នៅថ្ងៃទី២២ ខែឧសភា ឆ្នាំ២០២៤នេះ ព្រះគ្រូចៅអធិការ ព្រះសង្ឃ គណៈកម្មការ អាចារ្យវត្ត អាជ្ញាធរមូលដ្ឋាន រួមនឹងប្រជាពលរដ្ឋចំណុះជើងវត្តប្រាសាទនាគគូ ស្រុកបន្ទាយស្រី ខេត្តសៀមរាប បានប្រារព្ធពិធីបុណ្យផ្កាប្រាក់សាមគ្គី ដើម្បីប្រមូលបច្ច័យយកទៅបន្តការសាងសងសាលាឆ័ន និងសមិទ្ធិផលនានាបន្ត ដែលកំពុងខ្វះខាតថវិកាច្រើន ហើយបានធ្វើការសាងសងអស់ជាច្រើនខែមកហើយ។
បើតាមព្រះគ្រូចៅអធិការវត្តបានឲ្យដឹងថា សាលាឆ័ននេះបានសាងសងជាច្រើនខែមកហើយ ដោយសាងសងទៅតាមលទ្ធភាពដែលវត្តមានបន្តិចម្ដងៗ ហើយមកទល់នឹងពេលនេះ គឺសម្រេចបានទើបតែប្រមាណតែ៣០ភាគរយប៉ុណ្ណោះ ដែលនៅមានការខ្វះខាតជាច្រើនទៀត។ ហើយចំពោះពិធីបុណ្យផ្កាប្រាក់សាមគ្គីដែលប្រារព្ធឡើងនាពេលនេះដែរ គឺប្រមូលបានថវិកាជាង៣០លានរៀល សម្រាប់យកទៅប្រើប្រាស់ក្នុងការសាងសងសាលាឆ័នបន្ត។ ជាមួយគ្នានេះ ព្រះអង្គក៏បានអំពាវនាវដកល់សប្បុរសជន រួមនឹងពុទ្ធបរិស័ទជិតឆ្ងាយ បន្តជួយបរិច្ចាកថវិកាចូលរួមក្នុងការកសាងនូវសមិទ្ធិផលក្នុងវិស័យព្រះពុទ្ធសាសនាបន្ថែមទៀត ដើម្បីទុកជាសម្បត្តិរួមក្នុងសង្កមជាតិកម្ពុជា សម្រាប់ការធ្វើបុណ្យទានដល់ប្រជាពុទ្ធបរិស័ទបន្តទៀត។
ក្នុងឱកាសនោះដែរ ឯកឧត្តម ផល សាមន អនុប្រធានក្រុមការងារ តំណាងឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះជួយស្រុកបន្ទាយស្រី បានមានប្រសាសន៍ថា វិស័យអាណាចក្រ និងវិស័យពុទ្ធិចក្រ ប្រៀបបីដូចជាកង់រថទាំងពីរ មិនអាចបាត់បង់កង់ម្ខាងណាមួយបានឡើយ។ វិស័យទាំងពីរនេះ មានជាប្រយោជន៍ដោយការជះឥទ្ធិពលឲ្យគ្នាទៅវិញទៅមក ដូចដែលប្រយោគធ្លាប់ឮ និងធ្លាប់បានអនុវត្តកន្លងមក គឺព្រះពុទ្ធសាសនាផ្សារភ្ជាប់់សង្គម។
ព័ត៌មានជាតិ ថ្មីៗ
ឯកឧត្តមមានប្រសាសន៍ទៀតថា ក្នុងសង្គមជាតិកម្ពុជាបច្ចុប្បន្ន កំពុងស្ថិតនៅក្នុងដំណើរនៃការអភិវឌ្ឍ ក៏ជាការបង្ហាញឲ្យឃើញផងដែរថា សង្គមជាតិកំពុងស្ថិតក្រោមដំបូលនៃសុខសន្តិភាព ក្រោមការដឹកនាំដ៏ឈ្លាសនៃប្រមុខរាជរដ្ឋាភិបាល។ ប្រជាពលរដ្ឋបានទទួលឱកាសធ្វើបុណ្យទាន គឺផ្តើមចេញពីសង្គមជាតិមានសុខសុវត្ថិភាព ហើយប្រជាពលរដ្ឋមានលទ្ធភាពធ្វើបុណ្យទានផ្សេងៗ ក៏អាស្រ័យដោយប្រជាពលរដ្ឋមានជីវភាពសមរម្យដែលម្លប់សន្តិភាពបានផ្តល់ឲ្យ៕
អត្ថបទ៖ លោក អ៊ុន ណារាជ្យ
រូបភាព៖ លោក ធន់ ពូថេ
