គម្រោងសាងសង់ផ្លូវបេតុងអាមេ ៣ខ្សែ ក្នុងសង្កាត់ចំនួន២ រួមមានសង្កាត់សាលាកំរើក និងសង្កាត់គោកចក ក្រុងសៀមរាប បានប្រកាសបញ្ចប់ការដេញថ្លៃដោយជោគជ័យ នៅថ្ងៃទី២០ ខែឧសភា ឆ្នាំ២០២៤នេះ ដោយមានការចូលរួមពីមន្ត្រីបច្ចេកទេសខេត្ត គណៈកម្មការសង្កាត់ ក្រុមហ៊ុនម៉ៅការ នឹងអ្នកពាក់ព័ន្ធមួយចំនួនទៀត។
លោក សាម ឡន ប្រធានគណៈកម្មការលទ្ធកម្មសង្កាត់សាលាកំរើក ក្រុងសៀមរាប បានឲ្យដឹងថា សម្រាប់គម្រោងមូលនិធិសង្កាត់ឆ្នាំ២០២៤នេះ សង្កាត់សាលាកំរើក បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ មានប្រវែង២៥៨ម៉ែត្រ ទទឹង៧ម៉ែត្រ កម្រាស់០.២០ម៉ែត្រ ដាក់ដែក L ១០លី ប្រវែង១៤ម៉ែត្រ និងស្លាកគម្រោងចំនួន១ ក្នុងតម្លៃប៉ាន់ស្មាន ២៧៤.៦៧៥.៣៩៤រៀល ដោយមានក្រុមហ៊ុនម៉ៅការចំនួន៥ បានដាក់សំណើរ។ ជាលទ្ធផលបានទៅលើក្រុមហ៊ុន សុីអេសអិល ក្នុងតម្លៃ ១២៩.៦០០.០០០រៀល។
ដោយឡែក លោកស្រី ឈិន សាវី ប្រធានគណៈកម្មការលទ្ធកម្ម សង្កាត់គោកចក ក្រុងសៀមរាប ក៏បានឲ្យដឹងដែរថា ចំពោះគម្រោងមូលនិធិសង្កាត់ឆ្នាំ២០២៤ សង្កាត់គោកចក បានដាក់ដេញថ្លៃគម្រោងសាងសង់ផ្លូវបេតុងអាមេ២ខ្សែ ប្រវែង៨០២ម៉ែត្រ ទទឹង៦ម៉ែត្រ កម្រាស់បេតុង០.១៥ម៉ែត្រ និងដាក់លូការពារផ្លូវចំនួនមួយ ក្នុងតម្លៃប៉ាន់ស្មាន ៦២៧.៦៩៧.២៨៨រៀល ដោយមានក្រុមហ៊ុនចំនួន៤ បានដាក់សំណើរ។ ជាលទ្ធផលបានទៅលើអ្នកដេញថ្លៃ សម្បត្តិ ដានីញ៉ែល ក្នុងតម្លៃ ៦២៥.៦៩០.០០០រៀល។
ជាមួយនឹងការទទួលបានគម្រោងសាងសង់នេះ តំណាងក្រុមហ៊ុនម៉ៅការទាំង២ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យាផងដែរ៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
