ថ្លែងក្នុងសិក្ខាសាលាតម្រង់ទិសថ្នាក់ខេត្តស្តីអំពីការអនុវត្តក្របខ័ណ្ឌ អនុវត្តការជំរុញបង្កើនការងារថែទាំសុខភាពបឋមនៅកម្ពុជា នៅខេត្តសៀមរាប នាថ្ងៃទី១៦ ខែឧសភា ឆ្នាំ២០២៤នេះ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល បានលើកឡើងថា ការងារថែទាំសុខភាពបឋម ជាកាតព្វកិច្ចរបស់យើងទាំងអស់គ្នាដែលចាំបាច់ត្រូវធ្វើ ព្រោះបើសុខភាពរបស់យើងល្អ វានឹងនាំឲ្យគ្រួសារមានសុភមង្គល ហើយប្រទេសជាតិក៏កាន់តែរីកចម្រើន។
លោកជំទាវ ឱ វណ្ណឌីន មានប្រសាសន៍ថា ក្នុងអាណត្តិទី៧នេះ រាជរដ្ឋាភិបាលកម្ពុជា បានកំពុងយកចិត្តទុកដាក់ពង្រឹង និងពង្រីកការអភិវឌ្ឍលើគ្រប់វិស័យ ក្នុងនោះវិស័យសុខាភិបាល ក៏នៅតែជាវិស័យអទិភាពមួយដ៏សំខាន់នៅក្នុងគោលនយោបាយរបស់រាជរដ្ឋាភិបាលដែលនេះបញ្ជាក់ឲ្យឃើញថា នៅគ្រប់ដំណាក់កាល រាជរដ្ឋាភិបាលបានយកចិត្តទុកដាក់យ៉ាងខ្លាំងនៅក្នុងការថែទាំសុខភាពរបស់ប្រជាពលរដ្ឋ។ ជាពិសេសការជំរុញការថែទាំសុខភាពបឋមរបស់ប្រជាពលរដ្ឋផ្ទាល់តែម្តង ដោយកាលណាយើងម្នាក់ៗយល់ដឹងអំពីការថែទាំសុខភាពបឋម យើងអាចកាត់បន្ថយការទៅជួបពេទ្យដើម្បីព្យាបាលជំងឺ។
លោកជំទាវរដ្ឋលេខាធិការ ក៏បានអំពាវនាវដល់អង្គការដៃគូទាំងអស់នៅក្នុងខេត្តសៀមរាប ត្រូវចូលរួមសហការជាមួយអាជ្ញាធរមូលដ្ឋាន ដើម្បីធ្វើការអប់រំដល់ប្រជាពលរដ្ឋនៅតាមសហគមន៍ឲ្យពួកគាត់បានយល់ដឹងអំពីការថែទាំសុខភាពបឋមនេះ។ កិច្ចការថែទាំសុខភាពបឋម ជាការបង្ការមួយយ៉ាងល្អព្រោះវាបានជួយឲ្យយើង កាត់បន្ថយការចំណាយលើការព្យាបាលជំងឺផ្សេងៗ ដូចទីនឹងពាក្យស្លោកមួយលើកឡើងថា ការពារប្រសើរជាងព្យាបាល។
លោក ពិន ប្រាកដ អភិបាលរងខេត្ត មានប្រសាសន៍ថា ការអនុវត្តការថែទាំសុខភាពជូនប្រជាពលរដ្ឋក្នុងខេត្តសៀមរាប ត្រូវបានកែលម្អ និងរីកចម្រើនជាបន្តបន្ទាប់ ពិសេសអត្រាមរណៈភាពមាតា និងកុមារ ត្រូវបានកាត់បន្ថយគួរឲ្យកត់សំគាល់។ ទន្ទឹមនឹងនេះហេដ្ឋារចនាសម្ព័ន្ឋរូបវន្ត័វិស័យសុខាភិបាល ត្រូវបានកែលម្អពង្រីក និងការលើកកំពស់ជាប្រចាំក្នុងការផ្តល់សេវាសុខាភិបាលនៅតាមមណ្ឌលសុខភាព មន្ទីរពេទ្យបង្អែក ដូចជា សេវាសម្ភពបន្ទាន់ សេវាសង្គ្រោះបន្ទាន់ សេវាថែទាំទារក-កុមារ ក៏ដូចជាសេវាអន្តរាគមន៍ សុខភាពសាធារណៈផ្សេងទៀតកាន់តែមានលក្ខណៈប្រសើរឡើងជាលំដាប់។ ពិសេសសេវាសុខភាពខិតកាន់តែជិតដល់មូលដ្ឋាន ដែលជាតម្រូវការរបស់ប្រជាពលរដ្ឋ។ វឌ្ឍនភាពនៃការពង្រីកមូលដ្ឋានសុខាភិបាល និងសេវាគ្របដណ្តប់សុខភាព គឺជាចំណែកមួយយ៉ាងសំខាន់ក្នុងការចូលរួមកាត់បន្ថយអត្រាមរណៈភាពមាតា និងទារក ជំងឺអេដស៏ របេង គ្រុនចាញ់ ព្រមជាមួយនឹងការកើនឡើងនៃអាយុកាលរំពឹងទុករបស់ប្រជាពលរដ្ឋយើងផងដែរ។
លោកអភិបាលរងខេត្ត ក៏បានថ្លែងនូវការកោតសរសើរ ចំពោះការខិតខំប្រឹងប្រែងដោយឧត្តមគតិ និងសតិសម្បជញ្ញៈរបស់ថ្នាក់ដឹកនាំ មន្ត្រីរាជការ បុគ្គលិកសុខាភិបាលទាំងអស់ ព្រមទាំងដៃគូរអភិវឌ្ឍន៏ អាជ្ញាធរដែនដីគ្រប់លំដាប់ថ្នាក់គ្រប់មន្ទីរអង្គភាព ព្រមទាំងវិស័យពាក់ព័ន្ឋទាំងអស់ រួមទាំងសេវាសុខាភិបាលឯកជន ដែលបានធ្វើឱ្យសម្រេចបាននូវសមិទ្ឋិផល និងវឌ្ឍនភាពវិស័យសុខាភិបាលគួរជាទីមោទនៈនាពេលកន្លងមក៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
