុមារនេះ ដូចជា៖ ករណីអំពើហិង្សា រំលោភបំពាន ក្មេងជំទង់ដែលរស់នៅធ្វើការតាមចិញ្ចើមថ្នល់ ដែលពួកគាត់មិនសហការ ដោយលាក់បាំងអត្តសញ្ញាណសេវាសង្គមក៏នៅមានកម្រិតខ្វះ។ ដើម្បីឆ្លើយតបនៅបញ្ហានេះ យើងនឹងបន្តធ្វើការដោះស្រាយបញ្ហាប្រឈមដែលនៅសេសសល់បន្តទៀត។
លោកបណ្ឌិត វីល ផាកស៍ នាយកអង្គការយូនីសេហ្វ មានប្រសាសន៍ថា ប្រាកដណាស់កុមារ និងយុវជននៅកម្ពុជា នៅតែទទួលបាននូវអនាគតមិនប្រាកដប្រជា ជាពិសេសការថែទាំសុខភាព ទឹកស្អាត ការទទួលបានការអប់រំប្រកបដោយគុណភាព ការទទួលបាននៅបរិកាសសុវត្ថិភាព និងរឹងមាំរួមទាំងការរងគ្រោះផ្សេងៗទៀត ដូចជាពិការភាពជន ជាតិភាគតិច និងការបែ្រប្រួលអាកាសធាតុ។ ដើម្បីជាការឆ្លើយតបត្រឹមត្រូវ និងធានាឱ្យបាននៅអភិក្រមដ៏មានប្រសិទ្ឋភាពក្នុងការដោះស្រាយនៅបញ្ហាសិទ្ឋកុមារ គឺការគាំទ្របន្ថែមទៀត ដើម្បីធានាទទួលបាននូវសិទ្ធកុមារ ក្នុងប្រទេសកម្ពុជា ដោយក្នុងនោះ អង្គការយូនីសេហ្វ បានធ្វើការងារជាមួួយរាជរដ្ឋាភិបាលកម្ពុជា ដើម្បីរៀបចំធ្វើវិមឈ្ឈការ និងវិសហមឈ្ឈការក៏ដូចជាការគ្រប់គ្រងសាធារណៈ និងការៀបចំកំណែទម្រង់ថ្នាក់ជាតិសម្រាប់ជួយកុមារកម្ពុជាបន្តទៀត៕
អត្ថបទ និងរូបភាព៖ លោក ហាំ ម៉េងហួត, កញ្ញា ប្រន ស្រីនិត
កែសម្រួល៖ លោក អ៊ុន ណារាជ្យ
