គម្រោងសាងសង់ផ្លូវបេតុងអាមេ ២ខ្សែ ក្នុងឃុំកំពង់ថ្កូវ ស្រុកក្រឡាញ់ និង ឃុំខ្នាត ស្រុកពួក ខេត្តសៀមរាប ដែលជាគម្រោងមូលនិធិរបស់ឃុំឆ្នាំ២០២៤ ត្រូវបានប្រកាសបិទបញ្ចប់ការដេញថ្លៃជាស្ថាពរ នៅថ្ងៃទី១៥ ខែឧសភា ឆ្នាំ២០២៤នេះ ដោយមានការចូលរួមពី មន្ត្រីបច្ចេកទេសខេត្ត គណៈកម្មការលទ្ធកម្មឃុំ និងគណៈកម្មការសង្កាត់ អ្នកម៉ៅការ រួមជាមួយនឹងអ្នកពាក់ព័ន្ធផ្សេងទៀត។
លោក យ៉ង ថា ប្រធានគណៈកម្មការលទ្ធឃុំកំពង់ថ្កូវ ស្រុកក្រឡាញ់ បានឲ្យដឹងថា ចំពោះគម្រោងមូលនិធិឃុំកំពង់ថ្កូវ ឆ្នាំ២០២៤នេះ ឃុំបានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង១៧០ម៉ែត្រ ទទឹងបេតុង៥ម៉ែត្រ កម្រាស់បេតុង០,១៥ម៉ែត្រ មានក្រួសក្រហមស្មារ០,២៥ម៉ែត្រ និងស្លាកសញ្ញាគម្រោងចំនួន០១ ។ គម្រោងនេះ មានតម្លៃប៉ាន់ស្មាន ១០៧.០៩៤.៦៩៦រៀល ដោយមានក្រុមហ៊ុនដាក់សំណើរចំនួន៨ ជាលទ្ធផលបានទៅលើក្រុមហ៊ុន យ៉ែម សុងីម ក្នុងតម្លៃ ៤៩.៧២៥.០០០រៀល។
ដោយឡែក លោក ឡឹក ឡូន ប្រធានគណៈកម្មការលទ្ធឃុំខ្នាត ស្រុកពួក បានឲ្យដឹងថា ចំពោះគម្រោងមូលនិធិឃុំឆ្នាំ២០២៤នេះ ឃុំខ្នាត បានដាក់ដេញថ្លៃគម្រោងសាងសង់ផ្លូវបេតុងអាមេ១ខ្សែ ប្រវែង១២៥ម៉ែត្រ ទទឹង៥ម៉ែត្រ កំរាស់បេតុង០.១៥ម៉ែត្រ លូកាត់ផ្លូវ៣កន្លែង លូការពារផ្លូវ២កន្លែង និងស្លាកសញ្ញាគម្រោង១។ គម្រោងនេះមានតម្លៃប៉ាន់ស្មាន ១០៨.៥៦៩.៤៤៣រៀល ដោយមានក្រុមហ៊ុនដាក់សំណើរចំនួន ៦ក្រុមហ៊ុន និងជាលទ្ធផលបានទៅលើក្រុមហ៊ុន ហ៊ត ហេង ក្នុងតម្លៃ ៤៤.០០០.៣០០រៀល។
ក្រោយពីបញ្ចប់ការដេញថ្លៃ តំណាងក្រុមហ៊ុនម៉ៅការទាំងពីរ ដែលទទួលបានការម៉ៅការចំពោះគម្រោងនីមួយៗខាងលើ បានធ្វើការប្ដេជ្ញាចិត្ត ដោយសន្យាសាងសង់ឲ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
