នៅព្រឹកថ្ងៃទី២០ ខែឧសភា ឆ្នាំ២០២៤នេះ រដ្ឋបាលខេត្តសៀមរាប បានប្រារព្ធទិវាជាតិនៃការចងចាំ ២០ ឧសភា នៅក្នុងបរិវេណវត្តពោធិវង្ស ក្រុងសៀមរាប ដើម្បីសម្តែងនូវការនឹករលឹកគោរពស្រឡាញ់ ការសោកស្តាយ ស្រណោះអាឡោះអាល័យ និង ឧទ្ទិសកុសលដល់វិញ្ញាណក្ខន្ធជនរួមជាតិ ដែលបានបាត់បង់ជីវិត ក្រោមរបបកម្ពុជាប្រជាធិបតេយ្យប្រល័យពូជសាសន៍នៃបន ប៉ុល ពត ដែលពិធីប្រព្រឹត្តិទៅក្រោមវត្តមាន ឯកឧត្តម អ៊ាន ឃុន ប្រធានក្រុមប្រឹក្សាខេត្ត លោក យុន លីនណេ អភិបាលរងខេត្ត ដោយមានការចូលរួមពីថ្នាក់ដឹកនាំ ព្រះសង្ឃ និងប្រជាពលរដ្ឋជាច្រើនរូប។
ឯកឧត្តម អ៊ាន ឃុន មានប្រសាសន៍ថា មហាសោកនាដកម្មរបស់សង្គមជាតិ និងប្រជាជនកម្ពុជា ដែលពោរពេញទៅដោយឈាម និងទឹកភ្នែកក្នុងរបបកម្ពុជាប្រជាធិបតេយ្យប្រល័យពូជសាសន៍ ប៉ុលពត រយៈពេល៣ឆ្នាំ ៨ខែ ២០ថ្ងៃ ដែលក្នុងរបបនេះប្រជាជនកម្ពុជា បានរស់នៅក្នុងគុកឥតជញ្ជាំង ទទួលរងទុក្ខ និងទារុណកម្មគ្រប់បែបយ៉ាង បាត់បងនូវការកសាងជាតិ ការរស់នៅដូចសត្វធាតុ និរាសព្រាត់ប្រាស់គ្រួសារសាច់ញាតិ ការកាប់សម្លាប់ជីវិតជាតិសាសន៍ឯងយ៉ាងព្រៃផ្សៃអស់ជាង ៣លាននាក់។ នៅថ្ងៃទី២ ខែធ្នូ ឆ្នាំ១៩៧៨ រណសិរ្សសាមគ្គីសង្រ្គោះជាតិត្រូវបានបង្កើតឡើង គឺដើម្បីប្រមូលផ្តុំកម្លាំងអ្នកស្នេហាជាតិ ក្រោកឈរតស៊ូរំដោះជាតិកម្ពុជា រហូតទទួលបានជ័យជន្នះនាថ្ងៃ ៧មករា ១៩៧៩ និងមានការអភិវឌ្ឍមកដល់សព្វថ្ងៃនេះ ក្រោមការដឹកនាំរបស់ សម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ឋសភា បានធ្វើឲ្យប្រជាពលរដ្ឋរស់នៅក្រោមម្លប់សុខសន្តិភាព និងការអភិវឌ្ឍន៍យ៉ាងពេញលេញ ក្លាយជាចលករសម្រាប់អនុវត្តនូវយុទ្ធសាស្ត្របញ្ចកោណ ដំណាក់កាលទី១ ក្រោមកិច្ចដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ណាពេលបច្ចុប្បន្ន។
ឯកឧត្តម មានប្រសាសន៍បន្តថា ហេតុនេះទិវាជាតិនៃការចងចាំ ២០ ឧសភា គឺជាសកម្មភាពដ៏មានអត្ថន័យ ដែលស្តែងឱ្យឃើញថា ទោះជារឿងរ៉ាវបានកើតឡើងផុតក្នុងអតីតកាលផុតអស់ជាង ៤៥ឆ្នាំហើយក៏ដោយ ក៏ប៉ុន្តែវាជារឿងឈឺចាប់ និងប្តវត្តសាស្ត្រនៃមហាសោកនាដកម្មដែលយើងទាំងអស់គ្នាពុំអាចបំភ្លេចបាន។ ហើយប្រវត្តិសាស្ត្រនេះក៏ត្រូវបានកំពុងទទួលស្គាល់ពាសពេញពិភពលោកតាមរយៈការនាំយកមេដឹកនាំនៃរបបខ្មែរក្រហមមកកាត់ទោសនៅអង្គជំនុំជម្រះវិសាមញ្ញក្នុងតុលាការកម្ពុជា ដែលជាផ្នែកមួយផ្តល់ភាពត្រឹមត្រូវជូនរាជរដ្ឋាភិបាលកម្ពុជា សង្គមជាតិកម្ពុជា ក្នុងការផ្សះផ្សាររបួសស្នាមទាំងផ្លូវកាយនិងផ្លូវចិត្តេជូនជនរួមជាតិដែលបានរងគ្រោះក្នុងរបបនោះ។
ព័ត៌មានជាតិ ថ្មីៗ
សូមជម្រាបថា ក្នុងឱកាសប្រារព្ឋទិវាជាតិនៃការចងចាំ ២០ ឧសភា នាពេលនេះដែរ ថ្នាក់ដឹកនាំគ្រប់ជាន់ថ្នាក់រួមនឹងប្រជាពលរដ្ឋ បានបូជាទៀនធូប ដាក់ផ្កាកម្រងគោរព និងឧទ្ទិសដល់វិញ្ញាណខន្ឋប្រជាជនកម្ពុជា អ្នកស្នេហាជាតិខ្មែរ ដែលបានបាត់បង់ជីវិតយ៉ាងអយុត្តិធម៌ ក្នុងរបបប្រល័យពូជសាសន៍ ព្រមទាំងបាននិមន្តព្រះសង្ឃចំនួន ៧៥អង្គ បង្សុកូល និងរាប់បាត្រឧទិ្ទសមហាកុសលផលបុណ្យដល់អ្នកដែលបានចែកឋានផងដែរ៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
