ប័ណ្ណកម្មសិទ្ធិសម្គាល់ម្ចាស់អចលនវត្ថុចំនួន ៦.៧៣៣ប័ណ្ណ ក្នុងភូមិចំនួន៥ រួមមានភូមិកំពង់តាយ៉ង ភូមិតាទក ភូមិគោកដូង និងភូមិចំបក់ហែ នៃឃុំពួក ស្រុកពួក ខេត្តសៀមរាប ត្រូវបានមន្ត្រីជំនាញប្រគល់ជូនដល់ម្ចាស់កម្មសិទ្ធយកទៅប្រើប្រាស់ជាផ្លូវការនៅព្រឹកថ្ងៃទី១៦ ខែឧសភា ឆ្នាំ២០២៤នេះ។
បើតាមលោក ស៊ីន ចាន់ថុល អភិបាលស្រុកពួក បានឲ្យដឹងថា ប័ណ្ណសម្គាល់កម្មសិទ្ធិអចលនវត្ថុដែលបានចែកជូននាពេលនេះមានចំនួន ៦.៧៣៣ប័ណ្ណប៉ុណ្ណោះ នៃក្បាលដីសរុប ៨.៣៤៧ក្បាលដី គឺនៅសល់ ១.៦១៤ទៀតដែលមិនទាន់បានចេញប័ណ្ណ ដោយសារតែក្បាលដីមួយចំនួនផ្សេងទៀតនៅមានបញ្ហាស្មុគស្មាញមិនទាន់បានដោះស្រាយបាន។ ចំពោះការចែកប័ណ្ណនេះមានរយៈពេល១៦ថ្ងៃ ចាប់ពីថ្ងៃទី១៦-៣១ ខែឧសភា ឆ្នាំ២០២៤។ ក្នុងករណីដែលបងប្អូនប្រជាពលរដ្ឋខកខានមកទទួល បងប្អូនអាចទៅទទួលយកប័ណ្ណនៅមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្ត ដែលស្ថិតនៅក្នុងបរិវេណនៃមណ្ឌលមន្ទីររដ្ឋបាលខេត្តសៀមរាប។
លោក អុឹង គឹមលាង អភិបាលរងខេត្តសៀមរាប មានប្រសាសន៍ថា ប័ណ្ណកម្មសិទ្ធិសម្គាល់ម្ចាស់អចលនវត្ថុ ពិតជាមានសារៈប្រយោជន៍ខ្លាំងណាស់ចំពោះប្រជាពលរដ្ឋគ្រប់រូប សម្រាប់ប្រើប្រាស់ក្នុងការងារផ្នែកច្បាប់ ឬការងារទិញលក់ និងការផ្ទេរកម្មសិទ្ធិជាដើម។ ដូចនេះសូមបងប្អូនយកប័ណ្ណនេះតុកឲ្យដោយប្រុងប្រយ័ត្ន ប្រើប្រាស់ប្រកបដោយការគិតគូរ និងពិចារណាឱ្យបានហ្មត់ចត់ ជាពិសេសការប្រើទៅលើការកម្ចីនានា។
លោកអភិបាលរងខេត្តបន្តថា ថ្វីត្បិតតែនៅមានសេសសល់ក្បាលដីដែលមិនទាន់ចេញបណ្ណកម្មសិទ្ធិនាពេលនេះក៏ពិតមែន តែលោកអភិបាលរងខេត្ត បានបង្ហាញនូវការយកចិត្តទុកដាក់ក្នុងការជម្រុញ និងពន្លឿនកិច្ចការងារនេះ ដោយបានសុំអាជ្ញាធរពាក់ព័ន្ធលើការងារនេះ ធ្វើយ៉ាងណាឱ្យប្រជាពលរដ្ឋអាចទទួលបានបណ្ណសម្គាល់កម្មសិទ្ធិគ្រប់ៗគ្នានាពេលខាងមុខ តាមការចង្អុលបង្ហាញ និងការយកចិត្តទុកដាក់ខ្ពស់ពីសំណាក់រាជរដ្ឋាភិបាល៕
អត្ថបទ និងរូបភាព៖ លោក ហេង វ៉ាន្នី
កែសម្រួល៖ លោក អ៊ុន ណារាជ្យ
