នៅព្រឹកថ្ងៃទី១០ ខែឧសភា ឆ្នាំ២០២៤នេះ លោក ចឹក គឹមជុន នាយករងរដ្ឋបាលសាលាខេត្តសៀមរាប បានបើកកិច្ចប្រជុំការអនុវត្តគម្រោងអភិវឌ្ឍន៍របស់រដ្ឋបាលឃុំសង្កាត់ទូទាំងខេត្ត ដោយមានការចូលរួមពីអគ្គនាយកដ្ឋានហិរញ្ញវត្ថុតរដ្ឋបាលថ្នាក់ក្រោមជាតិ នៃក្រសួងសេដ្ឋកិច្ច និងហិរញ្ញវត្ថុ តំណាងមន្ទីរពាក់ព័ន្ធ ទីចាត់ការហិរញ្ញវត្ថុសាលាខេត្ត ទីចាត់ការផែកការវិនិយោគ រដ្ឋបាលក្រុងស្រុក មេឃុំចៅសង្កាត់ មន្ត្រីពាក់ព័ន្ធអនុវត្តគម្រោងមូលនិធិឃុំសង្កាត់ជាច្រើនរូប។
លោក ចឹក គឹមជុន មានប្រសាសន៍ថា កិច្ចប្រជុំនាពេលនេះ គឺដើមី្បជំរុញការអនុវត្តគម្រោងអភិវឌ្ឍន៍របស់រដ្ឋបាលឃុំសង្កាត់ ឆ្នាំ២០២៤ ឲ្យបានទាន់ពេលវេលា និងដើមី្បពង្រឹងនូវគុណភាព ប្រសិទ្ធភាព តម្លាភាព និងគណនេយ្យភាព នៃការគ្រប់គ្រងរដ្ឋបាលឃុំសង្កាត់ ក្នុងការផ្តល់សេវាសាធារណៈ សេវារដ្ឋបាល និងការអភិវឌ្ឍន៍មូលដ្ឋានប្រកបដោយចិរភាព។ ជាមួយនោះលោកក៏បានបង្ហាញអំពីពីវឌ្ឍនភាព និងសមទ្ធិផលដែលរដ្ឋបាលឃុំសង្កាត់ សម្រេចបាន និងសំដៅពង្រឹងការអនុវត្តតួនាទី ភារកិច្ច របស់រដ្ឋបាលឃុំសង្កាត់ លើកការគ្រប់គ្រងមូលនិធិឃុំសង្កាត់ ដើមី្បបម្រើក្នុងកិច្ចអភិវឌ្ឍន៍មូលដ្ឋានប្រកបដោយគុណភាព ប្រសិទ្ធភាព តម្លាភាព បម្រើដល់ផលប្រយោជន៍ប្រជាពលរដ្ឋក្នុងមូលដ្ឋាន។
ព័ត៌មានជាតិ ថ្មីៗ
លោកនាយករងរដ្ឋបាល ក៏បានគូសបញ្ជាក់ផងដែរ អំពីប្រព័ន្ធអភិបាលកិច្ចនៅរដ្ឋបាលថ្នាក់ក្រោមជាតិ ក្នុងគោលការណ៍អភិវឌ្ឍន៍តាមបែបប្រជាធិបតេយ្យ ដោយមានភាពជាតំណាងសាធារណៈ, ស្វ័យភាពមូលដ្ឋាន, ការពិគ្រោះយោបល់និងការចូលរួម, ការឆ្លើយ និងគណនេយ្យភាព, ការលើកកម្ពស់គុណភាពជីវភាពរបស់ប្រជាពលរដ្ឋនៅក្នុងមូលដ្ឋាន និងការលើកស្ទួយសមធម៌ តម្លាភាព និងសុចរិក, វិធានការប្រឆាំងអំពើពុករលួយ និងរំលោភអំណាចជាដើម។ លោកក៏បានជំរុញដល់សមាជិកសមាជិកាកិច្ចប្រជុំទាំងអស់ ត្រូវធ្វើការត្រង់ត្រាបស្តាប់នូវការបង្ហាត់បង្ហាញរបស់វាគ្មិន ដើមី្បទទួលបាននូវបទពិសោធន៍ បច្ចេកទេស និងជាទុនមួយសម្រាប់យកទៅអនុវត្តនៅតាមបណ្តាឃុំសង្កាត់របស់ខ្លួន សំខាន់ចំពោះមន្ត្រីទទួលបន្ទុកអនុវត្តគម្រោមមូលនិធិឃុំសង្កាត់ ដើមី្បយកទៅអនុវត្តឲ្យប្រកបទៅដោយប្រសិទ្ធភាព និងគុណភាពខ្ពស់៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
