សម្រាប់ឆ្នាំទី១២ នៃពិធីបំបួសកុលបុត្រកុលធីតា អបអរសាទរបុណ្យវិសាខបូជា នៅវត្តព្រះឥន្ទទេព ទឹកដីអង្គរ នារសៀលថ្ងៃទី១៨ ខែឧសភា ឆ្នាំ២០២៤ មានអ្នកចូលរួមបំបួសចំនួន ៥៤០នាក់ ដែលការបំបួសនេះដែរមានរយៈពេល៥យប់ ៦ថ្ងៃ ចាប់ពីថ្ងៃទី១៨ ដល់ថ្ងៃទី២៣ ខែឧសភា ក្នុងគោលបំណងដើម្បីឱ្យកូនខ្មែរឈ្វេងយល់ និងផ្តល់ឱកាសឱ្យពួកគាត់ចូលសាងផ្នួសដើម្បីតបគុណ ចំពោះអ្នកមានគុណរបស់ខ្លួន មានមាតាបិតា អាណាព្យាបាល ព្រះមហាក្សត្រ និងថ្នាក់នាំរបស់ប្រទេសជាតិជាដើម។
មានប្រសាសន៍ក្នុងពិធិនោះ លោកជំទាវ កែ សួនសុភី ស សុខា បានជំរុញលើកទឹកចិត្តដល់កុលបុត្រកុលធីតាទាំងអស់ ត្រូវសិក្សាឈ្វេងយល់ឱ្យបានស៊ីជម្រៅចំពោះអត្ថន័យ និងទស្សនវិជ្ជានៃបុណ្យវិសាខបូជា ដែលពុទ្ធសាសនិកទូទាំងពិភពលោកតែងប្រារព្ធឡើងរៀងរាល់ឆ្នាំ។ ហើយចំពោះការស្ម័គ្រចិត្តចូលខ្លួនកោរសក់ បួងសក់ សាងផ្នួសរយៈពេលខ្លី គឺបង្ហាញពីទង្វើល្អតបគុណចំពោះអ្នកមានគុណរបស់ខ្លួន ដែលនេះជាឱកាសដ៏ប្រពៃដើម្បីដុសខាត់ សតិស្មារតីឱ្យមានការភ្ញាក់រឭកនូវអ្វីដែលធ្លាប់ខុសពីមុនមក ដើម្បីកសាងខ្លួនជាធនធានដ៏មានសារៈសំខាន់សម្រាប់សង្គមជាតិ។
លោកជំទាវ ក៏បានបង្ហាញនូវក្ដីរីករាយ និងពេញចិត្ត ចំពោះកម្មវិធីនេះ ដែលតាមរយៈការបួសរយៈពេលខ្លីនេះដែល នឹងអាចឱ្យពួកគាត់មានការភ្ញាក់រលឹក លះបង់នូវអ្វីដែលកំពុងតែធ្វើខុស និងបានប្រតិបត្តិខ្លួនជាមនុស្សល្អ ៥យ៉ាង៖ កូនល្អ សិស្សល្អ មិត្តល្អ ពលរដ្ឋល្អ និងជាពុទ្ធសាសនិកល្អ។ លោកជំទាវថា ព្រះពុទ្ធសាសនាជាសាសនាសកល មានទ្រឹស្តីសន្តិភាពនិងអហិង្សាជាគោល ជាមាគ៌ាដឹកនាំ មនុស្សឱ្យរស់នៅក្នុងសុខសន្តិភាព មិនបៀតបៀនគ្នា មិនព្យាបាទគ្នា ផ្តល់ស្នាមញញឹមដល់គ្នានិងគ្នា។ សង្គមខ្មែរយើងបានចាត់ទុកវិស័យព្រះពុទ្ធសាសនាជាវិស័យសំខាន់ ជាដៃគូអភិវឌ្ឍន៍មិនអាចខ្វះបានដើរទន្ទឹមគ្នានឹងវិស័យអាណាចក្រ ហៅពុទ្ធចក្រ ដែលថ្នាក់ដឹកនាំគ្រប់ថ្នាក់តែងបានយកចិត្តទុកដាក់ក្នុងការកសាងហេដ្ឋារចនាសម្ព័ន្ធ នានាក្នុងវិស័យនេះ ដើម្បីបម្រើសេចក្តីត្រូវការរបស់ប្រជាពុទ្ធបរិស័ទយើងបានបំពេញបុណ្យកុសល តាមសេចក្តីជ្រះថ្លា។
ព្រះវិជ័យរង្សី បណ្ឌិត ឡាច លាង ព្រះធម្មធរគណខេត្តសៀមរាប ព្រះគ្រូប្រាសាទរង្សី អនុគណក្រុងសៀមរាប មានថេរដីកាថា នេះជាលើកទី១២ហើយ នៃកម្មវិធីបុណ្យបំបួសកុលបុត្រកុលធីតា ក្នុងឱកាសបុណ្យវិសាខបូជា នៅខេត្តសៀមរាប។ កម្មវិធីនេះ នឹងជមរុញឲ្យកុលបុត្រកុលធីតាទាំងអស់ទទួលបានមេរៀនដោយការស្វាធ្យាយសូត្រ ធម៌នមស្សការ សមាទានសីល មេរៀន មាគ៌ាអភិវឌ្ឍជីវិត និងភាពជាអ្នកដឹកនាំល្អ មេរៀនពុទ្ធប្រវត្តិ និងពិធីកម្មផ្សេងៗមានពិធីបុណ្យវិសាខបូជាជាដើម។ កម្មវិធីសម្រាប់ឆ្នាំនេះដែរ គឺក្រោមការជួយឧបត្ថម្ភគាំទ្រ ពីលោកជំទាវ ញ៉ែម សាខន ស ខេង, លោកជំទាវ កែ សួនសុភី ស សុខា, លោកជំទាវ ទុយ ជិ ប្រាក់ សោភ័ណ ព្រមទាំងអាជ្ញាធរខេត្ត និងមន្ត្រីសង្ឃខេត្ត ព្រមទាំងសប្បុរសជនជាច្រើនរូបទៀត៕
អត្ថបទ និងរូបភាព៖ លោក យូ វង្ស, មុី សុខារិទ្ធ
កែសម្រួល៖ លោក អ៊ុន ណារាជ្យ