នាព្រឹកថ្ងៃទី៧ ខែឧសភា ឆ្នាំ២០២៤នេះ គណៈកម្មការរៀបចំការបោះឆ្នោតខេត្ដសៀមរាប បានរៀបចំកិច្ចប្រជុំផ្សព្វផ្សាយស្ដីពីការងារសន្ដិសុខ សុវត្ថិភាព សណ្ដាប់ធ្នាប់សាធារណៈ ជាមួយអាជ្ញាធរ គណបក្សនយោបាយ និងភាគីពាក់ព័ន្ធ សម្រាប់ការបោះឆ្នោតក្រុមប្រឹក្សារាជធានីខេត្ដ ក្រុងស្រុកខណ្ឌ អាណត្ដិទី៤នេះ។
លោក នីម វ៉ាន់សំ ប្រធានគណៈកម្មការរៀបចំការបោះឆ្នោតខេត្ដមានប្រសាសន៍ថា កិច្ចប្រជុំនាពេលនេះ គឺដើម្បីជំរុញឱ្យដំណើរការនៃការបោះឆ្នោតក្រុមប្រឹក្សារាជធានីខេត្ដ ក្រុងស្រុកខណ្ឌ អាណត្ដិទី៤ ឆ្នាំ២០២៤ ប្រព្រឹត្តទៅដោយរលូន និងទទូលបានជោគជ័យ ស្ថិតក្នុងយោបរិយាកាសសន្ដិសុខ សុវត្ថិភាព និងសណ្ដាប់សាធារណៈល្អ គ្មានការបំភិតបំភ័យ និងគ្មានការគំរាមកំហែង និងគ្មានអំពើហិង្សា។ ក្នុងនោះលេខាធិការដ្ឋានសន្តិសុខបោះឆ្នោតនៃគណៈកម្មាធិការជាតិរៀបចំការបោះឆ្នោត (គជប) គណៈកម្មការរាជធានីខេត្តរៀបចំការបោះឆ្នោត (គធខប) ត្រូវសហការ និងពិគ្រោះយោបល់ ជាមួយលេខាធិការដ្ឋាននៃគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត និងគណៈអភិបាលរាជធានីខេត្ត ដែលជាគណៈបញ្ជាការឯកភាពរដ្ឋបាលរាជធានីខេត្ត ក្នុងការចាត់ចែងរៀបចំកងកម្លាំងមានសមត្ថកិច្ចដែលមានមូលដ្ឋានឈរជើងនៅតាមរាជធានីខេត្ត ឱ្យបំពេញភារកិច្ចជាភ្នាក់ងារសន្តិសុខបោះឆ្នោត តាមដំណាក់កាលនីមួយៗ ដើម្បីការពារមុខសញ្ញា និងគោលដៅសំខាន់ៗ ដើម្បីការពារសន្តិសុខ សុវត្ថិភាព និងសណ្តាប់ធ្នាប់សម្រាប់ដំណើរការនៃការបោះឆ្នោតក្រុមប្រឹក្សារាជធានីខេត្ដ ក្រុងស្រុកខណ្ឌ អាណត្ដិទី៤ ខាងមុខនេះ។
លោក នីម វ៉ាន់សំ បន្តថា គធខប ត្រូវយកចិត្តទុកដាក់តាមដាន និងបង្កើនការផ្លាស់ប្តូរព័ត៌មានអំពីសភាពការណ៍សន្តិសុខទូទៅ និងត្រូវស្នើសុំកិច្ចអន្តរាគមន៍ពីកងកម្លាំងមានសមត្ថកិច្ច ក្រុមពន្លត់អគ្គិភ័យ ឬក្រុមបុគ្គលិកសុខាភិបាលឱ្យទាន់ពេលវេលា ក្នុងករណីមានការអុកឡុករំខាន ការគំរាមកំហែង ឬការប្រព្រឹត្តអំពើល្មើសច្បាប់ផ្សេងៗ ឬ មានអគ្គិភ័យ ឬបញ្ហាសុខភាពផ្សេងៗទៀត ដែលអាចធ្វើឱ្យរាំងស្ទះដល់ដំណើរការនៃការបោះឆ្នោត។ ស្នើសុំកិច្ចសហការពីគណៈអភិបាលរាជធានី ខេត្ត ដើម្បីរៀបចំកិច្ចប្រជុំចម្រុះដោយផ្ទាល់ ឬតាមប្រព័ន្ធអនឡាញ (Online) ម្តងក្នុងមួយសប្តាហ៍ និងអាចកោះប្រជុំតាមការចាំបាច់ក្នុងគោលបំណងពិភាក្សា លើការងារសន្តិសុខ និងការចាត់វិធានការចាំបាច់ផ្សេងៗ សំដៅកាត់បន្ថយឱ្យបានរាល់បញ្ហាទំនាស់ នានាដែលកើតមានឡើង និងត្រូវស្វែងរកដំណោះស្រាយឱ្យបានសមស្រប។
នាយករងរដ្ឋបាលសាលាខេត្តសៀមរាប លោក ចឹក គឹមជុន បានបញ្ជាក់ថា ការរៀបចំការបោះឆ្នោត មិនថាតែការបោះឆ្នោតសកល ឬអសកល នៅក្នុងខេត្ដសៀមរាប ទទួលបានជោគជ័យប្រកបដោយបរិយាកាសល្អប្រសើរ មានសន្ដិសុខ មានសុវត្ថិភាព សណ្ដាប់ធ្នាប់ល្អ ពីមួយអាណត្ដិទៅមួយណត្ដិ ខណៈដែលប្រទេសជាតិមានសុខសន្ដិភាពពេញលេញ។ ដើម្បីឱ្យដំណើរការនៃការបោះឆ្នោតក្រុមប្រឹក្សារាជធានីខេត្ដ ក្រុងស្រុកខណ្ឌ អាណត្ដិទី៤ ទទួលបានជោគជ័យបន្ថែមទៀត អ្នកពាក់ព័ន្ធត្រូវយកចិត្ដទុកដាក់តាមការណែនាំពីគជប ឱ្យបានខ្ជាប់ខ្ជួននឹងម៉ឺងម៉ាត់បំផុត៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
