នៅសណ្ឋាការសុខាសៀមរាប នាថ្ងៃទី៥ ខែឧសភា ឆ្នាំ២០២៤នេះ សាខាកាកបាទក្រហមកម្ពុជាខេត្តសៀមរាប បានប្រារព្ធខួបលើកទី១៦១ ទិវាពិភពលោក កាកបាទក្រហម និងអឌ្ឍចន្ទក្រហម ៨ឧសភា២០២៤ ក្រោមប្រធានបទ “ រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ ” ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងលោកជំទាវ រួមនឹងថ្នាក់ដឹកនាំជាច្រើនរូប។
ក្នុងអត្ថន័យខ្លឹមសារនៃសារលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានបញ្ជាក់ថា ប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ” នៅឆ្នាំនេះ មានគោលបំណងសំខាន់បង្ហាញពីការប្តេជ្ញាចិត្តរបស់កាកបាទក្រហមកម្ពុជា បន្តកិច្ចខិតខំប្រឹងប្រែងពង្រឹង និងពង្រីកការអប់រំផ្សព្វផ្សាយស្តីពីការថែទាំសុខភាពបឋមតាមសហគមន៍ និងពង្រឹងភាពធន់នឹងអាកាសធាតុ ដើម្បីចូលរួមជាមួយរាជរដ្ឋាភិបាលកម្ពុជា ក្នុងការអនុវត្តវិធានការគន្លឹះនានា។ ជាពិសេសក្នុងរដូវប្រាំងឆ្នាំនេះ ដែលកម្ដៅកើនឡើងខ្ពស់មិនធ្លាប់ដែលមាន ដើម្បីពង្រឹងសេវាថែទាំសុខភាព ឆ្ពោះទៅការគ្របដណ្តប់សុខភាពជាសាកល ធានាសុវត្ថិភាពសុខភាព និងការលើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋ។
ឯកឧត្តម នាយឧត្តមសេនីយ៍ ទៀ សីហា មានប្រសាសន៍ថា ខួបលើកទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ឆ្នាំ២០២៤នេះ ពិតជាមានសារៈសំខាន់សម្រាប់ណាស់កាកបាទក្រហមកម្ពុជា ក៏ដូចជាសាខាកាកបាទក្រហមខេត្ត រួមនឹងសម្រាប់អាជ្ញាធរខេត្ត និងប្រជាជនទូទៅ រួមគ្នាដើម្បីបុព្វហេតុមនុស្សធម៌ សំដៅជួយដល់ជនរងគ្រោះ និងជនងាយរងគ្រោះ ដែលរងគ្រោះដោយសារគ្រោះមហន្តរាយនានា និងការថែទាំសុខភាពតាមសហគមន៍ ព្រមទាំងសកម្មភាពមនុស្សធម៌ផ្សេងៗទៀត។ តាមរយៈនេះក្នុងនាមរាជរដ្ឋាភិបាល សូមអំពាវនាវដល់សប្បុរសជនទាំងអស់ សូមបន្តកិច្ចខិតខំចូលរួមចំណែកជួយ និងសហការគ្នាឲ្យបានយ៉ាងសកម្ម និងរស់រវើកបន្តទៀត ឲ្យប្រែក្លាយជាកម្លាំងចលកររបស់កាកបាទក្រហមកម្ពុជា សម្រាប់ដោះស្រាយរាល់បញ្ហាប្រឈមទាំងឡាយរបស់ប្រជាពលរដ្ឋ ក្នុងអត្ថន័យបាវចនាសង្គ្រោះជីវិតផ្លាស់ប្តូរផ្នត់គំនិតដោយឈរលើគោលការណ៍គ្រឹះទាំង៧ របស់ចលនាកាកបាទក្រហម និងអឌ្ឍចន្ទក្រហម។
ក្នុងឱកាសនោះដែរ ឯកឧត្តម ឧបនាយករដ្ឋមន្រ្តី ក៏បានផ្តាំផ្ញើដល់អាជ្ញាធរគ្រប់លំដាប់ថ្នាក់ ពិសេសថ្នាក់ដឹកនាំសាខាកាកបាទក្រហមកម្ពុជាខេត្ត រួមនឹងអនុសាខាកាកបាទក្រហមកម្ពុជាក្រុងស្រុក ត្រូវយកចិត្តទុកដាក់ជាប្រចាំ តាមដានសភាពការណ៍ដែលអាចកើតមានឡើង។ ជាពិសេសករណីគ្រោះមហន្តរាយផ្សេងៗ ដែលប្រជាពលរដ្ឋរស់នៅតាមសហគមន៍មូលដ្ឋានរបស់ខ្លួន ដើម្បីឆ្លើយតប និងដោះស្រាយឲ្យបានទាន់ពេលវេលា ស្របតាមប្រធានបទដែលបានលើកឡើង “ កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា មិនទុកនរណាម្នាក់ចោល”។ ឯកឧត្តម ក៏សូមថ្លែងអំណរគុណចំពោះសប្បុរសជនទាំងអស់ តាមរយៈថវិកាដែលប្រមូលបានពីការបរិច្ចាគរបស់សប្បុរសជននានានៅពេលនេះ រួមមាន៖ អង្ករ ២តោន ទឹកបរិសុទ្ធ ១៥០កេស និងថវិកាជាតួលេខបឋមចំនួន ៤១២.០៦៣ដុល្លារ សម្រាប់ទ្រទ្រង់ដល់សាខាកាកបាទក្រហមខេត្តសៀមរាប ដេីម្បីប្រេីប្រាស់ជាប្រយោជន៍ក្នុងសកម្មភាពមនុស្សធម៌ឲ្យមានប្រសិទ្ធភាព និងប្រសិទ្ធផលបំផុត៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ